Minisitiri Mbabazi yatumijwe mu Nteko ngo asobanure iby’umutungo bwite mu by’ubwenge

Yanditswe na Uwimana Abraham
Kuya 22 Nzeri 2020 saa 07:32
Yasuwe :
0 0

Minisitiri w’Urubyiruko n’Umuco, Mbabazi Rosemary, yatumijwe mu Nteko Ishinga Amategeko kuri uyu wa Gatatu tariki 22 Nzeri 2020 aho asobanurira Komisiyo y’Uburezi, Ikoranabuhanga, Umuco n’Urubyiruko ibiri gukorwa mu kubungabunga umutungo bwite mu by’ubwenge.

Umuyobozi wa Komisiyo y’Uburezi, Ikoranabuhanga, Umuco n’Urubyiruko mu Nteko, Nyabyenda Damien, yavuze ko ibisobanuro byasabwe Minisitiri Mbabazi bigamije kumva aho ishyirwa mu bikorwa ry’imyanzuro yafashwe muri Nyakanga 2018 rigeze.

Ati “Hari inama yaguye yabaye yahuje abagize Inteko Ishinga Amategeko, bamwe mu bagize Guverinoma ndetse n’abafatanyabikorwa. Icyo gihe twatanze bimwe mu byagombaga gukorwa, turifuza rero ko Minisitiri atubwira ho ishyirwa mu bikorwa ryabyo rigeze.”

Ibaruwa yandikiwe Minisitiri Mbabazi ivuga ko mu byagombaga gukorwa harimo gushyiraho ibikorwa byo gushyigikira imyidagaduro.

Komisiyo rero ngo irajwe ishinga no kumenya ibyakozwe mu gufasha abahanzi Nyarwanda gushyira ahabona ibihangano byabo.

Minisitiri Mbabazi yasabwe no kwerekana uburyo buri gukoreshwa mu gushishikariza Abanyarwanda muri rusange by’umwihariko mu mashuri mu kwigisha urubyiruko ku muco wo kurengera umutungo bwite mu by’ubwenge.

Yanasabwe no gusobanura icyo Leta iri gukora mu kurengera umutungo bwite mu by’ubwenge, gushishikariza abantu benshi kwandikisha ibihangano byabo, ndetse n’igikorwa kugira ngo basarure ibibivuyemo.

Kuri ubu Urwego rw’Igihugu rw’Iterambere (RDB) nirwo rurebwa n’ibyo kwandika umutungo bwite mu by’ubwenge, mu gihe ibirebana n’ishyirwaho n’amategeko abigenga bikorwa na za minisiteri zitandukanye.

Bamwe mu mpuguke bagiye bagaragaza ko hakenewe gushyirwaho ikigo cyihariye cyahabwa inshingano zo gukurikirana ibijyanye n’isigasirwa ry’umutungo bwite mu by’ubwenge byose.

Umuyobozi Mukuru w’Ihuriro Nyarwanda ry’Abahanzi (RSAU), Bwiza Nadine, yavuze ko ari byiza ko hajyaho urwego rumwe rwabazwa ibirebana n’ibungabungwa ry’umutungo bwite mu by’ubwenge byose ku buryo ngo ikibazo cyose cyabaho haba hari umuntu wihariye ushinzwe kubikurikirana kugira ngo bikemuke.

Ingingo ya mbere y’itegeko rigamije kurengera umutungo bwite mu by’ubwenge ryasohotse ku wa 14 Ukuboza 2009, igaragaza ibyiciro by’abantu ibihangano byabo bigomba kurengerwa.

Muri abo harimo abahanzi b’ibihangano by’ubuvumbuzi, ab’ibishushanyo, ab’ibimenyetso byihariye bikoreshwa mu bucuruzi, ab’ibihangano by’ubuvanganzo, ubugeni, ubumenyi, abahanzi bakina cyangwa baririmba, ibihangano by’abanyabugeni; abakora za fonogaramu n’undi muhanzi wese w’igihangano cy’ubwenge cy’umwimerere.

Umuryango Mpuzamahanga Urengera Umutungo bwite mu by’Ubwenge (WIPO) usobanura ko umutungo bwite mu by’ubwenge ari igihangano cy’ubwenge, nk’ubuvumbuzi, ubuhanzi n’ubukorikori, ibimenyetso n’ibirango, amazina n’amashusho, bikoreshwa mu bucuruzi.

Minisitiri w’Urubyiruko n’Umuco, Mbabazi Rosemary, yatumijwe mu Nteko ngo asobanure intambwe imaze guterwa mu by’umutungo bwite mu by’ubwenge

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .