Uko ubutasi bwa Habyarimana bwasuzuguye Inkotanyi, bagatungurwa n’igitero cyazo

Yanditswe na Karirima A. Ngarambe, Ndahayo Emmanuel
Kuya 3 Ukwakira 2020 saa 10:45
Yasuwe :
0 0

Ku itariki ya mbere Ukwakira mu 1990, ingabo zari iza FPR-Inkotanyi zagabye igitero ku Rwanda nyuma y’imyaka myinshi Abatutsi bari barahejwe hanze y’igihugu bashaka gutaha ariko bakangirwa na Repubulika ya mbeye n’iya kabiri.

Ni igitero cyabimburiye urugamba rw’imyaka ine yose, rwasojwe ku wa 4 Nyakanga 1994 rutsinzwe n’ingabo za FPR-Inkotanyi zihagarika Jenoside yakorewe Abatutsi.

Mu bihe urugamba rwahwihwiswaga, abakoraga mu nzego z’ubutasi bwa leta ya Juvenal Habyarimana ntibatekerezaga ko ingabo za FPR-Inkotanyi zaba zifite ubushobozi bwo gutera u Rwanda, ‘n’ubwo bumvaga amakuru y’uko izo ngabo zirimo gutegura ibitero ku Rwanda’.

Mu kiganiro cyihariye na IGIHE, Albert Rukerantare wahoze mu nzego z’ubutasi z’u Rwanda mu gihe cya leta ya Habyarimana, yasobanuye uburyo igitero cy’Inkotanyi cyabatunguye ndetse kigahindisha umushyitsi ingabo za leta, dore ko cyanasanze zititeguye guhangana n’Inkotanyi.

Rukerantare avuga ko bari bazi ko Inkotanyi zishobora kuzagaba igitero, kuko bakurikiranaga amakuru yazo, gusa avuga ko batari bazi neza igihe kizabera.

Yagize ati “ku ruhande rumwe ntabwo twatunguwe, kuko ni amakuru twakurikiranaga umunsi ku wundi, tuzi neza ko hari ibitegurwa, nubwo ntahamya neza ko uwo munsi wo ku itariki ya mbere Ukwakira twari tuwuzi, ariko ni ibintu twari tuzi ko bishoboka”.

Mu gitondo cyo ku munsi w’igitero, ubwo Rukerantare yageraga ku kazi ke bisanzwe, nibwo yatangiye kumva amakuru y’uko Inkotanyi zateye u Rwanda, gusa ngo icyo gihe ntibari bafite amakuru yimbitse, arimo umubare w’abateye n’ibikoresho bitwaje.

Uku kutagira amakuru kw’inzego z’iperereza ubundi zakabaye ziyafite, nibyo byateye ubwoba abakoraga mu nzego zo hejuru, yaba mu Biro bya Perezida, ingabo nkuru n’abakora mu nzego z’iperereza zarebererwaga n’Ibiro by’Umukuru w’Igihugu, ndetse bikanakorera hamwe.

Ahagana ku gicamunsi, ubwo amakuru yari amaze kuba imvaho, Rukerantare avuga ko “harimo ikintu cy’icyoba kuko mu by’ukuri n’ubwo amakuru twari tuyafite, ntekereza ko tutigeze tuyaha uburemere yari akwiriye”.

Impamvu ngo ni uko n’ubundi Abanyarwanda babaga hanze bagiye batera ibitero mu Rwanda kuva muri za 1960, ariko icyo ighe cyose ingabo za leta zikabakumira.

Rukerantare akavuga ko “abayobozi bibwiraga ko n’igitero cy’Inkotanyi nikiramuka kije, nacyo tuzagikoma imbere mu buryo bworoshye, ariko si ko byagenze kuko ku musozo w’intambara, leta yariho yaraguye, Inkotanyi zifata ubutegetsi”.

Ku mugoroba w’umunsi igitero cya FPR-Inkotanyi cyatangiriyeho, nibwo bamwe mu basirikari bakuru bariho icyo gihe bakoze inama y’igitaraganya igamije kurebera hamwe uko leta yagombaga kuzitwara muri ibyo bihe by’intambara.

Ni inama yitabiriwe na Col. Ndindiriyimana, Col. Rusatira, Col. Bagosora, ndetse n’abandi barimo Rwagafirita. Ni inama yabaye Perezida Habyarimana adahari, kuko yari mu Nama Rusange y’Umuryango w’Abibumbye yabereye i New York muri Leta Zunze Ubumwe za Amerika.

Nyuma y’iyo nama y’abasirikari bakuru, Rukerantare avuga ko “abo basirikari basaga nk’ababuze amajyo, bisa nk’aho nta murongo ufatika uhari w’cyo gukora”.

Nyuma y’iyo kandi, icyemezo kihutirwa cyafashwe ni icyo kohereza inzego z’iperereza mu gice cya Gabiro, aho urugamba rwari rurimbanyije. Icyo gihe, Munyemana Athanase wari Umukuru w’Iperereza ry’imbere mu gihugu, yasabye Rukerantare “gushaka imodoka zikomeye zitatenguha abantu maze akazindukira i Gabiro kujya gutara amakuru y’urugamba”.

Amakuru Rukerantare wari ukiri umusore yavanye ku rugamba, yamukuye umutima “kuko amakuru yavugwaga, yari uko Inkotanyi zifite ingufu, hari n’abavugaga ngo izidafite imbunda ziri kuvuza amadebe, abasirikari b’u Rwanda bakiruka”.

Aba basirikari ngo ‘baje gukamirika nyuma y’uko batewe ingabo mu bitugu n’ingabo zaturutse muri Congo Kinshasa (Zaire y’icyo gihe) n’u Bufaransa’. Ibyo ngo byatumye “ka morali gatangira kugaruka, twumva ko [inkotanyi] bazikumiriye”.

Aka kanyabugabo ariko nta cyo kagezeho, kuko n’ubundi urugamba rwasojwe rutsinzwe n’Inkotanyi, zigahagarika Jenoside ndetse zikanatangira kubaka ubumwe bw’Abanyarwanda, bwahereweho bwubakirwaho umusingi w’iterambere igihugu gifite uyu munsi.

Kurikira ikiganirira kirambuye twagiranye na Albert Rukerantare

Igitero cy'Inkotanyi cyasanze ingabo za Habyarimana zititeguye urugamba
Rukerantare yavuze ko batumvaga uburyo Inkotanyi zagaba igitero ku Rwanda ngo zitsinde
Albert Rukerantare mu kiganiro n'umunyamakuru Karirima Ngarambe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .