Uko itangazamakuru ryabujijwe gutangaza inkuru ku bujura bwa René Mugenzi kubera ikinyoma yakwije

Yanditswe na IGIHE
Kuya 24 Ukwakira 2020 saa 03:04
Yasuwe :
0 0

Kugeza ku wa Gatanu w’iki Cyumweru, kwandika inkuru kuri René Mugenzi, Umunyarwanda ufite ubwenegihugu bw’u Bwongereza, wahamijwe icyaha cyo kwiba miliyoni zisaga 279 Frw z’amaturo ya Cathédrale ya Mutagatifu Batisita, byari ikizira ku banyamakuru ku buryo byashoboraga gutuma ubirenzeho afungwa.

Mugenzi yakatiwe igifungo cy’imyaka ibiri n’amezi abiri azira kwiba ama-pound ibihumbi 220 ya Cathédrale yitiriwe Mutagatifu Batisita. Yemereye urukiko ko hagati ya Werurwe 2016 na Gicurasi 2018 yakuye ayo mafaranga kuri konti y’iyi kiliziya yari yaramwizeye ikamuha akazi k’umubitsi.

Ayo mafaranga nta kintu gihambaye yayakoresheje, ahubwo yayashoye mu mikino y’urusimbi nk’ibintu byari byaramubase. Abunganizi be babwiye urukiko ko uyu mugabo w’imyaka 44 yari afite ibibazo byo mu mutwe ku buryo urusimbi yarufataga nk’ikiyobyabwenge kuri we.

Kuva muri Nyakanga nibwo iki kirego cyagiye mu rukiko gusa itangazamakuru ritegekwa kuruca rikarukamira. Ubusanzwe gutangaza inkuru ku bivugirwa mu rukiko, ni ingingo itajya igibwaho impaka ndetse abanyamakuru baba bemerewe kubikora gusa kuri iyi nshuro si ko byari byagenze.

Abunganizi be bamaze igihe cy’amezi atatu bashaka ko amakuru ajyanye n’ibyo ashinjwa atajya hanze. Ku ikubiro, Mugenzi yitabye urukiko bwa mbere ku wa 15 Nyakanga, atangira kuburanishwa n’urukiko rw’ibanze rwo mu Mujyi wa Norwich.

Abanyamakuru babanje gutinya kwandika kuri Mugenzii

Akimara kwemerera umucamanza ko koko yibye ayo mafaranga, umwunganizi we mu mategeko, David Foulkes, yahise asaba umucamanza ko yabuza itangazamakuru kwandika mu binyamakuru ikintu icyo aricyo cyose kijyanye n’izina rya Mugenzi.

Yavuze ko impamvu ari uko umukiliya we atewe ubwoba na Guverinoma y’u Rwanda, kuko ngo atavuga rumwe nayo.

Iki kinyoma cya Mugenzi cyakwiriye mu 2011, icyo gihe yatekeye umutwe Polisi y’u Bwongereza avuga ko afite ubwoba ko hari abantu bashobora kumugirira nabi bamwoherejweho n’u Rwanda.

Icyo gihe inzego z’iperereza z’u Bwongereza zirimo na MI5 kimwe na Polisi y’Igihugu zinjiye muri iyi dosiye, zikora iperereza ndetse n’abo byavugwaga ko bashobora kugirira nabi uyu mugabo bahamagazwa na Polisi, barabazwa nyuma bararekurwa nyuma y’uko habuze ikimenyetso na kimwe cy’uko u Rwanda rwaba ruri mu mugambi wo kugirira nabi uyu mugabo.

Icyo gihe Mugenzi yabujijwe gutunga imbunda yari kuzajya yifashisha mu burinzi gusa agirwa inama yo gushyira mu rugo rwe intabaza yakwifashisha mu gihe yaba agize ikibazo. Imyaka icyenda irashize ari amahoro, ariko icyo kinyoma yakwije yakomeje kukirisha.

Abunganizi be babwiye urukiko ko mu gihe izina rye ryaba ryanditswe mu binyamakuru, bishobora gutuma ubuzima bwe bujya mu kaga kuko aho abarizwa hamenyekana kandi yari asanzwe abayeho yihisha kubera ubwoba bwo kugirirwa nabi.

Abanyamakuru bakomeje kubwira urukiko ko bagomba kwandika kuri uyu mugabo nk’uko bandika ku bandi baba bari mu nkiko mu gihe ari umuntu mukuru ukekwaho icyaha.

Gusa umucamanza yumvise ibyavuzwe n’abunganizi be kugeza ubwo ikirego kigiriye mu rundi rukiko rwa Norwich Crown Court ari narwo rwaje kumukatira igifungo cy’imyaka ibiri n’amezi abiri.

Mbere y’uyu wa Gatanu, abanyamakuru bari bararuciye bararumira, kuko batinyaga ko bashobora gufungwa mu gihe baba barenze ku byavuzwe n’umucamanza. Impamvu ni uko umucamanza yari yababwiye ko izina rye ritagomba kujya ku karubanda mu gutinya ko ashobora kugirirwa nabi.

Abanyamakuru baje kuvumbura ko Mugenzi abeshya

Abanyamakuru baje kuvumbura nyuma ko ibyavuzwe n’umucamanza nabyo bibogamye cyane. Baje gushakisha kuri internet, babona ko akoresha imbuga nkoranyambaga, kandi ko atari umuntu wihisha kuko ashyiraho n’amafoto akagaragaza ko aherereye mu Bwongereza, ibintu bihabanye n’ibyo urukiko rwavugaga ko ashobora kugirirwa nabi hagize umenya aho aherereye, mu gihe we ahubwo aho aba hazwi kandi ariwe uhashyira ku karubanda.

Muri ubwo bucukumbizi, abanyamakuru batari bazi neza ibye, baje no kubona ko mu 2015 yigeze gushaka kwiyamamariza kuba Umudepite.

Bahisemo kwandikira umucamanza mu rukiko rw’ibanze rwa Norwich bamusaba gutesha agaciro icyemezo yari yarafashe bwa mbere kuko amakuru yashingiyeho adafite ishingiro. Urukiko rwarabyanze, ruvuga ikirego kiri mu rukiko rwa Norwich Crown Court ko arirwo ruzafata umwanzuro.

Urw’ibanze rwavuze ko mu gihe Mugenzi azaba akatiwe igifungo, icyemezo cyo kubuza ibinyamakuru kwandika kuri we kizaba gitaye agaciro, bivuze ko abunganizi be byabasabaga kongera gusaba bundi bushya ko atakwandikwaho inkuru n’imwe.

Muri Nzeri ubwo ikirego cyajyanwaga mu rukiko rwa Norwich Crown Court, nabwo umucamanza yavuze ko adafite ububasha bwo kuba yakuraho icyemezo cyafashwe cyo kwandika kuri uyu mugabo.

Icyo gihe umwanzuro wo gukatira Mugenzi warasubitswe ushyirwa mu Ukwakira. Muri uko gusubikwa, abunganizi be bahise bongera basaba urukiko ko icyemezo cyo kutamwandikaho inkuru gikomeza gushyirwaho.

Gusa Inzego z’Ubushinjacyaha zahise zisubiza ziri ku ruhande rw’abanyamakuru zivuga ko izina rye rikwiye kwandikaho. Ku rundi ruhande, abanyamakuru nabo bamenyesheje urukiko ko Mugenzi ubwe yashyize hanze umwirondo we wose ku mbuga nkoranyambaga.

Berekanye ibyo yandikaga kuri Twitter agaragaza n’amerekezo arimo rimwe na rimwe, amafoto ye yagiye ashyira kuri Facebook ari mu isiganwa rya Run Norwich ryabaye umwaka ushize ndetse n’ibiri kuri LinkedIn bigaragaza aho yakoze kuva mu 2011 harimo no muri Kaminuza ya East Anglia.

Ibi byose nta na kimwe cyigeze kirebwaho, ku buryo wavuga ko umuntu ari guhigwa hanyuma ubuzima bwe bukaba buri mu kaga ku buryo aho atuye hakwiye kugirwa ibanga.

Ku wa 16 Ukwakira ubwo abanyamakuru basubiraga mu rukiko, umucamanza Moore yumvise impande zombi atesha agaciro ubusabe bw’abunganizi be.

Yavuze ko ihame ry’uko ubutabera butangirwa mu ruhame rikwiye kubahirizwa, ndetse ko kuvuga ko Mugenzi afite ubwoba ku buzima bwe nta kintu na kimwe kibigaragara ndetse ko nta bimenyetso byabyo afite.

Umucamanza yashimye abanyamakuru ku bushishozi bwabaranze ari nabyo byatumye ku wa Gatanu w’iki Cyumweru umwanzuro umaze gutangazwa, itangazamakuru ryandika ko Mugenzi yafunzwe amezi 27.

Mugenzi yabeshye ko ahigwa kugira ngo itangazamakuru ritamwandikaho ko akurikiranyweho ubujura ariko birangira urukiko ruvumbuye ko ibyo yavugaga cyari ikinyoma cyambaye ubusa
Ubwo yitabaga urukiko, byabaye ngombwa ko yikinga umutaka ahunga amaso y'abanyamakuru
Cathedrale St John the Baptist, aho Mugenzi yibye amafaranga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .