Umuti ukwiye kuvugutirwa ibibazo by’imicungire mibi y’imari ya Leta

Yanditswe na Uwimana Abraham
Kuya 21 Ukwakira 2020 saa 05:12
Yasuwe :
0 0

Uko umwaka w’ingengo y’imari utashye, ku meza ya Komisiyo y’Inteko Ishinga Amategeko Ishinzwe Gukurikirana Imikoreshereze n’Imicungire y’Imari ya Leta (PAC), haba hari Raporo y’Umugenzuzi Mukuru w’Imari ya Leta igaragaza imikoreshereze y’umutungo wa Leta mu bigo bitandukanye muri uwo mwaka.

Ibibazo by’imicungire mibi y’umutungo wa Leta bihora bigaruka, hagaragara amafaranga menshi yakoreshejwe nabi, atagaragarizwa gihamya y’uko yakoreshejwe, ibibazo mu itangwa ry’amasoko ya leta n’ibindi.

Igikurikiraho ni uko PAC itangira gutumiza abayobozi b’ibigo byagaragayemo imicungire mibi y’umutungo ikabaka ibisobobanuro, rimwe na rimwe hari ubwo ibirego bigezwe mu bugenzacyaha bugakurikirana abagaragaweho no gukoresha nabi umutungo wa leta.

Raporo iheruka y’Umugenzuzi Mukuru w’Imari ya Leta yagaragaje ko mu mwaka w’ingengo y’imari warangiye muri Kamena 2019, amafaranga yakoreshejwe nta nyandiko ziyasobanura, ayasesaguwe, ayasohotse nta burenganzira n’ayanyerejwe yageze kuri miliyari 8,6 Frw avuye kuri miliyari 5,6 Frw mu 2018.

Raporo y’umwaka wa 2018/2019 igaragaza ko amafaranga yakoreshejwe nta nyandiko ziyasobanura, ayasohotse inyandiko zidahagije, ayasesaguwe, ayasohotse nta burenganzira n’ayanyerejwe cyangwa yasohotse mu buriganya, yiyongereye ku kigero cya 51% ugereranyije n’umwaka ushize, bivuze ko yiyongereyeho hafi miliyari eshatu.

Iyi Raporo yahise ituma PAC itumiza abayobozi b’ibigo n’inzego bigera kuri 56, kugira ngo batange ibisobanuro mu magambo ku mikoreshereze idahwitse y’imari n’umutungo by’igihugu, yazigaragayeho.

Mu makosa yakunze kugaragara hari nk’amasoko yagiye atangwa ku giciro kiruta icyagenwe, gutinda kwishyura abahaye serivisi ibigo bya leta, imitungo idakoreshwa, amasezerano n’imishinga byatawe n’ibindi.

Muri iyi Raporo ikigo cyahawe amanota mabi kurusha ibindi ni Igishinzwe Amazi, Isuku n’Isukura, WASAC, kitigeze kibura kugarukwaho no muri raporo z’imyaka yashize.

Ibindi bigo byagaragayemo amakosa birimo NIRDA, UR, BDF, WDA, RSSB, uturere nka Huye, Nyamagabe, n’ibindi.

Mu ngero z’amakosa yagiye agaragazwa muri iyi raporo harimo nk’ikinyuranyo cy’amafaranga yarenze ku yateganywaga kiri hagati ya 23% yarenze ku giciro WASAC LTD yatangiyeho amasoko atandatu, yari afitiwe ingengo y’imari ya miliyari 26,6 Frw ariko atangwa kuri miliyari 32,9 Frw na 865% karenze ku masoko atatu Sena yatanze, yateganyirizwaga miliyoni 8,2 Frw ariko atangwa kuri miliyoni 79,3 Frw, bivuze ko habayemo ikinyuranyo cya miliyoni 71,1 Frw zarenzeho.

Mu zindi ngero harimo amasoko abiri yatanzwe n’Akarere ka Huye yateganyirizwaga 30.000.000 Frw ariko atangwa kuri 240.949.335 Frw bingana n’ikinyuranyo cya 703%, n’andi abiri yagombaga gutangwa n’Akarere ka Nyarugenge yateganyirijwe 324.264.147 Frw ariko aza gutangwa kuri 758.989.106, bingana n’ikinyuranyo cya 134%.

Hari kandi nk’ibigo bya leta byasanzwe bifite amakonti muri banki ariko adatangazwa mu bitabo by’imari by’ibigo. Igenzura ryerekanye konti 10 zitagaragazwa mu bitabo by’imari by’ikigo, zirimo iza NIRDA (2), UR (4), WASAC (1), Akarere ka Nyamagabe (1), Gakenke (VCT Janja) (1) na WDA (1).

Hari abajya bibaza uko bigenda nyuma y’uko iyi Raporo y’Umugenzuzi Mukuru w’Imari ya Leta isoshotse, ndetse abayobozi b’ibigo bimwe na bimwe bagatumizwa na PAC, hibazwa uko bigendekera ababuze ibisobanuro bihamye kw’ikoreshwa nabi ry’umutungo wa Leta.

Umushinjacyaha Mukuru, Aimable Havugiyaremye, yavuze ko iyo umugenzuzi mukuru w’imari ya leta amaze gusohora raporo na bo ayibagezaho bagasuzuma ibibazo aba yagaragajemo kandi bigakurikiranwa.

Yavuze ko ibibazo byose bigaragajwe muri raporo y’umugenzuzi w’imari ya leta byose atari ko biba bigize ibyaha. Gusa ngo mu myaka itanu ishize hakozwe byinshi mu gukurikirana abanyereza n’abakoresha nabi imari ya leta kandi hari impinduka zagiye zibaho nubwo bishoboka ko bidahagije.

Ati “Muri iyi myaka itanu ishize twakurikiye dosiye zigera kuri 928, abantu bahamwe mu nkiko n’ibyaha ni 1187, amafaranga yagarujwe bitegetswe n’inkiko ni miliyari 4 700 000 Frw, ihazabu yaciwe abo bantu bahamwe n’ibyaha ni 2 600 000 Frw”.

Gusa n’ubwo habaho guhamagazwa na PAC no gutanga ibisobanuro, rimwe na rimwe hakaba abakurwa mu nshingano n’abakurikiranwa n’ubushinjacyaha, biragaragara ko nta gisubizo kirambye bitanga bishingiye kuri Raporo y’Umugenzuzi Mukuru w’Imari ya Leta, hakaba hibazwa rero ahari icyuho ndetse n’icyakorwa.

Umugenzuzi Mukuru w’Imari ya Leta, Obadiah Biraro, buri mwaka akora raporo igaragaza uko umutungo n'imari bya leta byakoreshejwe

Ni he hari icyuho gituma ibi bibazo bihora byisubiramo?

Umugenzuzi Mukuru w’Imari ya Leta, Obadiah Biraro aganira na IGIHE yavuze ko ikibazo cy’imicungire n’imikoreshereze mibi y’imari ya Leta atari ikibazo cyihariwe n’u Rwanda gusa, ahubwo ko ari ikibazo kiri ku Isi yose.

Iyo bakora iyi Raporo basohora buri mwaka, ngo bareba uburyo amafaranga yakoreshejwe, niba bihura kandi bisobanutse neza mu nyandiko, ikindi bakareba niba icyari kigamijwe mu gukoresha ayo mafaranga cyaragezweho.

Yagize ati “Tureba niba icyo umutungo wari ugenewe gukora cyarakozwe, ikindi tukareba niba inyungu yarabonetse, inyungu ni iyihe? Ni uko umuturage abona ibyo agombwa. Tunareba niba urwego rugaragaza impinduka mu micungire n’imikoreshereze y’umutungo ruba rwahawe.”

Yongeyeho ati “Ikiba kigamijwe ni ukwerekana ahari ibibazo, tugasaba izo nzego bireba kubikosora, tunabaha inama z’uko byakosorwa.”

Ku byaba bituma ibi bibazo bikomeza kugaragara kandi ugasanga hari ibigo bihora bigaruka mu majwi n’ubwo biba byahawe ubujyanama, Biraro yavuze ko ahanini biterwa no kuba terera iyo abantu ntibabazwe ibigendanye n’inshingano zabo.

Yagize ati “Hari ikibazo cyo kuba nk’inkingi ya mbonabihita, umuntu akavuga ati n’ubundi ntawe uzabimbaza, ugasanga koko hari ikibazo cyo kudakurikirana ibintu ku rwego rukwiriye, kuki hategerezwa raporo y’Umugenzuzi Mukuru w’Imari kandi hagakwiye kuba hari ubaza umuntu ibipfa mu nshingano ze?”

Mu bindi bibitera yagarutseho harimo icyo kutagira ubushobozi buhagije no kuba ba terera iyo, aho ngo usanga umuntu ari mu mwanya akagaragarwaho n’imikorere mibi ariko kuko bitaritwa icyaha akaba atabibazwa cyangwa ngo akurwe muri uwo mwanya hatangazwe ko adashoboye.

Umuyobozi w’Umuryango Mpuzamahanga Urwanya Ruswa n’Akarengane ishami ry’u Rwanda (TIR), Ingabire Marie Immaculée, yabwiye IGIHE ko aho ikibazo kiri ahanini ari uko n’ahagaragaye ibibazo nk’ibyo usanga bakuyeho umuyobozi wo hejuru gusa, ba bakozi babigiramo uruhare bakaguma ari ba bandi.

Yagize ati “N’iyo dukoze ubuvugizi usanga uwo bakuyeho ari umuyobozi, bagasigaho ba bakozi bakora ya makosa, usanga bakuyeho uri hejuru kandi ntabwo ari we uba wabikoze, ahubwo ababikora bakagumamo nta kuntu rero ibibazo bitahora bigaruka.”

Senateri Nkusi Juvenal, wabaye umudepite imyaka myinshi by’umwihariko akaba yarayoboye PAC igihe kitari gito, we abona ko ibibazo by’imicungire mibi bihora bigaragara mu bigo bimwe na bimwe biterwa ahanini n’imyubakire imbere y’ibyo bigo.

Ati “Hashobora kuba harimo ikibazo cy’uko ikigo giteye (structure), hashobora kuba harimo ikibazo cy’abantu, hagashobora kuba harimo ikibazo cy’imicungire muri rusange, ibyo rero nibyo abantu bakwiye kurebaho.”

Senateri Nkusi Juvenal yavuze ko imiterere y'ikigo n'imikorere idahwitse mu bakiyobora bishobora kuba intandaro y'amakosa ahoraho y'imicungire y'imari n'umutungo bya leta

Bikwiye kuvugutirwa muti ki?

ku ruhande rw’Umugenzuzi Mukuru w’Imari ya Leta, Obadiah Biraro, ibikwiriye gukorwa ngo ni uko buri muntu wese yamenya inshingano yaragijwe akazikora neza, yabigereranyije n’umugani w’itaranto wanditse muri Bibiliya, avuga ko umuntu akwiye kugenzura neza itaranto yahawe, uwo binaniye akavaho.

Ati “Umuti ni uko umuntu abazwa ibyo akora, udashoboye akavaho. Hakwiye kuba ubibazwa akabera n’abandi urugero, rimwe bakureho umuntu bavuge ko avuyeho kuko adashoboye, bizatuma n’abandi bitonda.”

Ku ruhande rwa Senateri Nkusi we, yavuze ko umuti ari uko ikigo ubwacyo gikwiye kwigenzura, kigashyiraho uburyo gikurikirana n’uburyo gihana abakoze amakosa bo muri cyo.

Ati “Imicungire y’umutungo wa Leta ni uguhozaho, ntabwo uvanaho ijisho, kandi ugashyiraho ingamba zituma ushobora gukora igenzura ryegeranye buri gihe kugira ngo ibintu bitagucika, hagomba kubaho ibikorwa byo gukingira, ukagenzura, ukareba ahari ibyuho ukabikemura bidategereje raporo y’umugenzuzi mukuru w’imari ya leta.”
Yongeyeho kandi ko hakwiye guhoraho ubushakashatsi bugamije kureba icyakorwa kugira ngo ibibazo byagaragaye ntibizongere kugaragara ahubwo ibintu bijye mu nzira nziza.

Umuyobozi wa TIR ati “Icyakorwa ni uko uwagaragaweho ikosa wese akwiye kubihanirwa, niba nta n’ibimenyetso bimuhamya icyaha, ariko byibuze agahabwa n’ibihano biri mu rwego rw’akazi ariko umuntu akabibazwa, byibuze byatuma n’abandi bagira ubwoba babonye na bo bitangiye kubageraho.”

Perezida wa Repubulika Paul Kagame, ubwo yari ayoboye Inama ya Komite Nyobozi yaguye ya FPR Inkotanyi yabaye ku wa 26 Kamena 2020, yagarutse ku kibazo cy’abayobozi bakoresha nabi ibikwiye gufasha abaturage.

Yagize ati “Ibi by’agahimano byo kwangiza, ukangiza umutungo w’igihugu, ukangiza ibikwiye kuba bifasha abaturage, ukabigira ibyawe, ibyo birahagarara byanze bikunze, abantu baraza gutangira kubyishyura.”

Amategeko avuga iki kuri ibi byaha?

Itegeko n°54/2018 ryo kuwa 13/08/2018, ryerekeye kurwanya ruswa umutwe wa 3, ingingo ya 10 ivuga ko umuntu wese, yaba umukozi wa Leta cyangwa undi ukora umurimo wa Leta cyangwa ukora mu nzego zayo, umuyobozi cyangwa umukozi mu kigo cy’ubucuruzi cyangwa isosiyete y’ubucuruzi cyangwa koperative cyangwa ukorera undi muntu, umuryango ushingiye ku idini cyangwa undi muryango uwo ari wo wose, ukoresha mu nyungu ze cyangwa iz’undi, umutungo, amafaranga cyangwa inyandiko z’agaciro, yahawe cyangwa yashyikirijwe kubera imirimo akora cyangwa ukoresha mu nyungu ze abakozi ashinzwe ku bw’umurimo aba akoze icyaha.

Iyo abihamijwe n’urukiko, ahanishwa igifungo kitari munsi y’imyaka irindwi, ariko kitarenze imyaka icumi, n’ihazabu y’amafaranga y’u Rwanda yikubye inshuro kuva kuri eshatu kugeza kuri eshanu z’agaciro k’umutungo yanyereje.

Ingingo ya 11 ivuga ko umuntu wese wahawe ububasha n’igihugu cyangwa wahawe ubutumwa mu rwego rw’umurimo wa Leta, ukoresha nta burenganzira yabiherewe n’inzego zibifitiye ububasha, amafaranga ari ku ngengo y’imari ya Leta cyangwa ukoresha undi mutungo wa Leta ibyo bitateganyirijwe, aba akoze icyaha.

Iyo abihamijwe n’urukiko, ahanishwa igifungo kirenze imyaka itanu ariko kitarenze imyaka irindwi, n’ihazabu y’amafaranga y’u Rwanda atari munsi ya 3.000.000 FRW ariko atarenze 5.000.000 FRW.

Naho ingingo ya 12 ivuga ko umuntu wese, ufite ububasha bwo gucunga umutungo ufitiye rubanda akamaro, mu rwego rwa Leta cyangwa ikigo cyigenga, sosiyete, koperative, umuryango utari uwa Leta ufite ubuzimagatozi, uwukoresha mu byo utateganyirijwe, uwureka cyangwa utawitaho ukononekara cyangwa uwukoresha mu buryo bunyuranyije n’amategeko, aba akoze icyaha.

Iyo abihamijwe n’urukiko, ahanishwa igifungo kirenze imyaka itanu ariko kitarenze imyaka irindwi n’ihazabu y’amafaranga y’u Rwanda atari munsi ya miliyoni eshatu 3.000.000 Frw ariko atarenze miliyoni eshanu 5.000.000 Frw.

Ingabire Marie Immaculée yatangaje ko buri mukozi ugaragaweho amakosa mu micungire y'imari n'umutungo bya leta, akwiye guhanwa
Abadepite bagize PAC babariza mu ruhame abayobozi ku makosa bakoze ajyanye n'imari n'umutungo by'igihugu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .