Urukiko rwanzuye ko Rusesabagina afungwa iminsi 30 y’agateganyo, ahita ajurira (Amafoto)

Yanditswe na Philbert Girinema
Kuya 17 Nzeri 2020 saa 02:50
Yasuwe :
0 0

Urukiko rw’Ibanze rwa Kicukiro rwategetse ko Rusesabagina afungwa mu gihe cy’iminsi 30 kandi agafungirwa muri gereza, nyuma y’uko bigaragaye ko hari impamvu zikomeye zituma akekwaho ibyaha 13 birimo iby’iterabwoba ashinjwa.

Kimwe n’uko iburanisha ryo ku munsi wa mbere ryagenze, abantu bose bitabiriye babanje kugaragaza ko bipimishije icyorezo cya Coronavirus, bapimwaga umuriro kandi bagategekwa kubanza gukaraba intoki.

Abashinzwe umutekano bari benshi nk’ubushize, ndetse mu cyumba cy’iburanisha, usibye abantu bake barimo abakozi ba Ambasade ya Amerika, abandi bose bari abanyamakuru.

Ku isaha ya saa Munani n’iminota 40 nibwo Rusesabagina yinjiye mu cyumba cy’iburanisha, abanyamategeko be babiri nabo bitabiriye isomwa ry’umwanzuro ku ifungwa n’ifungurwa rye ry’agateganyo.

Rusesabagina yari yunganiwe na Me Emeline Nyambo hamwe na Me Rugaza David. Ubwo inteko iburanisha yari imaze kwinjira, umucamanza yabanje gusoma ibyaha 13 ubushinjacyaha burega Rusesabagina.

Umucamanza yavuze ko urukiko rwasesenguye buri cyaha mu biregwa Rusesabagina, uko yisobanuye n’uko abanyamategeko be bamwunganiye ndetse n’ibyagiye bitangazwa n’ubushinjacyaha.

Ku bijyanye n’uko yaburana afunzwe cyangwa adafunzwe, umucamanza yavuze hari impamvu zikomeye zituma akekwaho ibyaha, bityo ko akwiye gukurikiranwa afunzwe nubwo hagaragajwe impamvu z’uko afite uburwayi. Yavuze ko kuburana afunzwe bidashobora kubangamira uburenganzira bwe bwo kwitabwaho mu buvuzi.

Ashingiye kuri izo mpamvu, yasomye umwanzuro w’urukiko, maze avuga ko Rusesabagina agomba gufungwa iminsi 30 y’agateganyo ariko ko ashobora kujurira uyu mwanzuro mu gihe cy’iminsi itanu.

Rusesabagina yahise yaka ijambo maze amubwira umucamanza ati “Nifuzaga kubamenyesha ko iki cyemezo cy’uru rukiko rw’aka kanya nkijuririye.”

Ibyaha 13 Rusesabagina akurikiranyweho

- Kurema umutwe w’ingabo utemewe cyangwa kuwujyamo
- Gutera inkunga iterabwoba
- Iterabwoba ku nyungu za politiki
- Gukora no kugira uruhare mu bikorwa by’iterabwoba
- Gutanga amabwiriza mu gikorwa cy’iterabwoba
- Kuba mu mutwe w’iterabwoba
- Kugambana no gushishikariza abandi gukora iterabwoba
- Ubufatanyacyaha ku cyaha cy’ubwicanyi buturutse ku bushake
- Ubufatanyacyaha ku cyaha cyo gufata umuntu ho ingwate
- Ubufatanyacyaha ku cyaha cyo kwiba hakoreshejwe intwaro
- Ubufatanyacyaha ku cyaha cyo gutwikira undi ku bushake inyubako
- Ubufatanyacyaha ku cyaha cyo gukubita cyangwa gukomeretsa ku bushake
- Ubufatanyacyaha ku cyaha cyo gushyira abana mu mirwano cyangwa ngo bakore indi mirimo ijyanye n’ishingano za gisirikare

Ubwo Rusesabagina yasohokaga mu modoka ya RIB itwara imfungwa
Umutekano wari wakajijwe ku Rukiko rw'Ibanze rwa Kicukiro
Ntibyari bimenyerewe ko ababuranyi bitabira umuhango wo gusoma umwanzuro ku ifungwa n'ifungurwa ry'agateganyo ariko kuri iyi nshuro Rusesabagina yari ahari n'abunganizi be
Rusesabagina aganira n'abunganizi be aribo Me Nyambo Emeline na Me Rugaza David
Rusesabagina akurikiranyweho ibyaha birimo iby'iterabwoba, ubushimusi n'ubwicanyi
Ubwo yabwirwaga ko agiye gufungirwa muri gereza mu gihe cy'iminsi 30 y'agateganyo, Rusesabagina yahise ajurira
Abakozi babiri ba Ambasade ya Amerika mu Rwanda bari mu bari bitabiriye isomwa ry'uyu mwanzuro

Amafoto: Moise Niyonzima


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .