Rubavu: Aborozi barinubira izamuka ry’ibiciro by’ibiribwa by’amatungo

Yanditswe na Mukwaya Olivier
Kuya 10 Ukwakira 2020 saa 12:54
Yasuwe :
0 0

Aborozi bibumbiye muri Koperative COODERU ikorera mu mirenge itandukanye y’Akarere ka Rubavu, barinubira izamuka ry’ibiciro by’ibiryo by’inka biva mu bisigazwa by’ibikoreshwa mu kwenga inzoga bizwi nka ’drêche’, bahabwa na Koperative SOSERGI (Société des services de Gisenyi).

COODERU ibarizwamo aborozi b’inka bo mu mirenge ya Rubavu, Rugerero, Cyanzarwe, Nyundo na Nyamyumba, basanzwe bohereza amata mu mujyi wa Goma.

Abo borozi binubira kuba bishyura amafaranga y’ibiryo by’inka hagashira igihe kirekire batabihabwa, bakanashinja iyo koperative guhanika ibiciro ku buryo benshi muri iyi minsi barimo kugorwa no kugaburira amatungo yabo.

Umworozi witwa Utazirubanda Hodari yagize ati "Ubusanzwe Fuso ya drêche twayiguraga ku mafaranga y’u Rwanda ibihumbi 46, ubu iriya Sosiyete yazamuye ibiciro uko yishakiye, aya mafaranga aborozi bakaba batabasha kuyabona’’. Ubu imodoka imwe igeze ku bihumbi 60 Frw.

Mbarushimana Gérard yungamo ko umworozi ashobora kwishyura drêche akamara amezi atatu atarayihabwa, ibyo baheraho bavuga ko SOSERGI ibaha serivisi mbi.

Ati "Icya mbere ushobora kumara amezi atatu bataraguha drêche, ugasanga n’ubundi wishyuye amafaranga yawe bakayakoresha, kandi hari abandi bishyura drêche ugasanga nyuma y’umunsi umwe barayihawe, cyangwa se akishyura uwo munsi akayibona, imikoranire yacu nta gaciro baduha."

Kadogo Aimable uyobora COODERU, avuga ko SOSERGI idakeneye kwita ku borozi, ko ahubwo icyo ishaka ari inyungu gusa.

Yavuze ko ikibazo aborozi bafite cyagejejwe no ku buyobozi bw’Akarere ka Rubavu, ariko ntibugire icyo bubafasha.

Ati “Twandikiye ubuyobozi bwa SOSERGI ariko ntabwo batwumva, bakubwira ko bakeneye guteza koperative yabo imbere ntibakeneye kutwitaho, barashaka kwita kuri SOSERGI yabo, twe ntacyo tubarajeho ishinga."

Ndekezi Gaspard uyobora SOSERGI, yavuze ko kuba drêche yariyongereye byatewe no kuba umubare w’aborozi bayikenera wariyongereye, no kuba igiciro cyari kimaze imyaka umunani, kitari kikijyanye n’uko ubuzima buhagaze.

Ati “Twazamuye ibiciro kuko irimo gushakwa cyane mu gihugu, ku giciro cyari gisanzwe drêche yiyongereyeho amafaranga y’u Rwanda ibihumbi 14 Frw, si amafaranga menshi kuko ayo mafaranga yagenwe hagendewe uko ibiciro bihagaze muri iki gihe, kandi bikaba bimaze imyaka umunani, hari hakenewe ko bijyana n’ibiciro ku masoko’’.

Yabijeje kujya bahabwa serivisi nziza, hirindwa ababyihisha inyuma atari aborozi, baza bakagura nyinshi bakajya bagurisha bagenzi babo ku mafaranga menshi.

Koperative COODERU ibarizwamo aborozi b’inka bo mu mirenge ya Rubavu, Rugerero, Cyanzarwe, Nyundo na Nyamyumba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .