Senateri Uwera yagizwe Umuvugizi mushya w’Ihuriro ry’Imitwe ya Politike mu Rwanda

Yanditswe na Uwimana Abraham
Kuya 24 Nzeri 2020 saa 03:46
Yasuwe :
0 0

Senateri Uwera Pélagie yagizwe Umuvugizi w’Ihuriro ry’Igihugu Nyunguranabitekerezo ry’Imitwe ya Politike yemewe mu Rwanda asimbuye Munyangeyo Théogene naho Ndahayo Jean Berchmas agirwa Umuvugizi Wungirije.

Kuri uyu wa 24 Nzeri mu Nama Rusange y’Ihuriro ry’Igihugu Nyunguranabitekerezo ry’Imitwe ya Politike yemewe mu Rwanda, nibwo hashyizweho abagize Biro y’ihuriro.

Aba bombi bemejwe n’inteko rusange nta yandi matora abayeho kuko buri wese ku mwanya we ntawe bari bahanganye.

Uwera ukomoka mu Ishyaka rya PSD ni umunyarwandakazi w’imyaka 45 afite umugabo n’abana bane, afite impamyabumenyi y’icyiciro cya gatatu cya kaminuza mu iterambere rusange. Uyu mugore ubu ari muri Sena kuva mu 2019.

Ari muri Komisiyo ya Politike n’Imiyoborere Myiza, muri Komite Ishinzwe Imyitwarire muri Sena ndetse yakoze muri komisiyo y’amatora igihe kinini. Yabaye kandi umwarimu n’umushakashatsi mu gihe muri PSD ari muri komite ishinzwe imyitwarire.

Ndahayo Jean Berichmas wagizwe Umuvugizi Wungirije ni uwo mu ishyaka rya PPC, afite imyaka 50 n’umugore n’abana batandatu.

Afite impamyabumenyi y’icyiciro cya kabiri cya Kaminuza mu bukungu n’icungamutungo, ubu ari kwiga icyiciro cya gatatu cya kaminuza mu by’Ubucuruzi.

Ni Umucungamari Mukuru wa PPC, yabaye Perezida wa Gacaca mu yahoze ari Komine Bukamba, umurezi mu mashuri atandukanye yo muri Kigali yigisha ibijyanye n’icungamutungo. Yakoze muri Banki y’Abaturage, yabaye ushinzwe ubucuruzi muri Sonarwa n’ibindi.

Uwera watorewe kuba Umuvugizi w’Ihuriro yavuze ko bashimira abo basimbuye ku bw’ibyo bakoze ndetse yijeje abanyamuryango babagiriye icyizere ko bazakorana umurava bagakomeza intego ihuriro rifite.

Ati “Intego y’ihuriro ni ukwisanzura kw’imitwe ya politike yemewe mu Rwanda ibi tukaba tuzakomeza kubiharanira, tuzahuriza hamwe ibitekerezo byubaka igihugu bivuye mu mitwe ya politike kugira ngo dukomeze kubaka.”

Uwera na Ndahayo bagiye kuri iyi myanya basimbuye Munyangeyo Théogene wo mu ishyaka rya PL wari Umuvugizi ndetse na Musanabaganwa Eugenie wo muri PSP wari umuvugizi wungirije.

Aba bombi bakaba bafite manda y’amezi atandatu nk’uko amategeko y’Ihuriro abiteganya.

Senateri Uwera Pélagie na Ndahayo Jean Berchmas bagizwe abavugizi b’Ihuriro ry’Igihugu Nyunguranabitekerezo ry’Imitwe ya Politike
Uwera Pélagie yabaye Umusenateri mu 2019

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .