Nyarugenge: Inyubako zihuriramo benshi ziri gushyirwamo icyumba gifashirizwamo abafite ibimenyetso bya COVID-19

Yanditswe na Ishimwe Alain
Kuya 21 Nzeri 2020 saa 08:28
Yasuwe :
0 0

Imiturirwa miremire 16 ikorerwamo n’abantu benshi mu Karere ka Nyarugenge iri gushyirwamo icyumba gifasha kwita ku bagaragaje ibimenyetso bya COVID-19, kigomba kuba kirimo umuganga n’ibyangombwa by’ibanze byo kwita ku murwayi.

Mu rwego rwo kwirinda ikwirakwira rya COVID-19, mu gihugu hose hakajijwe ingamba aho imbere ya buri nyubako ikorerwamo n’abantu benshi hashyizwe aho gukarabira intoki ndetse kuri buri muryango hari umuntu upima umuriro hakumirwa uwaba intandaro yo kwanduza abandi.

Kuri ubu mu Mujyi wa Kigali mu nyubako zimwe na zimwe hari gushyirwamo icyumba cyo gufasha uwagaragaje ibimenyetso by’iki cyorezo birimo gukorora cyane, guhumeka bigoranye, umuriro mwinshi n’ibindi ngo ahabwe ubufasha atekanye.

Ba nyir’inyubako zihuriramo abantu benshi babwiye RBA ko impamvu bashyizeho icyumba cyo kwita ku bakekwa ari ugukomeza ingamba zo kwirinda.

Uhagarariye inyubako y’Inkundamahoro, Munyabarenzi Boniface, yavuze ko icyo cyumba kizajya gishyirwamo umuntu urwaye.

Yagize ati “Niyo mpamvu twashyizeho iki cyumba kugira ngo umuntu twasanga arwaye tube twamushyiramo. Harimo igitanda, harimo n’ibikoresho by’ibanze ku buryo icyo gihe baba bategereje noneho abaganga bakaba baza kubafata hano.”

Uhagarariye inyubako ya Makuza Peace Plaza, Musoni Marcel, yatangaje ko hari igihe umuntu yapimwaga basanga hari ibimenyetso afite bakamwicaza ku kabaraza.

Yagize ati “Ugaragaweho n’ibyo bimenyetso tumuzana mu cyumba, murabona ko ari ahantu hatuje. Wiyumva ko nta kibazo cyabaye ushobora gusohoka mu kanya umuriro wari afite ugabanutse.’’

Umuyobozi Nshingwabikorwa w’Akarere ka Nyarugenge, Ngabonziza Emmy, yavuze ko icyo cyumba kigomba kuba giteye ku buryo kitabangamira ukirimo ndetse mu gihe abaganga baje gutwara umurwayi bakaba bakoroherwa no kumugeraho.

Yagize ati “Icyumba ubwacyo kigomba kuba ari cyiza, gifite ibyangombwa by’ibanze byafasha kwita ku murwayi cyane cyane bijyanye n’imiterere y’indwara, kuko kigomba kuba gifasha umuntu urimo kubona umwuka uhagije.”

Yavuze ko hari igihe babwiraga abantu ngo babe bagiye ku ruhande bigatuma abasigaye bagira ubwoba bagakeka ko uwo muntu arwaye COVID-19.

Ati “Abantu benshi barababwira ngo mujye ku ruhande ugasanga ba bantu barakangaranye bati uriya muntu arwaye COVID-19, aha rero ni mu buryo bwo kugira ngo dushake igisubizo cyiza kirambye kandi n’ugaragaweho n’ibyo bimenyetso abashe kwitabwaho byoroshye.’’

Kugeza ubu imiturirwa icyenda muri 16 yabaruwe niyo imaze gushyirwamo icyumba cyagenewe abapimwe bakagaragaza umuriro udasanzwe, abataragitegura nabo basabwa kubikora vuba.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .