Ntabwo azi amazina ye y’ukuri! Intimba ya Akayezu umaze imyaka 28 ataraca iryera abo mu muryango we (Video)

Yanditswe na Uwiduhaye Theos
Kuya 21 Nzeri 2020 saa 10:11
Yasuwe :
0 0

Ukwibyara gutera ababyeyi ineza! Iyi ni imvugo ikoreshwa kenshi abantu bashaka kwerekana ko kubyara umwana ukamurera, ukamubona atangiye kugera ikirenge mu cyawe cyangwa se yarengeje ku byo wamutekerezagaho biba ari ishema ku muryango.

Ibi ariko, bihira bake kuko si kenshi usanga ababyeyi babasha kugira amahirwe yo kubona imikurire y’umwana no kwishimira iterambere yigejejeho mu gihe yari atangiye kuba mukuru.

Nk’umuhanzikazi Butera Knowless utarabashije kubana n’ababyeyi be[ kuko bapfuye akiri muto cyane], ngo babone iterambere agezeho uyu munsi, avuga ko intimba idashira kuri we, ari uko atigeze agira amahirwe yo kuba yabereka umwuzukuru afite uyu munsi cyangwa se uko ari umwe mu bahanzi bahanzwe amaso mu Rwanda.

Siwe gusa! Hari benshi bagendana intimba mu mitima baremerewe ku buryo inyuma buri wese ashobora kubona ko bahiriwe, nyamara imbere bashenjagira bashira kuko batigeze bagira amahirwe yo kubona ababo.

Ni nako bimeze kuri Akayezu Christine uzwi nka ‘Kijyambere’ akaba atuye mu karere ka Gasabo mu Mujyi wa Kigali.

Uyu mubyeyi w’imyaka 28 afite abana babiri, iyo muganira ubona avuga make, ariko akitsa cyane ku gahinda yatewe no kuba nta foto agira y’ababyeyi be cyangwa se abavandimwe yewe n’abandi bo mu muryango. Iyo atangiye kuvuga inkuru ye amarira amuzenga mu maso akabura.

Akayezu ntabwo azi aho avuka ariko akeka ko ashobora kuba ari mu Ruhango cyangwa Nyanza, cyangwa mu zindi hafi y’utwo turere kuko mu kigo yabanje kurererwamo nk’imfubyi bamubwiye ko ariho bakuraga abana bo kurera.

Ntabwo azi neza amazina n’imyaka ye

N’ubwo Akayezu avuga ko yavutse mu 1992, avuga atazi neza koko niba aricyo gihe yavukiye gusa agahamya ko yatandukanye n’ababyeyi be akiri umwana muto cyane.

Ati “Mu 1994 natandukanye n’umuryango wanjye kubera Jenoside yakorewe Abatutsi. Jenoside yabaye ndi muto, banjyanye mu kigo cyitwaga Concern cyo mu Karere ka Ruhango kuhanderera. Sinigeze mbasha kumenya ngo Mama cyangwa Papa bitwaga gutya. Mu 1995 hari umuryango waje kumfata ujya kundera ariko nkahorana intimba kuko ntazi ababyeyi. Nkavuga nti wasanga nsa nka Papa cyangwa Mama, nkibaza nti wasanga nari mfite abavandimwe.”

Arongera ati “Nifuza kuba namenyana n’umuryango wanjye kuko wasanga ubu Papa cyangwa Mama bose bariho. Nkanamenya niba abavuka kwa Papa cyangwa Mama baba bahari.”

Yakomeje avuga ko kumenya imyirondoro ye byari bigoye bikaba byaratumye amara umwaka mu kigo cy’imfubyi atarabona izina.

Ati “Byari bigoye cyane kubona imyirondoro yanjye ntayo twabaga dufite ngo tumenye ngo navukaga aha cyangwa se ababyeyi banjye bari aba. Ubundi ndi mu kigo cy’imfubyi, banyitaga Kijyambere, amazina yanjye ntabwo bari bayazi umuryango wagiye kundera niwo wanyise amazina.”

Ku ishuri aho yigaga iyo byabaga ngombwa ko avuga amazina y’ababyeyi be, yavugaga ko ay’aba bamurera. Yarize ndetse asoza amasomo ye mu mashuri yisumbuye mu bijyanye n’Imibare, Ubukungu n’Ubumenyi bw’Isi (MEG).

N’ubundi ntabwo uri uwacu…

Akayezu avuga ko kuva mu bwana bwe kugeza ageze mu mwaka wa gatanu w’amashuri abanza, aribwo yabashije kumenya ko ahantu aba atari iwabo ngo ariko hari igihe abana b’uwo mukecuru bacikwaga cyangwa barakaraga bakamuserereza bamubwira ko n’ubundi atari uwaho.

Ati “Uwanderaga yari afite abahungu bakuru cyane, turakurana tukajya tujyana ku ishuri. Ariko hakaza kuzamo umwe muri abo bana mu gihe twarwanye, ati n’ubundi wowe ntabwo uri uwacu. Negeraga uwo mukecuru akambwira ngo mbyihorere.”

Yakomeje agira ati “Maze kugera mu mwaka wa gatanu w’amashuri abanza yaranyicaje arambwira ambwira ko atari we mama wanjye, anyereka n’igipapuro cyerekana ikigo yankuyeho, akampumuriza. Narabyumvaga aho turi kumwe ariko bikambabaza mu mutima. Nkibaza nti ese mama wanjye ameze ate ? Kuki yantaye? Ntabwo nabikururaga neza. Ariko maze gusobanukirwa amateka y’igihugu cyacu, narabyumvise.”

Abana be bamubaza nyirakuru, akaruca akarumira

Avuga ko kugeza ubu afite abana babiri, umwe afite imyaka umunani undi ine. Bakunze kumubaza nyirakuru cyane akabura icyo abasubiza.

Ati “Ngira abana bagira urukundo, bakunda kumbaza ngo ese nyogokuru arihe? Wowe nta mama ugira? bakambaza impamvu ntabereka nyirakuru na sekuru. Kubasubiza birangora nkababwira nti muzababona. Ariko, nkagira igikomere cyo kuba ntazi irengero ryabo.”

Avuga ko n’abana be bari mu batumye ashaka gutangira gushaka ababyeyi be. Avuga ko nta kintu cyihariye nk’ikibibi cyangwa se ikindi kintu cyihariye afite ku buryo umuntu umuzi ari uruhinja yamwibukiraho, ariko ko kera yari umwana ukunda guceceka kandi ari munini ari n’inzobe.

Ngo ajya gushakana n’umugabo afite uyu munsi yabanje kumuganiriza iby’inkuru ye, arababara cyane ndetse atangira kumushyiramo umutima wo gushakisha ababyeyi be cyangwa abandi bo mu muryango.

Kubera ko asanzwe asenga avuga ko mbere yo gutangaza iyi nkuru yabanje kwiragiza Imana, kugira ngo abe ariyo imujya imbere.

Asaba buri wese wabonye iyi nkuru kuyisangiza abantu ikagera kure akareba ko yabona abo mu muryango we.

Akayezu avuga ko atazi amazina ye y'ukuri kuko ayo afite yayiswe n'umubyeyi wamureze
Akayezu Christine hamwe n'umubyeyi wamureze ari kumwe n'abuzukuru be
Ifoto ya Akayezu mu buto bwe
Akayezu avuga ko afite imyaka 28

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .