Musanze: Abanyamadini mu guhangana n’ihungabana ryagizwe n’abangavu batewe inda bagahabwa akato mu miryango

Yanditswe na N.Kubwimana Janvière
Kuya 14 Nzeri 2020 saa 01:42
Yasuwe :
0 0

Abanyamadini n’amatorero atandukanye akorera mu Karere ka Musanze mu Majyaruguru y’u Rwanda bihaye umukoro wo guhangana n’ihungabana abangavu batewe inda bakiri bato bahuye naryo, nyuma bagahabwa akato mu miryango.

Ni intego bihaye ubwo basozaga inama yaganiriwemo uburyo bwo kurwanya ihohoterwa rishingiye ku gitsina, hagamijwe kubaka umuryango muzima udaheza buri wese mu bikorwa byose.

Bamwe muri aba banyamadini bavuga ko bibabaje kuba hakiri bagenzi babo badafata umwanya ngo batege amatwi, abana baba baratewe inda bakabyara imburagihe, ahubwo bagahitamo kubaca mu itorero, bigatuma bagira ihungabana ribashora mu bibi kurushaho.

Pasiteri Matabaro Mporana Jonas ukuriye Evangelical Restoration Church Paruwasi ya Ruhengeri, yavuze ko bidakwiye ko itorero riheza uwatewe inda.

Yagize ati “Ukuri kuriho ni uko tugomba kurengera umwana, si no kumurengera gusa ni no kwirengera kuko nibo mizero yacu, nibo torero ry’ejo n’igihugu cy’ejo. Kuba yaguye mu mutego agatwita aha mbere agana ni mu itorero, byaba bibabaje akugannye ukamuca.’’

“Ibi bikwiye kuba amateka ahubwo bakababa hafi bakabarengera, ndetse bakarenga ibi bakigisha n’imiryango yabo kubaba hafi ntibabatererane ngo babace.’’

Umuyobozi wa Islam mu Ntara y’Amajyarurugu, Sheikh Ismail Seif, na we yavuze ko mu idini rye bafite abashinzwe kurwanya amakimbirane yo mu ngo.

Ati “Ikijyanye n’aba bana bahohoterwa bagatereranwa kirahari, gusa n’ijambo ry’Imana rivuga ko ikunda abanyabyaha ikanga icyaha. Kuba rero yacibwa mu muryango yagera no mu idini akaba igicibwa kandi we yasabye imbabazi ku Mana, uba wishe ubuzima bwe.’’

Yavuze ko abana bari muri icyo cyiciro bakwiye guhabwa inyigisho zibahumuriza, bakanahinduka.

Umunyamabanga Nshingwabikorwa w’Umuryango Mpuzamatorero n’Amadini mu Rwanda, Nkurunziza Alexis, we avuga ko ibiganiro byateguwe muri gahunda yo gushishikariza abanyamadini n’amatorero kurwanya ihohoterwa rigikorerwa mu ngo, harimo n’irishingiye ku gitsina by’umwihariko ku bangavu baterwa inda bakiri bato.

Yavuze ko uru rwego rwumvwa cyane mu bayoboke barwo ku buryo rukwiye gufatanya n’izindi nzego bagasenyera umugozi umwe.

Umuyobozi w’Akarere ka Musanze, Nuwumuremyi Jeannine, avuga ko kuba abanyamadini n’amatorero baragiriwe icyizere n’abaturage babisanzuraho, bakabagisha inama bakabafungurira ibiri mu mutima yabo, ariyo mpamvu bakwiye gutanga umusanzu uhamye ku kibazo cy’abana bahohoterwa.

Yagize ati “Buri muntu wese ahanini usanga afite aho abarizwa bijyanye n’imyemerere ye, kuba rero abanyamadini n’amatorero ari abantu bagirirwa icyizere n’ababagana, bakabagisha inama, aribyo byatuma batanga umusanzu ku bibazo bikibangamira umuryango Nyarwanda, byaba bibabaje uciye wa mwana wahohotewe agaterwa inda, ariho bamwe bahitamo kujya mu buraya, mu muhanda no mu biyobyabwenge; ahubwo bakoreshe impano bahawe badufashe kurengera aba bana, aho kubatsindagira mu bibazo biruta ibyo bagize.’’

Mu Karere ka Musanze habarurwa amadini n’amatorero atandukanye asaga 200, aho umuryango uhuza amadini n’amatorero mu Rwanda, wahuje bamwe mu bayahagarariye, bagamije kubibutsa umusanzu wabo bafatanyije na Leta mu kurwanya ihohoterwa rikorerwa mu ngo, by’umwihariko irishingiye ku gitsina barengera abangavu babyara imburagihe bagatereranwa.

Abanyamadini n'amatorero biyemeje guhangana n'ikibazo cy'abangavu bagiterwa inda bagatereranwa mu miryango n'aho basengera
Umuyobozi w'Akarere ka Musanze, Nuwumuremyi Jeannine, yasabye abanyamadini n'amatorero gutanga umusanzu ufatika mu guhangana n'ihihoterwa rikorerwa abangavu n'andi yo mu miryango
Pasiteri Mporana yasobanuye ko abo bana baba aribo torero ry'ahazaza ariyo mpamvu bakwiye kurengerwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .