Ntabwo abana bose bazagira ku ishuri icyarimwe – Mineduc

Yanditswe na IGIHE
Kuya 3 Ukwakira 2020 saa 09:19
Yasuwe :
0 0

Minisiteri w’Uburezi yateguje ko umunsi amashuri abanza n’ayisumbuye azaba asubukuye amasomo, abana batazagira ku ishuri rimwe, ahubwo bazagenda mu byiciro nk’uko byamaze kwemezwa ku mashuri makuru na za kaminuza.

Minisitiri Dr Valentine Uwamariya kuri uyu wa Gatanu yabwiye abanyamakuru ko ubwo amashuri azaba asubukurwa mu kwezi gutaha, hafashwe ingamba ku buryo baziga nta bucucike bugaragara mu mashuri, mu kwirinda ikwirakwira ry’icyorezo cya COVID-19.

Yagize ati “Muri iyi gahunda yo kubaka ibyumba bishya by’amashuri, harimo n’amashuri 608 mashya, bivuze ngo ayo mashuri na yo agomba kubona abanyeshuri. Ishuri ritabashije kongerwaho ibyumba by’amashuri kubera ko nta butaka buhari bwo kuhagurira, hagiye habaho kubaka amashuri mashyashya. Icyo gihe rero abana bazimuka bave ku kigo kimwe bajye ku kindi kugira ngo bwa bucucike bugabanuke.”

“Murabona tuzafungura ibyumba byose bitaraboneka, bivuze ngo ntabwo abana bose bazagira ku ishuri icyarimwe, kugira ngo abagiyeyo babone aho bisanzurira. Mu byumba rero byari kujyamo abana bo mu mwaka runaka, igihe badahari, abasigaye bazajya babigabana kugira ngo cya kibazo cy’ubucucike kigabanuke.”

Minisitiri Uwamariya yavuze ko kubaka amashuri mashya bizakemura ikibazo cy’ubucucike mu mashuri, kuko mu mabwiriza yo gusubukura amasomo hanirindwa COVID-19, “ubucucike ntibwemewe nyine tugomba guhana intera mu ishuri.”

Byitezwe ko nta n’umunyeshuri uzaba yicarana n’undi ku ntebe imbere y’umwalimu.

Ubwo amashuri azaba asubukuwe kandi, hitezwe ko hashobora kubaho impamvu nyinshi zatuma abana bata ishuri biyongera, harimo kuba hari ababura ibikoresho by’ishuri kubera ubukene buriho muri iki gihe.

Minisitiri Uwamariya yijeje ko hateguwe ubufatanye n’inzego zose, ku buryo nta kibazo kizatuma abanyeshuri bata ishuri.

Ati “Turabyiteze ko bishobora kubaho, niyo mpamvu n’iyo gahunda yateguwe. Umunsi ingabihe izaba yasohotse n’ibyo byose bizagendana, kujya guhugura, kubakangurira, kwigisha babyeyi, kugira ngo umwana agaruke mu ishuri.”

Kuri uyu wa Gatanu kandi Minisiteri y’Uburezi yatangaje amashuri makuru na kaminuza byemerewe gusubukura amasomo nyuma y’igenzura byakorewe, menshi muri yo hakazabanza abari bageze mu myaka ya nyuma isoza amasomo.

Minisitiri Uwamariya yijeje ko abana bose batazagira ku ishuri icyarimwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .