U Rwanda rwagiranye ibiganiro by’ubucuruzi n’imwe muri leta zigize Leta Zunze Ubumwe bw’Abarabu

Yanditswe na Ndahayo Emmanuel
Kuya 12 Ukwakira 2020 saa 09:29
Yasuwe :
0 0

Ambasaderi w’u Rwanda muri Leta Zunze Ubumwe z’Abarabu (UAE), Emmanuel Hategeka, yagiranye ibiganiro na Mohamed Ali Musabbeh Al Nuaimi, Umuyobozi Mukuru w’Urwego rushinzwe Ubucuruzi n’Inganda muri Leta ya Ras Al Khaimah (RAK), imwe muri Leta zirindwi zigize Ubwami bwa Leta Zunze Ubumwe z’Abarabu (UAE).

Ni ibiganiro byagarutse ku buryo bwo guteza imbere ubufatanye hagati y’impande zombi, by’umwihariko hakitabwa ku bucuruzi ndetse n’inganda.

RAK imaze gutera imbere cyane ku rwego mpuzamahanga cyane mu bijyanye n’inganda, dore ko ifite inganda zirenga 6 000, n’ubwo idatuwe cyane. Ku rundi ruhande, u Rwanda ni igihugu kiri gutera imbere cyane kandi gifite umutungo kamere uhagije, ukongeraho ubuyobozi bwiza n’ibikorwa remezo byiyongera ubutitsa, bituma ruba igihugu cyiza cyo gukoreramo ishoramari.

Amb. Hategeka yavuze ko inganda zo mu Rwanda ziteguye gufatanya n’izo muri leta ya RAK, mu guteza imbere ikorwa ry’ibirimo ubukorikori ndetse na sima, dore ko ari bimwe mu bintu izo nganda zizobereyemo cyane.

Uyu muyobozi kandi yashimangiye ko u Rwanda ari igihugu gihagaze neza ku bijyanye no korohereza ishoramari rivuye hanze, kuko cyashyizeho ingamba ndetse n’amategeko agamije korohereza abashoboramari gutangira no gukorera ibikorwa byabo mu Rwanda, dore ko igihugu kinafite imibare ikenerwa mu ngeri zitandukanye kugira ngo iyobore igenamigambi ry’abashoramari.

Al Nuaimi nawe yavuze ko u Rwanda ari igihugu kiri gutera imbere cyane kandi gifite amahirwe akomeye bitewe n’aho giherereye, ku buryo gishobora kuba amarembo ya Afurika mu gihe kiri imbere.

Uyu muyobozi kandi yijeje Ambasade y’u Rwanda muri Leta Zunze za Abarabu ko Urwego ayoboye, ruzakomeza gukorana bya hafi n’u Rwanda hagamijwe guteza imbere imikoranire hagati y’ibihugu byombi.

Ubufatanye mu by’ubucuruzi hagati y’u Rwanda na UAE bumaze gushinga imizi, kuko mu mwaka wa 2018, u Rwanda rwohereje muri UAE ibicuruzwa bifite agaciro ka miliyoni 280$ (arenga miliyari 275 Frw) bivuye kuri miliyoni 237$ (arenga miliyari 231 Frw) muri 2017.

Ku rundi ruhande, u Rwanda rwari rwatumije ibicuruzwa bifite agaciro ka miliyoni 166.4$ (miliyari 162 Frw) bivuye kuri miliyoni 23$ (arenga miliyari 22 Frw) mu mwaka wari wabanje.

Umwaka ushize kandi nabwo UAE yari yohereje intumwa 18 zayo mu Rwanda kugira ngo ziganire na bagenzi babo b’abanyarwanda ku buryo bashobora gukorana bagateza imbere ishoramari hagati y’ibihugu byombi.

Ubutwererane hagati y’u Rwanda na UAE kandi bwagizwemo uruhare rukomeye n’Ikigo nyarwanda cy’Indege, RwandAir, gikorera ingendo eshatu mu cyumweru i Dubai, indi leta igize UAE.

Amb. Emmanuel Hategeka yagiranye ibiganiro na Mohamed Ali Musabbeh Al Nuaimi, Umuyobozi Mukuru w’Urwego rushinzwe Ubucuruzi n’Inganda muri Leta ya Ras Al Khaimah (RAK)

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .