Abanduye COVID-19 barasatira miliyoni 35

Yanditswe na Mukahirwa Diane
Kuya 4 Ukwakira 2020 saa 04:59
Yasuwe :
0 0

Kuva umuntu wa mbere ufite icyorezo cya Covid-19 yagaragara mu Bushinwa mu mpera za 2019, iki cyorezo cyatangiye gukwirakwira hirya no hino ndetse umubare w’abacyandura buri munsi ntusiba kwiyongera kugeza aho ubu babarirwa muri miliyoni 34.9.

Iki cyorezo gifata mu myanya y’ubuhumekero, mu gihe kitageze ku mwaka ku Isi hose kimaze gukwirakwira mu bihugu bigera kuri 216.

Kugeza ubu hari ibihugu byagiye byibasirwa na Covid-19 kurusha ibindi ahanini hashingiwe ku mubare w’abamaze kwandura iki cyorezo n’uw’abo cyahitanye.

Ikiri ku mwanya wa mbere ni Leta Zunze Ubumwe za Amerika kuri ubu zifite abarwayi barenga miliyoni zirindwi mu gihe abo zapfushije nabo basaga ibihumbi 300.

Mu bihugu byibasiwe cyane hazamo kandi u Buhinde bufite abanduye barenga miliyoni esheshatu n’abishwe na Covid-19 barenga ibihumbi 100. Ikindi gihugu gifite abanduye babarirwa mu ma miliyoni ni Brésil, aho kugeza ubu ifite abarwayi bagera kuri miliyoni enye, mu gihe abapfuye basaga ibihumbi 140.

Byagiye bigaragara ko Afurika itibasiwe na Covid-19 cyane ugereranyije n’indi migabane, aho ku rutonde rw’ibihugu byibasiwe cyane ku Isi, Afurika y’epfo iri ku mwanya wa 10 n’abarwayi ibihumbi 680, mu gihe abapfuye ari 16938.

Umugabane wa Amerika niwo uza ku isonga mu yibasiwe cyane na Covid-19 aho kugeza uyu munsi abayanduye babarirwa muri miliyoni 17, aho uretse ibihugu nka Leta Zunze Ubumwe za Amerika na Brésil uyu mugabane ufite ibindi byazahajwe cyane birimo Colombia, Peru na Argentine.

Undi mugabane utorohwe na gato ni Aziya ifite abanduye babarirwa muri miliyoni 10, bari mu bihugu nka Iran, Iraq, Bangladesh na Arabie Saoudite.

Imibare y’ishami ry’Umuryango w’Abibumbye ryita ku Buzima, OMS, igaragaza ko iki cyorezo gikomeje no kwibasire ibihugu byo ku mugabane w’u Burayi.

Mu bihugu byibasiwe cyane n’iki cyorezo ku mugabane w’u Burayi ndetse bikaba byaratangiye no kubona amatsinda y’abantu bashya bandura, harimo Espagne ifite abanduye barenga ibihumbi 700, u Bufaransa bufite abarenga ibihumbi 600, u Bwongereza bufite abagera ku bihumbi 400 n’u Butaliyani bufite abarenga gato ibihumbi 300.

Afurika niyo yagize abarwayi bake kurenza indi migabane kuko ifite abarwayi ba Covid-19 barenga gato miliyoni 1.5.

Ibihugu byo kuri uyu mugabane byibasiwe kurenza ibindi ni Afurika y’Epfo ifite abarwayi basaga ibihumbi 679, Maroc ifite abasaga ibihumbi 131, Misiri ifite ibihumbi 103 na Ethiopia ifite ibihumbi 77.

Kugeza ubu mu Rwanda habarurwa 4852 banduye mu gihe abamaze gukira ubu burwayi ari 3211 bangana na 66%. Bivuze ko abakirwaye ari 1612.

Uretse umubare w’abandura iki cyorezo ukomeje kwiyongera n’umubare wabo gihitana ugenda uzamuka umunsi ku wundi ndetse kuri ubu barenga miliyoni imwe.

Umubare w'abamaze kwandura Covid-19 ku Isi urasatira miliyoni 35

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .