Nyabihu: Umugabo yafatanywe litiro hafi 2000 z’inzoga zitujuje ubuziranenge

Yanditswe na IGIHE
Kuya 18 Ukwakira 2020 saa 08:23
Yasuwe :
0 0

Polisi y’u Rwanda ikorera mu Karere ka Nyabihu, ikomeje ibikorwa byo kurwanya ibiyobyabwenge n’ibindi binyobwa bitujuje ubuziranenge, aho ku wa 15 Ukwakira yafashe umugabo w’imyaka 38 akekwaho gukora inzoga zitujuje ubuziranenge.

Uyu mugabo yafatiwe mu Murenge wa Rugera mu Kagari ka Nyarutembe, mu Mudugudu wa Kibere. Umuvugizi wa Polisi mu Ntara y’Iburengerazuba, CIP Bonaventure Twizere Karekezi, yavuze ko gufatwa kwe byaturutse ku makuru yatanzwe n’abaturage.

Ati “Abaturage bari bafite amakuru ko akora inzoga zitujuje ubuziranege, barabitubwiye tujyayo dusanga koko akora izo nzoga. Byaje kugaragara ko atari ubwa mbere afatwa akora ziriya nzoga.”

CIP Karekezi yakomeje yavuze ko ubwo abapolisi bageraga mu rugo rw’uyu mugabo basanze mu nzu ye harimo litiro 1980 z’inzoga yari amaze gukora.

Yaboneyeho kongera gukangurira abaturage kwirinda kunywa inzoga zitujuje ubuziranenge, bitewe n’uko zishobora kugira ingaruka ku buzima bwabo ndetse no ku mutekano.

Ati “Ibi nibyo duhora dukangurira abaturage, inzoga zitujuje ubuziranenge zigira ingaruka ku buzima bw’umuntu no ku mutekano, ntabwo byemewe gukora ziriya nzoga. Abantu bakora ziriya nzoga bazikorana isuku nkeya ndetse n’ibyo bazikoramo ntabwo bizwi, bazikora bibwira ko tutabareba ariko baribeshya kuko mu mikoranire myiza n’abaturage tuzajya tubafata.”

CIP Karekezi yashimiye abaturage bakomeje gutanga amakuru anabasaba gukomeza ubwo bufatanye mu kurwanya ibyaha no kubikumira bitaraba.

Yabagaragarije ko ibyaha byinshi bikunze kugaragara bijyanye no kurwana ndetse n’amakimbirane yo mu miryango akenshi bikorwa n’abanyoye inzoga zitujuje ubuziranenge.

Si ubwa mbere muri aka Karere ka Nyabihu hagaragaye abakora inzoga zitujuje ubuziranenge kuko no mu ntangiriro z’uku kwezi hari undi muturage Polisi yari yafashe azikora, afatanwa litiro 1000.

Uyu mugabo yafatanywe hafi litiro 2000 z'inzoga zitujije ubuziranenge

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .