Rotary Club Kigali-Virunga yabonye Perezida mushya (Amafoto)

Yanditswe na Twarabanye Venuste
Kuya 28 Kamena 2020 saa 05:38
Yasuwe :
0 0

Umuhinde Jwala Kumar yatorewe kuyobora Umuryango w’abagiraneza wa Rotary Club Kigali-Virunga asimbuye Ingabire Jenipher wari umaze umwaka afite izo nshingano.

Ku wa Gatandatu tariki 27 Kamena 2020 nibwo Jwala Kumar yatangajwe nka Perezida mushya wa Rotary Club Kigali-Virunga.

Rotary yita ku bikorwa by’imibereho myiza y’abaturage, kurwanya ubujiji n’ubukene, kwegereza ubuvuzi kuri bose, kunoza imitangire y’amazi meza, guhangana n’ibyorezo, guhashya indwara y’imbasa no gufasha abababaye.

Ingabire Jennipher wasoje manda ye yavuze ko mu byo yishimira byagezweho ari ubufatanye bwaranze abo bayoboranaga n’abanyamuryango muri rusange byatumye muri manda ye huzura inyubako yagenewe kuba icumbi ry’abantu baturuka imihanda yose bagiye kwivuza kanseri mu Bitaro bya Gisirikare i Kanombe.

Yagize ati “Ndashimira buri wese muri komite twafatanyije n’abanyamuryango bose mu bikorwa byose twakoze muri uyu mwaka.”

Inyubako izacumbikira abajya kwivuza Kanseri i Kanombe yubatse i Kinyinya yamaze kuzura. Ifite ubushobozi bwo gucumbikira abarwayi bari hagati ya 30 na 50. Imirimo yo kuyisana Rotary Club Kigali Virunga yayikozeho yatwaye miliyoni 70 Frw, muri rusange ifite agaciro ka miliyoni 100 Frw.

Ni umushinga watekerejwe nyuma y’uko mu Bitaro biri i Kanombe hatangijwe Ikigo kivura Kanseri mu buryo bwo gukoresha Imirasire (Radiotherapy).

Perezida mushya uzayobora manda ya 2020-2021, Jwala Kumar, yabwiye IGIHE ko uwo yasimbuye yakoze imirimo ikomeye yo kuzuza iyo nyubako bityo na we azakomereza aho igeze kugira ngo abagenerwabikorwa batangire kuyikoresha.

Ati “Jenipher yasoje imirimo yo kuyubaka natwe tugomba kugeza aho itangira gukora kugira ngo turebe ko abagenerwabikorwa bayikoresha, kuko mu gihe itarakoreshwa umushinga nturagera ku ntego.”

Muri rusange yavuze ko ibikorwa byinshi muri manda ye bizibanda ku rwego rw’ubuzima harimo kwishyurira abaturage ubwisungane mu kwivuza, kunganira Guverinoma mu ngamba zo kurwanya COVID-19 n’ibindi.

Kumar yanagaragaje ko azafatanya n’izindi Rotary Club zo mu bindi bihugu mu mishinga mpuzamahanga ihuriweho.

Ati “Rotary Club ifite imishinga myinshi ariko iyo dushyize imbere muri iki gihe ni iyerekeye urwego rw’ubuzima.”

Ambasaderi w’u Buhinde mu Rwanda, Shri Oscar Kerketta, wari umushyitsi mukuru muri uyu muhango yashimiye Rotary Club Kigali-Virunga ku bikorwa bitandukanye byunganira umuryango Nyarwanda, ikora mu nzego zitandukanye zirimo uburezi, ubuzima, ubuhinzi n’ibikorwaremezo.

Yashimiye Jwala Kumar avuga ko igihe amaze mu Rwanda n’ubunararibonye afite bizamufasha muri manda ye.

Ati “Ndashimira Jwala ubaye Perezida wa Rotary Club Kigali Virunga afite ubumenyi butandukanye amaze imyaka irenga 10 mu Rwanda, afite ubumenyi mu bucuruzi. Nkuko nabivuze akamaro kanini ka Rotary ni uko ihuza abantu bagafatanya kugira ubumenyi bakagira n’uruhare mu bikorwa bya muntu.”

Icumbi ry’abajya kwivuza Kanseri Perezida ucyuye igihe n’umusimbuye bagarutseho ni undi mushinga ukomeye Rotary Club Kigali-Virunga yujuje i Kigali nyuma y’Isomero ry’Igihugu (Kigali Public Library- KPL) riherereye ku Kacyiru.

Rotary Club Kigali Virunga igizwe n’abanyamuryango 32 baturuka impande zose z’Isi barimo Abanyarwanda, Abanyakenya, Abahinde, Abanya-Sudani, Abagande, Abanya- Nigeria, Abanyamerika barimo n’abanyacyubahiro nk’abambasaderi bo mu bihugu bitandukanye. Mu Rwanda, Rotary igizwe na clubs esheshatu zirimo iya Musanze– Murera, Kigali Mont Jali, Kigali Virunga, Kigali Doyen, Gasabo na Butare.

Ingabire Jenipher ucyuye igihe ku buyobozi bwa Rotary Club Kigali Virunga na Jwala Kumar ugiye kuyobora manda ya 2020/2021
Jwala Kumar (ibumoso) yagizwe Umuyobozi w'Umuryango wa Rotary Club Kigali-Virunga asimbuye Ingabire Jenipher. Uyu muhango wanitabiriwe n'Umuyobozi wa Rotary Club mu Rwanda, ADG Rugera Jeannette (wambaye iroza) na Ambasaderi w’u Buhinde mu Rwanda, Shri Oscar Kerketta
Jwala Kumar yijeje ubufatanye n’izindi Rotary Clubs zo mu bindi bihugu mu mishinga mpuzamahanga ihuriweho irimo n'uw'ubuvuzi
Jwala Kumar yambitswe umudali wagenewe abayobozi ba Rotary, anahabwa kashe
Perezida mushya wa Rotary Club Kigali Virunga, Umuhinde Jwala Kumar, yavuze ko azibanda ku bikorwa byo mu rwego rw'ubuzima
Ambasaderi w’u Buhinde mu Rwanda, Shri Oscar Kerketta, yashimye ibikorwa bya Rotary Club Kigali Virunga
Muri iki gikorwa hanabaye umwanya wo gutombora impano zitandukanye. Ambasaderi wa Nigeria mu Rwanda, Adam Shauib Onoze, yatomboye inkweto
Umuhinde Jwala Kumar wagizwe Umuyobozi w'Umuryango w’abagiraneza wa Rotary Club Kigali-Virunga ari kumwe na Birungi Paul Masterjerb wigeze kuba Umuyobozi Wungirije Guverineri wa Rotary District 9150
Abanyamuryango bashya babiri binjijwe muri Rotary Club Kigali Virunga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .