00:00:00 IGIHE NETWORK KN KINYARWANDA EN ENGLISH FR FRANCAIS

Ibyihebe biracyasaza imigeri, ubucuruzi i Palma, uruganda rwa Gaz…Ubuzima bushya bw’i Cabo Delgado

Yanditswe na Ishimwe Israel
Kuya 11 Mutarama 2022 saa 07:19
Yasuwe :

Mu 2017 nibwo Umutwe w’Iterabwoba wa Jamaat Ansar al-Sunnah [Al-Shabaab] wongereye ubukana mu kugaba ibitero mu Ntara ya Cabo Delgado iri mu Majyaruguru ya Mozambique.

Ibitero byinshi byerekejwe mu mijyi yo mu Turere dutandukanye turimo Palma, Macomia, Nagande, Muidube n’Ibirwa bya Vamuzi, Quefuque na Metundo.

Ahagana mu mpera za 2020 kugeza mu ntangiriro za 2021, uturere dutanu twari mu maboko y’ibyihebe. Icyo gihe byibasiraga abasivili, bikabica bibaciye imitwe ndetse bikanatwika sitasiyo za Polisi.

Imibare y’ibanze yerekana ko abaturage 3000 bambuwe ubuzima, abarenga ibihumbi 800 bavanwa mu byabo; ni nako ibikorwa byagutse by’iterambere, ubucuruzi n’ibindi byahagaze kubera umutekano muke.

Ibikorwa bya Jamaat Ansar al-Sunnah byo kwibasira inzirakarengane no gukorana na Islamic State [nyuma y’ibiganiro byo mu 2019] byatumye ku wa 10 Werurwe 2021, Amerika isohora itangazo rivuga ko washyizwe ku rutonde rw’imitwe y’iterabwoba ku Isi

Mozambique yari imaze kurengerwa n’ibikorwa by’iterabwoba, yiyambaje ibihugu bitandukanye ibisaba ubufasha bwa gisirikare, u Rwanda rubyumva vuba ruratabara.

Uruzinduko rudasanzwe rw’umunsi umwe Perezida wa Mozambique Filipe Jacinto Nyusi yagiriye i Kigali ni rwo washibutsemo ibyo byose.

Nyuma yo gusesengura ikibazo, muri Nyakanga 2021 u Rwanda rwohereje ingabo n’abapolisi 1000 muri Mozambique gufatanya n’ingabo z’icyo gihugu guhashya iterabwoba i Cabo Delgado.

Kuva tariki ya 10 Nyakanga 2021 kugeza ku wa 10 Mutarama 2022, amezi atandatu arashize, Ingabo z’u Rwanda [RDF] na Polisi y’igihugu binjiye mu rugamba rwo gutsintsura ibyihebe byabujije amahwemo abo muri Cabo Delgado.

Nyuma y’amezi abiri gusa yo gucana umuriro ku byihebe, byageze mu ntangiriro za Nzeri 2021 uduce hafi ya twose byari byarigaruriye turi mu maboko y’ingabo za Leta.

Hatangiye icyiciro cyo kubihiga mu bice byahungiyemo mu mashyamba no gusubiza mu byabo abaturage bari barabujijwe amahwemo, babayemo mu buzima bw’impunzi.

-  Inzego z’umutekano muri Mozambique zakiriwe i Kigali, paji nshya mu guhashya iterabwoba

Ku wa 8-10 Mutarama 2022, itsinda ryavuye muri Mozambique riyobowe n’Umugaba Mukuru w’Ingabo, Admiral Joacquim Rivas Mangrasse ryasuye u Rwanda, ryakirwa na bagenzi babo.

Uru rugendo rwibanze ku biganiro bireba intambwe imaze guterwa mu kurwanya iterabwoba muri Cabo Delgado. Rwasojwe hasinywa amasezerano ahuriweho n’ibihugu byombi mu kwagura ubufatanye mu bya gisirikare birimo no gutoza Ingabo za Mozambique no kongera imbaraga mu kurandura ibisigisigi by’iterabwoba.

Umugaba Mukuru w’Ingabo za Mozambique, Admiral Joaquim Mangrasse, ubwo yakirwaga na mugenzi we w’u Rwanda, Gen Jean Bosco Kazura ku wa 9 Mutarama 2022, yashimye umuhate wa RDF mu kugarura amahoro mu gihugu cye.

Yakomeje ati “Twaganiriye ku byakozwe n’ibitegerejwe mu bihe biri imbere. Turifuza kandi kugaragaza ubwitange bw’ingabo z’u Rwanda mu guhashya iterabwoba mu gihugu cyacu. Ibi bigaragarira mu buryo abaturage bacu batangiye kwiyubaka kandi bari gusubiza mu buzima busanzwe.’’

Umugaba Mukuru w’Ingabo z’u Rwanda, Gen. Jean Bosco Kazura, we yavuze ko bashimishijwe no kuganira na bagenzi babo muri Mozambique no gutekereza ku cyerekezo gishya cy’urugamba rwo muri Cabo Delgado.

Yagize ati “Ni ibyishimo kubona twongeye kubakirira muri iki cyumba aho mu mezi nk’aya mu mpera z’umwaka ushize twicaye tugategura urugamba rwo guhashya iriya mitwe. Twishimiye kuba ariho twicaye tuvuga ko twageze kuri byinshi muri uru rugamba no kuganira ku byo twakomeza gufatanya.’’

Yasobanuye ko “Hari byinshi tumaze kugeraho kubera ubufatanye bwacu ndetse uyu munsi ni andi mahirwe yo kubireba n’ibyo duteganya gukora byinshi twageraho.’’

Uretse abagaba bakuru b’ingabo, ibiganiro byanitabiriwe n’abayobozi ba Polisi barimo Bernardo Raphael uyobora iya Mozambique na mugenzi we w’u Rwanda, CGP Dan Munyuza.

Umugaba Mukuru w’Ingabo z’u Rwanda, Gen Jean Bosco Kazura na mugenzi we wa Mozambique, Admiral [General] Joaquim Mangrasse mu biganiro byagarutse ku kurushaho kugarura amahoro muri Cabo Delgado

Nta hantu cyangwa igihe imyitozo izatangirira gutangwa mu kubaka ubushobozi bw’Ingabo za Mozambique hatangajwe.

Umwe mu bakurikiranira hafi iby’umutekano muri aka gace yavuze ko “nubwo bimeze bityo ariko ikigiye gukurikiraho ni amahugurwa azatangwa ku ngabo za Mozambique.’’

Ati “Bazahitamo ahantu bizakorerwa ariko ntibirashyirwa mu bikorwa. Ntabwo amasezerano yari gusinywa urugamba rurimbanyije.’’

-  Ubuzima bwaragarutse mu duce tumwe, ahandi urugamba rurarimbanyije

Kugeza muri Nzeri 2021, ibice byinshi byari bimaze kubohozwa mu maboko y’ibyihebe. Icyo gihe hashyizwe imbaraga mu gusubiza abaturage mu byabo nyuma y’igihe bari mu nkambi z’impunzi.

Uduce twabohowe turimo Afungi, Palma, Quelimane, Njama na Primario de Mao na Umujyi wa Mocimboa da Praia yafashwe ku wa 8 Kanama 2021.

Nko muri Mocimboa da Praia, Umujyi wafatwaga nk’ibirindiro bikomeye by’ibyihebe, ubu waratunganyijwe utangira kugarura isura yawo.

IGIHE yamenye ko hari sosiyete yoherejwe gukora isuku kugira ngo umujyi uzacyurwemo abaturage umaze kumera neza, usukuye.

Uwaduhaye amakuru yagize ati “Uhageze ubona ko hahindutse, amatara araka, amazi arahari, amatiyo yashyizwemo amazi. Usibye ko inzu z’abaturage zatwitswe, izindi zigasenywa, hagiye kubaho kuzisana ku buryo mu kwezi gutaha bazataha bafite aho bikinga.’’

Muri aka gace kandi ibikorwaremezo bitandukanye birimo n’ibya sosiyete z’itumanaho byari byarangijwe ku buryo kuvugana no guhana amakuru byari insobe.

Ubu bigenda byoroha ndetse n’abasirikare bari ku irasaniro bashobora kuganira n’imiryango yabo.

Usibye uyu mujyi no muri Palma na ho hari sosiyete ishinzwe kuyirikiranira hafi. Kimwe na Mocimboa da Praia, uhageze ubona ko ubuzima bugana aheza.

Abahatuye bararyama bagasinzira badashikagurika bikanga ibitero by’ibyihebe byari bihafite ibirindiro. Bamwe muri bo batangiye kwiyubaka, bagura imodoka nshya bifashisha mu bucuruzi n’ubundi bushabitsi.

-  Umushinga w’Abafaransa wongeye gukora

Mozambique ni igihugu gikungahaye ku mutungo kamere. Nka Cabo Delgado ifite gaz nyinshi ku buryo Sosiyete TotalEnergies y’Abafaransa yahashoye asaga miliyari 20$ [ashobora kwiyongera akagera kuri miliyari 50$] mu mushinga wiswe LNG, Liquefied Natural Gas.

RDF yageze muri Mozambique, iyi sosiyete ifite abakozi mbarwa ariko ubu bose hamwe barenga 100 barimo abanyamahanga 70. Aba bose bari basubiye iwabo kubera ikibazo cy’umutekano muke.

Uwaganiriye na IGIHE yavuze ko n’ubu akazi gakorwa nubwo bitaragera ku rwego nk’urwo byariho mbere.

Ati “Abafaransa bafite umushinga wo gutunganya gaz, hari gahunda ko uruganda ruzatangira gukora muri Werurwe uyu mwaka.’’

-  Ibyihebe biracyasaza imigeri, amaherezo ni ayahe?

Ibyihebe bimaze gukurwa muri utu duce, byahise bikwira imishwaro bigana mu gace ka Mbau no mu twa Siri 1 na Siri 2; ni ho byihishe nyuma yo gutatanira mu Turere twa Muidube na Macomia.

Rimwe na rimwe birisuganya, bigatera ingabo z’Umuryango w’Ibihugu bya Afurika y’Amajyepfo, SADC cyangwa bikagaba udutero shuma ku z’u Rwanda.

Mu mpera z’umwaka ushize, ku wa 20 Ukuboza 2021, abasirikare bane ba SADC barishwe. Icyo gihe ibyihebe byazinyaze ibikoresho na zo zirarakara zitangira kubarasaho urufaya rw’amasasu.

Byahise byambuka Umugezi wa Messalo uri ku rugabano rw’aho izi ngabo zigenzura muri Macomia na Muidumbe; bisakirana na RDF bakozanyaho, ibicamo barindwi ku wa 26 Ukuboza 2021.

Iyi mirambo ni iyabaruwe mu yasizwe mu nzira; akenshi usanga bagenzi babo bagerageza kubarwanaho bakabatwara bakabatwika cyangwa bakajugunya imibiri mu Nyanja.

Mu mirwano itandukanye, hari aho ibyihebe bifatwa mpiri bigahabwa Leta ya Mozambique, ikagena aho ibashyira. Muri bo hari abamaze gusubizwa mu buzima busanzwe.

Urugamba rwo guhashya iterabwoba ntirupfa kurangira ahanini kuko ibyihebe bidapfa kuva ku izima kuko biba byarashyizwemo ingengabitekerezo nyinshi ariko iyo biciwe intege, bikananizwa bishobora kwimukira ahandi.

Abasesengura iby’umutekano berekana ko bisaba kuba maso kuko iyo bitsinzwe ku mbunda bijya mu gutera ibyuma, bikiturikirizaho ibisasu n’ibindi bikorwa bitandukanye.

Abayobozi bakuru b’Ingabo na Polisi by’u Rwanda bakiriye bagenzi babo bo muri Mozambique bagirana ibiganiro bigamije guhashya iterabwoba mu Ntara ya Cabo Delgado
Ku wa 9 Nyakanga 2021, Ingabo n'Abapolisi b'u Rwanda 1000 bagiye gufasha Mozambique guhangana n'imitwe y'iterabwoba
Ingabo n'abapolisi b'u Rwanda boherejwe muri Mozambique bahise bashyikira ku Kibuga cy'Indege cya Nacala. Aha ni ho ziva zijya ku rugamba mu bice bitandukanye mu Ntara ya Cabo Delgado
Ku Cyambu cya Afungi, Ingabo z'u Rwanda ziba zigenzura amazi no hakurya ku butaka umunota ku wundi
Ibitaro Bikuru byo muri Palma byaratwitswe ibintu byose birangirika. Iyo winjiyemo imbere, ubonamo na za serumu zahiye ku buryo bishoboka ko hari n'abarwayi bapfiriyemo. Agace ibitaro birimo kamaze kubohorwa
Ibitero by'imitwe y'iterabwoba byibasiye Palma byatumye Abafaransa bari barashoye miliyari 20 z'amadolari hafi ahitwa Afungi bazinga utwangushye baritahira. Nyuma yo kukirukamo ibyihebe ubu imirimo yarakomeje
Polisi n'Ingabo z'u Rwanda bakomeje gucunga umutekano muri aka gace nyuma yo kukirukanamo abarwanyi
Aka gace kazwi nka Afungi kamaze gutekana ku buryo byitezwe ko mu minsi iri imbere uruganda rutunganya gaz ruzasubukura imirimo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .