Minisitiri Gatete yatanze icyizere ko mu 2024 Abanyarwanda bose bazaba bafite amashanyarazi

Yanditswe na Uwimana Abraham
Kuya 2 Ukwakira 2020 saa 08:59
Yasuwe :
0 0

Minisitiri w’Ibikorwa Remezo, Ambasaderi Gatete Claver, yavuze ko hari icyizere ko intego ya Guverinoma yo kugeza amashanyarazi ku Banyarwanda bose mu 2024, izagerwaho nta kabuza.

Ibi yabitangarije mu muhango wo gutangiza gahunda nshya izafasha Abanyarwanda batishoboye kubona amashanyarazi aturuka ku mirasire y’izuba bahendukiwe. Ni gahunda yatangijwe na Banki Nyarwanda Itsura Amajyambere, BRD, ku bufatanye na Banki y’Isi n’ n’Ikigo cy’Iterambere cy’Abanya- Suède, SIDA.

Minisitiri Gatete yavuze ko Leta ikomeje gushyira imbaraga mu kongera aho amashanyarazi aturuka, hubakwa ingomero zitandukanye hirya no hino mu gihugu, hamwe no gufatanya n’abikorera ngo agere ku baturage, ndetse ahandi bagerweho n’aturuka ku mirasire y’izuba.

Ati “Icyo nababwira kugira ngo iyi ntego igerweho, akenshi tugomba kubona aho amashanyarazi aturuka, aha rero twasanze Leta itabyifasha yonyine dusanga twafatanya n’abikorera.”

Yavuze ko hirya no hino mu gihugu hari ingomero ziri gutungwanywa, nyinshi zigeze ku kigero cyo kuba zatangira gutangira amashanyarazi mu gihe cya vuba.

Harimo nk’umushinga uri i Gisagara uzatanga MW zigera kuri 70, Shema Power izabyaza amashanyarazi Gas Methane yo mu Kivu byitezwe ko izatanga Megawatt 56 mu cyiciro cya mbere naho mu cya kabiri igatanga 50 MW, hakaba n’umushinga wa Rusumo uhuriweho n’u Rwanda, u Burundi na Tanzania, uzana 80 MW.

Minisitiri Gatete yakomeje avuga ko uko bari gushyira imbaraga mu kubaka aho amashanyarazi ava, ariko bakomeje no kwita ku buryo aya mashanyarazi azagezwa ku baturage kuko ngo niho harimo akazi kenshi.

Ati “Aho ni ho hari akazi kenshi cyane, kajyanye no kubaka ya miyoboro, yaba imito n’iminini, tugashyiraho na za sitasiyo nto ari zo zigabanya za ngufu z’amashanyarazi manini cyane zikayageza ku kigero cy’aho yajya mu ngo zacu. Aho rero niho turi gushyira imbaraga.”

Uretse ibyo kandi Minisitiri Gatete yavuze ko hashyizwe n’imbaraga mu korohereza Abanyarwanda kubona amashanyarazi aturuka ku mirasire y’izuba, binyuze ku nkunga ya Banki y’Isi ingana na miliyoni 150 $, izatuma abaturage badafite ubushobozi buhagije bazashobora gufashwa kubona aya mashanyarazi ku giciro kiri hasi.

Yavuze ko izo ari zimwe mu mbogamizi zari zihari bagiye gukemura binyuze muri BRD, ngo haramutse habonetse n’indi nayo bakwihutira kuyikemura, byose bikazafasha mu gutuma intego ya Guverinoma yo kuba Abanyarwanda 100% bazaba bagerwaho n’umuriro w’amashanyarazi mu 2024 igerwaho.

Ibi kandi byanashimangiwe n’Umuyobozi Mukuru wa Banki Nyarwanda Itsura Amajyambere (BRD), Kampeta Pitchette Sayinzoga, wavuze ko ibyari nk’imbogamizi zibuza abantu benshi kugira amashanyarazi aturuka ku mirasire y’izuba, hashyizweho gahunda nshya zije kubikemura.

Izo ni gahunda zizorohereza abakora n’abakwirakwiza amashanyarazi aturuka ku mirasire y’izuba kubona inguzanyo mu bigo by’imari basabwe ingwate nto, ndetse n’abaturage bakagerwaho n’aya mashanyarazi basabwe kwishyura igiciro gito cyane bigendanye n’ibyiciro by’ubudehe barimo. Bityo bikazataga umusaruro ufatika.

Ati “Icya mbere navuga ni uko izi gahunda zije gufasha abaturage, ibigo by’imari, ndetse bikazanafasha Leta kugera ku ntego. Turi gukemura ibibazo byinshi icya rimwe niyo mpamvu mwabonye dufite n’abafatanyabikorwa batandukanye.”

“Impamvu tuvuga ko bizatanga umusaruro, ni uko twafashe umwanya tukumva igituma abaturage batabona umurasire nk’uko babyifuza, twasanze ibibazo byari bihari, hari ikibazo cy’ingwate mu mabanki, igiciro kiri hejuru no kutamenya amakuru, ibyo rero nibyo twaje gusubiza.”

Gahunda ya Guverinoma y’imyaka irindwi yatangiye gushyirwa mu bikorwa mu 2017 izageza mu 2024, igamije kwihutisha iterambere rirambye kandi rigera kuri bose, rishingiye ku bufatanye bw’inzego zinyuranye, kimwe mu by’ingenzi bikubiyemo ni uko mu 2014 abanyarwanda 100% bazaba bagerwaho n’amashanyarazi.

Minisitiri Gatete yavuze ko Leta izakomeza gushyira imbaraga mu gukorana n’abikorera, harebwa imbogamizi zose zigihari kugira ngo zivugutirwe umuti, bizatume intego igerwaho nta komyi kandi yavuze ko aho bigeze bitanga icyizere ko izagerwaho nta kabuza.

Imibare igaragazwa na REG kugeza ubu yerekana ko ubu mu Rwanda hose ijanisha ryerekana ko ingo zifite amashanyarazi yaba afatiye ku muyoboro mugari cyangwa afatiye ku mirasire y’izuba zisaga 56%.

Banki y'Isi yatanze inkunga ingana na miliyoni 15$ izafasha mu korohereza abaturage kubona umurasire
Minisitiri Gatete aganira na Kampeta uyobora BRD
Umuyobozi Mukuru wa BRD, Kampeta Pitchette Sayinzoga, yavuze ko hashyizweho gahunda zizakemura ibyari nk'imbogamizi ku kubona amashanyarazi
Minisitiri Gatete Claver yavuze ko hari icyizere ko intego ya Guverinoma yo kugeza amashanyarazi ku Abanyarwanda bose mu 2024 izagerwaho nta kabuza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .