Rutsiro: Batandatu bafunzwe nyuma yo kugaragara mu mashusho bakubita ukekwaho ubujura

Yanditswe na Mukwaya Olivier
Kuya 14 Nzeri 2020 saa 05:00
Yasuwe :
0 0

Abaturage batandatu bo mu Karere ka Rutsiro mu Ntara y’Uburengerazuba batawe muri yombi bazira kwihanira nyuma yo kugaragara mu mashusho barimo gukubita umuntu bakekagaho ubujura.

Aya mashusho yagaragaye ku mbuga nkoranyambaga mu gitondo cyo kuri uyu wa Mbere, tariki ya 14 Nzeri 2020 yagaragazaga aba baturage bafashe uwo bakekaho kubiba no gupfumura inzu zabo barimo kumukubita bamuryamishije mu myanda yo mu kiraro cy’inka.

Ukekwaho ubujura yafatiwe mu Mudugudu wa Kaje, Akagari ka Ngoma, Umurenge wa Nyabirasi mu Karere ka Rutsiro mu ijoro ryo ku Cyumweru tariki ya 13 Nzeri 2020.

Akimara gufatwa yarakubiswe by’indengakamere, asabwa kwemera ko ari mu bari bamaze iminsi batobora inzu z’abaturage.

Umunyamabanga Nshingwabikorwa w’umusigire w’Umurenge wa Nyabirasi, Bagirinka Vestine, yemeje aya makuru avuga ko ababigizemo uruhare batangiye gutabwa muri yombi.

Yagize ati “Uriya muturage asanzwe ari igisambo, yiba, hari ahantu bagiye gupfumura inzu, bari bafite imfungunzo bacuze, inzu zimwe bazifunguye, izindi bakoresha udufuni bagakuramo amatafari bakinjira, aho babashije kugera mu nzu zigera muri eshanu. Abaturage batabaje baramufata baramukubita.’’

Yakomeje avuga ko “RIB imaze gufata abaturage batandatu bakurikiranyweho kwihanira, ubu bajyanywe kuri station ya RIB ya Kivumu.’’

Yasabye abaturage kurushaho kwicungira umutekano w’ibyabo, bagatangira amakuru ku gihe ndetse n’ababashije gufata igisambo bakagishikiriza inzego zibishinzwe bakareka kwihanira.

Mu Ntara y’Uburengerazuba, ku wa 27 Werurwe 2020, Polisi y’u Rwanda ikorera mu Karere ka Rubavu nabwo yataye muri yombi babiri mu bakekwaho gukubita uwitwa Niyonzima Salomon w’imyaka 27 y’amavuko, bikekwa ko yari yibye igitoki, nyuma yo gukubitwa byaramuviriyemo urupfu nyuma y’iminsi ibiri.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .