Rubavu: Ntibavuga rumwe ku mashini yaguzwe ngo yumishe imboga none iraziteka

Yanditswe na Rabbi Malo Umucunguzi
Kuya 15 Ukwakira 2020 saa 05:48
Yasuwe :
0 0

Abahinzi b’imboga bo mu Karere ka Rubavu bavuga ko imashini yari yaguzwe kugirango ibafashe kumisha umusaruro w’imboga bityo zibashe kubikwa igihe kirekire zitangiritse, aho kuzumisha isigaye iziteka zigashya.

Iyi mashini yaguzwe hafi miliyoni 30 Frw, iguzwe na koperative KAIDU igizwe n’abahinzi b’imboga n’imbuto bo mu murenge wa Busasamana. Yatangiye gukora muri Mata 2020, yumisha ibitunguru na tungurusumu bikunze kwera muri ako gace.

Muri Nzeri 2020 nibwo iyi mashini ngo yashyizwemo toni eshatu za tungurusumu na toni ebyiri z’ibitunguru, aho kugirango ibyumishe irabiteka birashya.

Ingabire Annette ukora muri iyi koperative, avuga ko batunguwe n’ukuntu iyi mashini yatetse ibitunguru aho kubyumisha.

Ati “Twabishyizemo bimaramo amasaha icyenda, tubikuyemo dusanga hari ibyashiriyeho, mu kugenekereza byahumuraga nk’aho bitetse, noneho umutekinisiye wari uhari, nyir’imashini, aratubwira ngo niko bigenda biraza guhora, nibigera hasi biraza kuba bizima, ariko urebye na we ntabwo arabimenya neza ngo arebe ko ifite ubushobozi bwo kumisha.”

Niyonsaba Damascene wahombejwe n’iyi mashini, avuga ko ari igihombo gikomeye yagize kuko ubu buhinzi yari yabushoyemo miliyoni 2 Frw.

Ati “Ni ukuvuga ngo hano mpombye kabiri, mpombye imodoka yawuzanye [umusaruro] iwugeza hano, mpombye abakozi bapakuruye, abapakiye mu murima bawuzana hano, n’ubu ndacyahomba kuko ndimo ndishyura ku bundi buryo butari ku masezerano. Ubwo ni ukuvuga ngo rero na banki ishaka yanantwara, kuko n’uyu musaruro uri aha nta soko ufite.”

Umuyobozi w’agateganyo wa koperative KAIDU, Nzavugankize Mediatrice, avuga ko iyo mashini yari ikiri mu igerageza bari batarayakira burundu, bityo ko bo na rwiyemezamirimo bazabiganiraho bose bagafatanyiriza hamwe kugabana igihombo batejwe n’iyi mashini.

Ati “Ntabwo bahombye kubera ko turi gushaka uburyo bazishyurwa, rwiyemezamirimo wari watwijeje igikoresho akakizana kidashyitse, kitari uko twabishakaga, ashobora kuzadufasha muri icyo gihombo tukareba uko uwo muhinzi twamugenza, n’umuhinzi akabona ukundi yabyoroshya tukagabana igihombo.”

Uwamugirimfura Rene uyobora ikigo Green Utility for Africa Group cyahawe isoko ryo kugura iyo mashini, avuga ko gupfa kwayo byaturutse ku bumenyi buke bw’abakozi b’iyo koperative bayikoresheje nabi, ariyo nayo mpamvu mu mpera z’uku kwezi bateganya kongera kubahugura, ndetse bakayibashyikiriza burundu.

Ati “Ikibazo cyaje nyuma yo kugerageza ibitunguru, hashyirwamo ibitunguru biteze n’ibyeze. Iyo ushyizemo igitunguru kiteze byo bisa nk’ibitogota. Twe tugerageza nka tungurusumu nta kibazo zagize, ni nayo mpamvu nkubwira ko ikibazo bagize ni imikoreshereze yayo mu bijyanye no kuyigerera neza mu bijyanye n’ubushyuhe ikoresha, naho ku bindi byo kujyana umusaruro ukaba warangiritse, ntabwo tuvuze ngo tuzabishyura icyo gihombo bagize, ni ibintu tuzaganiraho na koperative dukurikije amaserano dufitanye”.

Igurwa ry’iyi mashini ni kimwe mu bibazo byari byagejejwe ku mukuru w’igihugu Paul Kagame, ubwo yasuraga Akarere ka Rubavu ku wa 10 Gicurasi 2019.

Abahinzi bagaragazaga ko iri mu byadindije gutangira k’uruganda rubafasha gutunganya no kubika umusaruro wabo, Perezida Kagame asaba ko inzego zitandukanye zabafasha iki kibazo kikarangira.

Iyi mashini yagombaga kumisha imboga none iraziteka zigashya
Inyubako za koperative y’abahinzi b’imboga ya Busasamana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .