Urubanza rw’umuryango uzabyarira undi rwongeye gukurura impaka mu rukiko

Yanditswe na Ndahayo Emmanuel
Kuya 13 Kanama 2020 saa 03:56
Yasuwe :
0 0

Urukiko Rwisumbuye rwa Nyarugenge rwakomeje urubanza rw’ubujurire rw’umuryango wabuze urubyaro, uri gusaba urukiko uburenganzira bwo kwemererwa kubyarirwa n’undi muryango w’inshuti zabo.

Ni urubanza rw’umugabo w’imyaka 40 n’umugore w’imyaka 33 bamaze imyaka icumi babana ariko babuze urubyaro. Uyu muryango wegereye undi muryango w’inshuti, babasaba kwifashisha ikorabuhanga bakababyarira umwana.

Iyi miryango yombi yabyemeranyijeho, ndetse igirana amasezerano yewe inajya ku bitaro bya Kanombe kugira ngo icyifuzo cyabo gishyirwe mu bikorwa, dore ko ibyo bitaro bifite ubushobozi bwo gutanga urubyaro hifashishijwe iryo koranbuhanga.

Ni ikorabuhanga ry’aho umuntu atwitira undi (surrogacy) hifashishijwe uburyo bwo gushyira intanga ngabo muri nyababyeyi y’umugore (traditional surrogacy), cyangwa gufata igi ry’intanga zombi rigashyirwa mu wundi mugore (modern surrogacy), akazabyara umwana ufite uturemangingo (DNA) tw’ababyeyi ba nyir’intanga.

Mbere yo gufasha iyi miryango kugera ku cyifuza cyayo, muganga ubifitiye ububasha yabasabye icyemezo cy’urukiko cyemeza ko amasezerano bagiranye afite ishingiro, mbere y’uko igikorwa kibaho.

Ng’uko uko uyu muryango wagiye mu Urukiko rw’ibanze rwa Kicukiro ushaka icyo cyemezo. Uru rukiko rwanze icyifuza cyabo kuko itegeko ry’Abantu n’Umuryango ryo mu Rwanda ryo ku wa 12 Nzeri 2016, mu ngingo yaryo ya 254 ivuga ‘uburyo bwo kororoka’; rivuga ko “Kororoka bikorwa hagati y’umugabo n’umugore mu buryo busanzwe cyangwa bwifashishije ikoranabuhanga. Kororoka mu buryo bwifashishije ikoranabuhanga bigomba kuba byumvikanyweho n’abo bireba”.

Urukiko rwavuze ko ubusabe bw’umuryango ushaka urubyaro burenga ku itegeko, kuko rigena ko uburyo bukoresha ikoranabuhanga bugamije kororoka bukorwa hagati ‘y’umugabo n’umugore’ aho kuba ‘hagati y’imiryango ibiri’ nk’uko iyi yari imeze.

Mu bujurire bw’uyu munsi, urukiko rwari rwatumiye ‘inshuti z’urukiko’ mu rwego rwo kumva ibitekezo bitandukanye.

Mu nshuti z’urukiko zatumiwe harimo Kaminuza y’u Rwanda (UR), HDI Rwanda n’umuryango Haguruka.

Mu kugerageza gusobanura ishingiro ry’ikirego, izi nshuti z’urukiko zahurije ku kuba hari icyuho mu itegeko ry’Abantu n’Umuryango mu Rwanda kuko ridasobanura neza abemerewe kwifashisha ikoranabuhanga hagamije kororoka, uburyo bikorwamo, igihe bikorwa n’ibindi nk’ibyo.

Abanyamategeko baturutse muri UR bavuze ko ikoranabuhanga rikoreshwa mu Rwanda ridasobanutse neza, gusa ko hifashishijwe inyandiko z’Ishami ry’Umuryango w’Abibumbye ryita ku Buzima (OMS), icyuho kiri mu itegeko ry’u Rwanda cyakunganirwa n’izo nyandiko.

Bavuze ko izo nyandiko zemera uburyo bwo gukoresha ikorabuhanga hagamijwe kororoka, kandi ko uburyo iyi miryango yashakaga gukoresha buri mu bwemewe ku rwego rw’Isi, bityo ko na bo bakwiriye kubwemererwa.

Bemeza ko kuba umuganga yemera ko ubushobozi bwo gukora icyo gikorwa buhari, urukiko rudakwiye kwita ku bindi bibazo bisanzwe bigaragara muri iri koranabuhanga hirya no hino ku Isi maze ngo rubishingireho rufata umwanzuro kuri uru rubanza mu gihe rwo nta bibazo rugaragaza.

Aha ni ho bahereye basaba urukiko “kutarengera” rufata umwanzuro kuri iki kibazo kuko ‘byaba ari ukurema ikibazo kidahari no kugishakira igisubizo’.

Basabye ko inzego z’ubuzima ari zo zagahawe uburenganzira bwo kugena icyakorwa, ahubwo urukiko rukazifashishwa ‘mu gihe habayeho impaka ku cyemezo cyafatwa n’inzego z’ubuzima’.

Abanyamategeko baturutse muri Muryango Haguruka bavuze ko kuba ‘itegeko rivuga umugabo n’umugore bidasobanuye ko baba barashakanye’ ahubwo ko ari umugabo wese n’umugore wese wifuza iyo serivise yaba yarashatse cyangwa atarabikora.

Bashingiye ku ngingo za 17, 18 na 21 z’Amasezerano Mpuzamahanga y’uburenganzira bwa Muntu, aba banyamategeko bavuze ko gushaka urubyaro “ari uburenganzira bw’ibanze bwa muntu” kuko ayo masezerano avuga ko umuryango uba ugizwe n’umugabo, umugore n’abana, bityo ko gushaka abana bigomba gufatwa nk’uburenganzira bw’ibanze bwa muntu.

Bavuze ko kandi umuntu afite uburenganzira ‘ku buvuzi’, bityo ko mu gihe umuryango wifashishije ‘ubuvuzi bw’ikoranabuhanga ushaka urubyaro’ bidakwiriye kuba ikibazo kuko biri mu burenganzira bwawo.

Umwana wavutse muri ubu buryo ahabwa umuryango we ryari?

Abanyamategeko b’umuryango Haguruka basabye urukiko kuzashishoza, kugira ngo uburenganzira bw’umwana buzubahirizwe igihe azaba amaze kuvuka.

Bifashishije ibipimo bya OMS, aba banyamategeko bavuze ko uburenganzira bw’umwana bugomba kwitabwaho kurusha ibindi byose, kugira ngo azagire ubuzima bwiza.

Aba banyamategeko bavuze ko igihe umwana amaze kuvuka, yakagombye kugumana n’umubyeyi wamubyaye, kugira ngo amwonse mu gihe cy’amezi atandatu, maze bazamuhe umuryango we afite ubudahangarwa bw’umubiri buhagije.

Basabye ko kandi umuryango uzabyara wakabaye ufite umwana wabo, kugira ngo hirindwe ko umubyeyi ubyaye umwana yamukunda cyane kugeza ubwo amwimanye kuko nawe yaba amukeneye.

Ikindi basabye urukiko ni ubushishozi ku bijyanye n’amarangamutima hagati y’umubyeyi n’umwana. Bagaragaje ko hakwiye gufatwa ingamba zizatuma umubyeyi wabyaye, akanonsa umwana amezi atandatu azemera kumutanga nyuma y’icyo gihe.

Umucamanza yabajije uko iyi miryango yombi yateguye ibijyanye no kubahiriza uburenganzira bw’umwana bwo konka amezi atandatu, basubiza ko biri mu masezerano bagiranye.

Amakuru avuga ko umuryango wifuza gufasha, usanganywe abana bane.

Byagenda bite umugore utwite ashatse gukuramo inda?

Umucamanza yabajije inshuti z’urukiko uko bumva byagenda igihe umugore utwite yakwifuza gukuramo inda y’umwana utazaba uwe.

Umunyamategeko wunganira abarega yavuze ko mu gihe cyo gukuramo inda, hakwifashishwa amategeko asanzwe agena uburyo bwo gukuramo inda.

Ayo mategeko agena ko umuntu ashobora gukuramo inda igihe yagira ingaruka ku buzima bwe. Inshuti z’urukiko zavuze ko igihe byagaragara ko inda ishobora guhungabanya ubuzima bw’umugore utwite, batarindira icyemezo cy’umuryango utegereje umwana, ahubwo bayikuramo bakazabibamenyesha.

Nyuma y’izi mpaka zose, umucamanza yongeye kubaza ababuranyi niba hari icyo bahindura ku masezerano bagiranye bakurikije ibitekerezo by’inyunganizi bumvise, bose bemeza ko ibyo bemeranyijweho bidahinduka, basaba urukiko kubaha ubutabera rukazafata umwanzuro ufite ubushishozi.

Umunyamategeko uhagarariye abarega yongeyeho ko abacamanza bagomba gushishoza cyane kubera ko “uru rubanza ari ingenzi cyane kandi ruzashingirwaho n’izindi manza zimeze nka rwo mu gihe kiri imbere”.

Umucamanza yemeje ko imyanzuro y’Urukiko izasomwa tariki ya 11 Nzeri uyu mwaka, saa munani z’amanywa.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .