Polisi yaburiye abacuruza amashashi nyuma yo guta muri yombi umusore wari uyakuye muri Uganda

Yanditswe na Bukuru JC
Kuya 20 Nzeri 2020 saa 11:47
Yasuwe :
0 0

Inzego z’umutekano zikorera mu Murenge wa Kiyombe mu Karere ka Nyagatare zafashe umusore w’imyaka 20, afite umufuka wuzuyemo amashashi ibihumbi bibiri ayinjije mu Rwanda aho yagombaga kuyacururiza mu Rwanda. Yafatiwe mu nzira zitemewe zo mu Kagari ka Gataba mu Mudugudu wa Rwagikunengwa mu Murenge wa Kiyombe.

Umuvugizi wa Polisi mu Ntara y’Iburasirazuba, CIP Hamdun Twizeyimana, avuga ko uyu musore yafashwe mu ijoro rya tariki ya 17 rishyira tariki ya 18 Nzeri n’inzego zishinzwe umutekano ari n’ijoro avuye muri Uganda.

Ati “Bamwe mu bashinzwe umutekano bafatanyije n’abapolisi bafatiye mu cyuho uriya musore arimo kwambuka ava mu gihugu cya Uganda ageze mu Rwanda anyuze mu nzira zitazwi. Bahise bamufata baramudushyikiriza ndetse n’uwo mufuka urimo amashashi ibihumbi bibiri.”

CIP Twizeyimana yakomeje yibutsa abantu ko amashashi atemewe ku butaka bw’u Rwanda ndetse ko uyazana aba akoze icyaha kandi gihanirwa n’amategeko. Yabibukije ko nta n’umuntu wemerewe kwambuka igihugu ngo ajye mu kindi kubera icyorezo cya COVID-19 cyateye.

Ati “Muri iki gihe u Rwanda ruhanganye n’icyorezo cya COVID-19, ushobora kwambuka mu buryo butazwi ukazana icyo cyorezo mu bo wasize mu Rwanda, niyo mpamvu imipaka yafunze. Byongeye kandi mu Rwanda ntabwo twemera ikoreshwa ry’amashashi, ni icyaha gihanwa n’amategeko.”

Yakomeje abagaragariza ko amashashi yangiza ubutaka kubera ko aho ageze atabora ndetse n’abayatwitse bakangiza ikirere kubera imyotsi yayo.

Ati “Abashakashatsi bagaragaje ko amashashi ari mu bintu byangiza ubutaka ntibubashe gutanga umusaruro kubera ko atabora. Hari n’abo usanga bayatwitse kandi imyotsi yayo nayo ni mibi cyane ihumanya ikirere kibamo umwuka duhumeka.”

Polisi isobanura ko uyu musore atigeze ashaka kuvuga aho yari ajyanye ayo mashashi, ariko yahise ashyirwa mu kato nyuma akazashyikirizwa Urwego rw’Ubugenzacyaha (RIB) kugira ngo akorerweho iperereza.

Amategeko y’u Rwanda agena ko umuntu utumiza mu mahanga amashashi n’ibikoresho bikozwe muri pulasitiki bikoreshwa inshuro imwe, ahanishwa kwamburwa ayo mashashi n’ibyo bikoresho no kwishyura ihazabu yo mu rwego rw’ubutegetsi ingana n’inshuro icumi z’agaciro k’ayo mashashi n’ibyo bikoresho bikozwe muri pulasitiki bikoreshwa inshuro imwe.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .