Polisi yerekanye abajura bibye mu rugo rw’umuturage banica umwe mu barubagamo bamukase ijosi

Yanditswe na Ishimwe Alain
Kuya 7 Ukwakira 2020 saa 05:01
Yasuwe :
0 0

Polisi y’Igihugu yerekanye abagabo batanu bakekwaho gutera urugo rw’umuturage witwa Habarurema Anicet ruherereye mu Murenge wa Masaka bakiba televiziyo ndetse bakica umushoferi we witwe Nsengayire Anicet mu ijoro ryo ku wa 30 Kanama uyu mwaka.

Aba bakewaho ubu bwicanyi bose uko ari batanu bahurira ku kuba barajyanywe kugororwa mu Kigo Ngororamuco cya i Iwawa nyuma yo gufatwa ubwo bari inzererezi.

Ikindi ni uko bose batuye mu gasanteri kamwe kitwa Kandahali gakunze kuvugwamo ko harimo abantu benshi bacuruza ibiyobyabwenge, bajya mu bikorwa by’ubujura n’urugomo. Aba bakekwaho biyemerera ko basanzwe bakora ibikorwa by’ubujura.

Bakekwaho kwica Nsengayire Anicet, aho bavuga ko babiri muri bo aribo bamwishe ubwo yabarwanyaga bagiye kwiba.

Umwe muri bo yagize ati “Ibyo kwica umuntu ni [uwitwa] Viye na Nyinya [amazina y’abamwishe]; nibo bagiye kwiba iyo televiziyo bavuyeyo turi kunywa inzoga barabyigamba bati twebwe umuntu twaramurangije.”

Uwishwe yari amaze imyaka igera kuri 20 akorera Habarurema yishwe nyuma y’uko agerageje gutesha abo bajura. Bamukase ijosi hakoresheje “Scie à métaux" hanyuma bica idirishya binjira mu nzu batwara televiziyo.

Habarurema wibwe, yavuze ko hari agakwege abajura banyuza mu idirishwa rigafunguka hanyuma bagafara ijeki bakagonda “grillage” maze umuto muri bo akinjira. Atekereza ko muri uko kwagura “grillage” nyakwigendera yaba yarabumvise agasohoka bagahita bamwica.

Ati “Dutekereza ko muri uko kwagura ama- grillage bishobora kuba byarasakuje cyangwa byarakatse. Noneho kuko uwo mushoferi yabaga mu yindi nzu iteganye n’iryo dirishya, dutekereza ko yaba yarabyutse bagahita bamugarika hasi bakamwica bamukase ijosi. Nonaha numvise ngo ni “Scie à métaux” bakoresheje. Hanyuma binjira mu nzu televiziyo barayitwara noneho n’ingufuri yari iri ku rugi ntitwamenye igihe bayifunguriye.”

Uyu mugabo ngo yamenye ko yibwe ahagana saa munani z’ijoro, nabwo ni uko hari umuntu watabaje avuga ko mu gipangu bahibye mu gihe agiye kureba nyakwigendera asanga aryamye hasi.

Umuvugizi wa Polisi y’Igihugu, CP John Bosco Kabera, yatangaje ko kuba aba bajura bitana ba mwana ari amatakirangoyi cyane ko bamwe muri bo babyivugira ko bishe umuntu kandi bakaba bamaze ukwezi kose bashakishwa.

Ingingo ya 170 mu gitabo giteganya ibyaha n’ibihano mu Rwanda, ivuga ko umuntu wagiye kwiba bigateza urupfu, ashobora guhanishwa igifungo cya burundu mu gihe abihamijwe n’urukiko.

Ati “Ibyo rero bavuga utabyemera azabivugira imbere y’urukiko, azisobanura kandi ubutabera ni ubutabera buzamurenganura.”

CP Kabera yaburiye abantu bishora mu byaha n’ibindi bikorwa by’ubugizi bwa nabi, ko bazafatwa bakabiryozwa kabone n’iyo bakwihisha kure bingana iki.

Aba basore uko ari batanu bakekwaho kwiba bagasiga bishe umushoferi mu rugo rw'umuturage

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .