Bigenda bite iyo umuntu apfiriye mu isanzure?

Yanditswe na Dufitumukiza Salathiel
Kuya 12 Mutarama 2021 saa 11:58
Yasuwe :
0 0

Ibigo by’ubumenyi bw’ikirere bitandukanye byohereza kenshi abashakashatsi mu isanzure mu bihe binyuranye, hakaba ubwo habaye impanuka bagapfirayo kandi imirambo yabo ntigarurwa ku Isi. Wakwibaza uti “Ishyirwa he?”

Ahitwa mu isanzure ni mu gace kari hagati y’Isi n’indi mibumbe itandukanye irimo n’iyegereye Isi bifatanyije kugaragira izuba. Muri ako gace uba wavuye ku Isi, bivuze ko ibyakubaho abari mu Isi batabyumva.

Icyakora abashakashatsi bemeza ko mu isanzure ijwi rishobora kugenda nubwo ritagenda neza nk’uko rigenda ku Isi kuko mu isanzure hataba ikirere nk’icy’Isi.

Uko kuba hataba ikirere(atmosphere) ngo ni byo bituma hagira ingaruka nyinshi ku kiremwa muntu iyo kihakorera ubutembere.

Abashakashatsi bavuga ko umuntu ugiye mu isanzure hari aho ashobora kugera hakaba hari ibyago byo kutagaruka ku Isi, hakaba n’aho yagera hari ibyago byo kutagera mu isanzure. Uko ni ko bikunze kugendekera abenshi mu bapfirayo.

Abashakashatsi batatu b’Abarusiya bapfiriye mu mpanuka y’icyogajuru mu 1971, byavuzwe ko byatewe n’uko cyafungutse ubwo cyahagurukaga kuri sitasiyo ya Salyut1. Icyo gihe ni yo yari sitasiyo ya mbere yohereje icyogajuru mu isanzure.

Uko umubare wa sitasiyo n’ibyogajuru byoherezwa mu kirere byiyongera, ni ko n’impfu z’abashakashatsi zikomeza kwiyongera, aho ubu habarurwa abagera kuri 18 bapfiriye mu isanzure.

Popular Science iganira n’uwahoze ari umuyobozi wa sitasiyo mpuzamahanga yohereza ibyogajuru mu kirere (ISS), Chris Hadfield, yamubajije uko bigenda kugira ngo umuntu apfire mu isanzure kandi aba yoherejwe nta burwayi cyangwa ibindi bibazo by’ubuzima afite.

Hadfield yasubije ko kuba abashakashatsi basohoka mu cyogajuru[iyo bageze mu isanzure] bishobora kuba ari cyo kintu cy’ingenzi kibateza ibyago.

Yavuze ko utuvungukira duto cyane tw’amabuye yo mu isanzure twinjira mu myenda baba bambaye tugashyiramo Oxygen n’ubushyuhe bukabije. Mu gihe cy’amasegonda icumi, amaraso n’amazi biba byamaze gukamuka, umubiri ukuzuramo umwuka.

Uruvangitirane rwa nitrogène ruba rwamaze kwegera uruhu, rukora utuntu dusa n’udupirizo bahuhiyemo umwuka, tukagenda tubyimba. Mu gihe cy’amasegonda 15 ibyiyumvo by’umuntu biba bitakibasha gukora, hashira amasegonda 30 ibihaha na byo bikaba bitakibasha gukora maze akagagara.

Nyuma yo kugagara n’ibihaha byahagaze gukora, ngo umutima uhita uhagarara agapfa, mbere y’uko akonja agahinduka nk’ikintu cy’ikibuye kuko aba atakibasha kubona oxygene.

Hagaragazwa ko ubufatanye bwava mu kwisungana kw’ibigo bikorera ubushakashatsi mu isanzure ari bwo bushobora guhangana n’icyo kibazo cy’ubuzima bw’abajyayo buba buri mu kaga.

Kugeza ubu nta buryo buhamye ibyo bigo biragaragaza bwo gutwara umurambo w’uwapfiriye mu isanzure, nubwo Hadfield avuga ko ISS itanga amahugurwa y’ibishobora gukorwa.

Avuga ko abajyayo bajya bafata uwo murambo nk’ikintu cyagira ingaruka mbi ku buzima, bagashaka ahashoboka bawubika cyane ko nta haba haragenewe ibyo hahari.

Hadfield atanga inama ko mu guhangana n’ibyo bibazo byombi, uwo murambo ukwiye gushyirwa mu mwenda wahazwemo umwuka, maze ugashyirwa ahantu hakonje nk’ahabikwa imyanda, mu kugabanya umunuko.

Icyo gitekerezo kirahura n’umushinga NASA yari yaramaze kuvumbura wo gukora ahajya hashyirwa imyanda mu cyogajuru, aho muri uwo mushinga byatekerejwe ko umurambo wajya ufatwa ugashyirwa muri nitrogène yakonjeshejwe ikaba nk’amazi, maze ugashwanyagurika ukaba uduce duto ku buryo tubikwa ahantu hato cyane.

Abashakashatsi bavuga ko igihe umuntu apfiriye ku yindi mibumbe uburyo bwavuzwe hejuru ari bwo bwazajya bukoreshwa, ariko yaba apfiriye kuri Mars hakaba umwihariko. Ni ngombwa ko umurambo we utwikwa kugira ngo hatazagira udukoko dukomoka ku Isi tuhakurira biturutse kuri uwo murambo.

Mu isanzure imimerere yaho itandukanye cyane n'iyo ku isi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .