Rusesabagina yasabiwe kongererwa umwanya avugana n’umuryango we kuri telefoni

Yanditswe na Mutangana Gaspard
Kuya 22 Nzeri 2020 saa 03:41
Yasuwe :
0 0

Umuyobozi wa Komisiyo y’Igihugu y’Uburenganzira bwa Muntu, Mukasine Marie Claire, yatangaje ko basuye Paul Rusesabagina aho afungiye, hagamijwe kureba uko uburenganzira bwe bwubahirizwa mu bijyanye n’imibereho myiza no guhabwa ubutabera buboneye, ndetse ko bamukoreye ubuvugizi ku byifuzo bye.

Rusesabagina yasuwe tariki ya 16 Nzeri kuri Sitasiyo ya Polisi ya Remera, agirana ibiganiro n’iyi komisiyo, byabaye mu muhezo kugira ngo yisanzure avuge icyo atekereza cyose.

Muri ibyo biganiro yagaragaje ibyifuzo yumva ko yakorerwaho ubuvugizi, birimo kongererwa umwanya wo kuvugana n’abunganizi be mu mategeko no kongererwa inshuro avugana n’abo mu muryango we kuri telefoni.

Mu kiganiro iyi komisiyo yagiranye n’itangazamakuru kuri uyu wa Kabiri, yavuze ko yasanze uburenganzira bwe ku mibereho myiza bwubahirizwa, kimwe n’ubujyanye n’ubuzima kuko igihe cyose yabaga afite ikibazo kijyanye n’ubuzima yajyanwaga kwa muganga, agahabwa ubuvuzi akeneye kandi arindwa no kwandura COVID-19.

Mukasine yavuze ko bakoreye Rusesabagina ubuvugizi, kandi nta gushidikanya ko ibyo basabye bizashyirwa mu bikorwa.

Ati “Ububasha komisiyo ihabwa n’Itegeko Nshinga ry’u Rwanda n’ingero z’ibyo twakoze mu myaka ishize, bituma tudashidikanya ko ibyo twasabiye Rusesabagina azabihabwa.”

Iyi komisiyo ivuga ko ifatwa rya Rusesabagina, gukurikiranwa n’ubugenzacyaha, uburyo dosiye ye yashyikirijwe ubushinjacyaha, igihe ntarengwa cyo kuba yaregewe urukiko ndetse n’igihe ntarengwa cyo kuba urukiko rwamuburanishije kandi rugafata umwanzuro ku ifungwa n’ifungurwa ry’agateganyo, byose byubahirije amategeko.

Mukasine ati “Ntabwo twebwe dutangaza ibyo tudafitiye gihamya. Tuba twemerewe gufata amajwi n’amashusho ku buryo uwabishaka twabimuha.”

Rusesabagina yeretswe itangazamakuru ku wa 31 Kanama 2020, ku wa 14 Nzeri agezwa imbere y’urukiko amenyeshwa ibyaha 13 akekwaho birimo iby’iterabwoba.

Nyuma y’iminsi itatu, Urukiko rw’Ibanze rwa Kicukiro rwemeje ko afungwa iminsi 30 y’agateganyo mu gihe iperereza rigikomeje ku byo ashinjwa, umwanzuro yahise ajuririra.

Urukiko ruherutse kwemeza ko Paul Rusesabagina afungwa iminsi 30 y'agateganyo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .