Umuyobozi wa gereza ya Gicumbi ari gukurikiranwa n’Ubugenzacyaha

Yanditswe na Iradukunda Serge
Kuya 28 Nzeri 2020 saa 09:26
Yasuwe :
0 0

Ubuyobozi bw’Urwego rushinzwe imfungwa n’abagororwa, RCS, bwemeje ko uwari Umuyobozi wa gereza ya Gicumbi, CSP Iyaburunga Innocent, ari gukurikiranwa n’Urwego rw’Igihugu rw’Ubugenzacyaha, RIB.

Umuvugizi wa RCS, SSP Pelly Gakwaya Uwera, yabwiye IGIHE ko uyu mugabo yitabye RIB, ariko atazi neza niba yarafunzwe.

Yagize ati “CSP Iyaburunga Innocent yitabye RIB, ntuba uzi niba ari bufungwe, ntuba uzi inzira barimo, ariko yaritabye, kwitaba yitabye RIB.”

Ntiharamenyakana neza ibyaha uyu mugabo akurikiranyweho, kuko IGIHE yagerageje kuvugisha RIB, ariko Umuvugizi wayo w’Umusigire, Dr Murangirwa Thierry, ntiyagira byinshi atangaza.

CSP Iyaburunga yari amaze iminsi atabarije abagororwa n’imfungwa

Nubwo bitaramenyekana ko biri mu byatumye ahamagazwa na RIB, CSP Iyaburunga Innocent yitabye nyuma y’amabaruwa yagiye hanze yerekana ko ubuyobozi bwa gereza yari ayoboye bwandikiye amadini atandukanye arimo Kiliziya Gatolika na ADEPR, busabira inkunga imfungwa n’abagororwa bavugaga ko bafite imirire mibi.

Mu ibaruwa imwe yanditswe ku wa 19 Kamena 2020, IGIHE yaboneye kopi, yagiraga iti "Mbandikiye iyi baruwa ngirango mbasabe ko mwadutera inkunga y’inyongerafunguro y’abagororwa b’abanyantegenke n’abandi bagize ikibazo cyo kubyimba amaguru kubera imirire mibi, ibi bikaba byarakomotse ku ngaruka z’icyorezo cya Covid-19 kuko abagororwa n’imfungwa badasurwa.”

Nyuma yo kubona iyi baruwa, Umushumba wa Diyosezi ya Byumba, Servilien Nzakamwita yasohoye itangazo risaba abakirisitu kwitanga kugira ngo bagoboke aba bafungwa n’abagororwa. Ni itangazo ryasohotse ku wa 29 kanama 2020.

Nyuma y’iri tangazo, Urwego rushinzwe imfugwa n’abagororwa rwahise rusohora ibaruwa irivuguruza, aho rwavuze ko nta mfungwa n’abagororwa bafite ikibazo cy’imirire mibi muri ibi bihe bya Covid-19 kubera kudasurwa.

RCS yavuze ko ingengo y’imari yo gutunga imfungwa n’abagororwa itigeze igabanuka, ndetse ko hashyizweho uburyo abafungiye mu magereza bohererezwa amafaranga n’imiryango yabo, nubwo batabasha kubasura muri ibi bihe bya Covid-19.

CSP Iyaburunga Innocent, ari gukurikiranwa na RIB

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .