Umwihariko mu kwizihiza Umunsi Mpuzamahanga w’abageze mu zabukuru mu Rwanda

Yanditswe na IGIHE
Kuya 4 Ukwakira 2020 saa 03:46
Yasuwe :
0 0

U Rwanda rugiye kwizihiza Umunsi Mpuzamahanga w’abageze mu zabukuru hazirikanwa uruhare rw’umuryango mu guhangana n’ibyorezo no kurushaho kubungabunga ubuzima bw’abakuze.

Ubusanzwe ku wa 1 Ukwakira buri mwaka, Isi yose yizihiza Umunsi Mpuzamahanga w’abageze mu zabukuru.

Mu Rwanda uzizihizwa ku wa 7 Ukwakira 2020 mu nsanganyamatsiko igira iti “Uruhare rw’umuryango mu guhangana n’ibyorezo, habungwabungwa abageze mu zabukuru.”

Ni umunsi uzizihizwa hasozwa ibikorwa by’icyumweru cyatangiye ku wa 29 Nzeri 2020, cyahariwe abageze mu zabukuru kirangwa n’ibikorwa bitandukanye.

Muri iki gihe hakorwa ubukangurambaga bunyuze mu biganiro bizaca kuri radiyo na televiziyo bigamije kwibutsa uruhare rw’umuryango mu guhangana n’ibyorezo habungwabungwa abageze mu zabukuru n’umusanzu bakwiye gutanga mu gukumira ikwirakwira ry’icyorezo cya COVID-19.

Mu biganiro bizatangwa harimo no kwibutsa ibijyanye na gahunda ya ‘Ejo Heza’ cyane ko irimo no kuzigamira izabukuru ku Banyarwanda.

Umuryango AVEGA AGAHOZO nk’umwe mu bafatanyabikorwa bari gutegura uwo munsi, wateguye ibikorwa by’ubukangurambaga bizanyuzwa ku mbuga nkoranyambaga nka Twitter na Facebook guhera ku wa 2-6 Ukwakira 2020 hagamijwe gukangurira Abanyarwanda kwita ku bageze mu zabukuru by’umwihariko abari muri icyo cyiciro batishoboye.

AVEGA AGAHOZO nk’umuryango ufite abawubarizwamo benshi bageze mu zabukuru, ushimira Leta y’u Rwanda, Unity Club Intwararumuri iyobowe na Madamu Jeannette Kagame, Ikigega Gitera inkunga abarokotse Jenoside yakorewe Abatutsi (FARG) n’abandi bafatanyabikorwa bafite uruhare mu mibereho y’abanyamuryango bayo.

Abanyamuryango ba AVEGA kimwe n’abandi Banyarwanda bageze mu zabukuru bitaweho, naho ababyeyi b’intwaza 237 (ababyeyi b’incike za Jenoside yakorewe Abatutsi) batujwe mu nzu z’amasaziro bubakiwe na Unity Club Intwararumuri na FARG.

Umuyobozi wa AVEGA AGAHOZO, Mukabayire Valérie, avuga ko iyo abageze mu zabukuru bitaweho bituma batigunga.

Agira ati “Iyo umuntu ageze mu zabukuru akabona ari mu buzima bubi yumva yihebye akigunga, ariko iyo agize abamuba hafi ubuzima burahinduka. Twe rero mu gihe nk’iki dushimira igihugu cyacu cyita ku Banyarwanda bageze mu zabukuru barimo n’abanyamuryango bacu aho bari hatandukanye, ariko noneho by’umwihariko n’abafatanyabikorwa batuba hafi mu mibereho y’ababyeyi b’Intwaza aho batuye mu Impinganzima.”

Ku bijyanye n’imibereho mu bihe bya Coronavirus yavuzweho kwibasira no kuzahaza abageze mu zabukuru, Mukabayire avuga ko nubwo iki cyorezo cyatumye abakuze batabasha kwisanzura nkuko byari bisanzwe hashyizweho uburyo bwo kubarinda.

Agira ati “Muri iki gihe cya Coronavirus Isi yahuye nayo, abanyamuryango aho bari bakangurirwa kubahiriza ingamba zo kwirinda. Mu Mpinganzima naho bakomeza kwirinda nubwo mu bihe bya mbere wabonaga iki cyorezo kibateye kwigunga kubera kumva ko cyibasira abageze mu zabukuru, ariko bamaze kumenya kubana nacyo nk’uko natwe twese tubayeho.”

Umuryango AVEGA AGAHOZO ufite abanyamuryango 19 000, abarengaho gato kimwe cya kabiri bari hejuru y’imyaka 65 y’amavuko ariyo yitwa iy’abageze mu zabukuru.

Umunsi mpuzamahanga wahariwe abageze mu zabukuru washyizweho n’inteko rusange y’Umuryango w’Abibumbye ku wa 14 Ukuboza 1990. Washyizweho nyuma yo kubona ko hari impungenge z’uko abageze mu zabukuru batitabwaho bikwiye n’uburenganzira bwabo butubahirizwa.

Watangiye kwizihizwa ku rwego mpuzamahanga ku wa 1 Ukwakira 1991, ubu wizihijwe ku nshuro ya 29 mu gihe mu Rwanda ari ku ya 20.

Hagendewe ku bikubiye mu cyegeranyo cy’imibereho y’abatuye Isi (world population prospects, 2019 revision), imibare igaragaza ko umwe mu bantu 11 ni ukuvuga 9% by’abatuye Isi babarirwa hejuru y’imyaka 65.

Iyi mibare igaragaza ko mu 2050, umuntu umwe muri batandatu, ni ukuvuga 16% by’abazaba batuye Isi bazaba bari hejuru y’iyo myaka. Ni mu gihe abagejeje mu myaka 80 bazikuba inshuro eshatu bave kuri miliyoni 143 babarurwa mu 2019, bagera kuri miliyoni 426 mu 2050.

Kwita ku bageze mu zabukuru ni inshingano za buri wese kuko iterambere rirambye rishoboka ari uko nta cyiciro na kimwe gihejwe.

Perezida Kagame ateze amatwi umukecuru witwa Nyiramandwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .