Umuryango wa ba ’Le Scornet’ ugiye kwandika igitabo ku mateka y’Umujyi wa Kigali

Yanditswe na Karirima A. Ngarambe
Kuya 14 Ukwakira 2020 saa 03:38
Yasuwe :
0 0

U Rwanda ni igihugu kimaze kuba nyabagendwa kandi benshi bagisuye ku mpamvu zitandukanye banezezwa no kukigarukamo bazanye n’inshuti cyangwa imiryango yabo.

Umwanditsi Daniel Le Scornet n’umugore we Christine Le Scornet ni urugero rwiza rw’umuryango wishimiye ituze wasanze mu Rwanda, unafata umwanzuro wo kurugiramo inzu yo guturamo.

Aba bombi basuye u Rwanda bwa mbere mu 2014, guhera ubwo buri mwaka babishyize muri gahunda zabo ko bazajya barutemberamo inshuro nyinshi kugeza banzuye kuruturamo burundu.

Mu kiganiro cyihariye Daniel Le Scornet n’umugore we Christine Le Scornet bagiranye na IGIHE, bagarutse ku rugendo rwabo kuva mu myaka itandatu bakandagiye bwa mbere mu Rwanda.

Uyu muryango wakandagiye ku butaka bw’urwa Gasabo bwa mbere mu 2014, hari mu gihe cyo kwibuka Jenoside yakorewe Abatutsi.

Daniel Le Scornet agira ati ‘‘Twahereye ahitwa mu Bisesero tuhahurira n’amateka akomeye cyane n’uruhare igihugu cyacu cyayagizemo, twahavanye gahunda yo kuzavuga ibyo twiboneye n’amaso kuri urwo rwibutso n’ahandi twasuye hatandukanye habereye ubwicanyi muri Jenoside.’’

Nyuma yo gusura ibice bibitse amateka ya Jenoside yakorewe Abatutsi mu 1994, binjiye mu mushinga wo gufatanya na Habonimana Charles [Karoli] kwandika igitabo yise ‘Moi, le dernier Tutsi’ bishatse kuvuga ‘Njye, Umututsi wa nyuma’.

Iki gitabo cy’amapaji 187 gikubiyemo inkuru mpamo y’ubuzima bwa Habonimana wari ufite imyaka 12 muri Jenoside, uko yiciwe abe mu maso, akabana n’Interahamwe ndetse akanaziherekeza mu bitero.

Daniel Le Scornet agaragaza ko aya mateka yose yamusunikiye ku gutanga umusanzu we kugira ngo Isi imenye ukuri kw’ibyabereye mu Rwanda.

Ati ‘‘Natwe twasanze Abafaransa bagomba kwerekana uruhare igihugu cyacu cyagize mu Rwanda kandi tukanarwanya uwashaka wese guhakana cyangwa gupfobya aya mateka.’’

Mu kubara inkuru y’ibihe bagiriye mu Rwanda, avuga ko ingendo barukozemo zatumye barushaho kurukunda kugeza ubwo bahisemo kuruturamo.

Yakomeje ati ‘‘Ingendo zose twakoze mu Rwanda tukamenya neza amateka yarwo tukamenya imico y’abarutuye, byatumye tuhakunda cyane, twiyemeza no kuhatura burundu. Mu 2019 twaje twiyemeje gutura, turi mu munezero wo kubona turi mu gihugu nk’u Rwanda. Twiteguye gutanga umusanzu wacu nubwo waba ari muto.’’

Kubera ubwiza yasanganye Umujyi wa Kigali, Daniel Le Scornet yanatangiye umushinga wo kwandika igitabo kiwerekeye.

Ati ‘‘Muri ibi bihe bya COVID-19 natangiye kwandika amateka ya Kigali kubera urukundo nyifitiye, igitabo kizasohoka cyitwa ‘Si Kigali était conté’ ; Kigali ifite amateka yo kuvugwa yo kwandikwa.’’

Mu byo Daniel Le Scornet n’umugore we bishimira ku Rwanda ni umutekano warwo n’isuku rwimakaje. Bavuga ko iterambere ryacyo rishushanya isura nyayo y’Umugabane wa Afurika.

Daniel Le Scornet n’umugore we Christine Le Scornet baguze inzu i Gikondo, barayivugurura, bafatanyije n’abakozi b’Abanyarwanda.

Le Scornet ati ‘‘Inzu yacu iherereye ahitwa kwa Rujuguro i Gikondo, ni ahantu heza cyane. Turanezerewe dufite umwuka mwiza, turatekanye ku buryo nta watubwira ngo dusubire i Paris aho twari dutuye mbere ngo tumwemerere. Kuri twe Kigali iruta Paris, hano uhura n’umuntu mugasuhuzanya mukaganira kugeza muhanye nimero ya telefoni mukajya muvugana naho i Paris aho twari dutuye umuntu arimenya nubwo muba muri benshi ariko nta rugwiro.’’

Uyu muryango kandi mu Rwanda washinze Ikigo ‘‘Histoire et Image’’ bishatse kuvuga ‘‘Amateka n’amashusho’’ kizajya gikorerwamo ibikorwa byo kuvuga amateka no kwerekana ibikorwa bitandukanye mu mafoto.

Inzu yabo yubatse mu buryo bushobora gutuma abantu batandukanye babona aho kuganirira no kungurana ibitekerezo.

Imwe mu ntego zikomeye bihaye ni iyo gufasha Abanyaburayi benshi kumva neza u Rwanda no kurubwirwa n’abarurimo bitari amabwire y’abashakira inyungu mu guharabika.

Le Scornet ati ‘‘Mu bihe byashize twazanye umwe mu Bafaransa utarumvaga neza amateka ya Jenoside yakorewe Abatutsi, ariko yageze ino tumutembereza henshi hashoboka arirebera aganira n’Abanyarwanda muri rusange, ubu ni we mu Bufaransa uvuga ukuri unyomoza abandika ibitari byo. Ibi rero tuzabikomeza neza kuko noneho turi mu Rwanda, igihugu dukunda cyane.’’

Christine Le Scornet yaryohewe n'ibihe byiza yagiriye mu Rwanda
Daniel Le Scornet ni umwanditsi w’ibitabo ndetse ateganya kwandika ku Mujyi wa Kigali
Christine Le Scornet ubwo yafatanyaga n'abakozi kubaka inzu ye iri i Gikondo
Igihe bari mu kazi ko kubaka inzu yabo bafata ifoto y'urwibutso
Inzu ya Le Scornet irimo ibikoresho bya Made in Rwanda
Umwanditsi Daniel Le Scornet n’umugore we Christine Le Scornet bishimira cyane imibanire yabo n'abandi baturarwanda

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .