Kenzō wagize uruhare runini mu kumenyekanisha u Buyapani mu ruganda rw’imideli yitabye Imana

Yanditswe na Uwiduhaye Theos
Kuya 5 Ukwakira 2020 saa 09:31
Yasuwe :
0 0

Umuhanzi w’imideli w’Umuyapani Kenzō Takada wamamaye ku Isi mu ruganda rw’imideli, yitabye Imana ku myaka 81, azize uburwayi bufite aho buhuriye na Coronavirus.

Uyu mugabo yubatse izina rikomeye mu ruganda rw’imideli ku Isi yari afite inzu y’imideli yitwa ‘Kenzo’. Yapfiriye mu bitaro biherereye mu Bufaransa mu Mujyi wa Paris.

Yibukirwa ku buhanga bwe buhambaye mu guhanga imideli ndetse no kuba ariwe muhanzi w’imideli ukomoka mu Buyapani wabashije kugaragara muri Paris Fashion Week ku nshuro ya mbere.

Abayapani benshi ku rubuga rwa Twitter bagaragaje uyu musaza nk’umuntu wagize uruhare rukomeye mu kongera kuvuka k’uruganda rw’imideli mu Buyapani.

Abandi bavuze ko kugira ikintu cyakozwe n’uyu mugabo ari ishema kuri bo, umwe yanditse ati “Ikofi ya mbere natunze yari yarakozwe na Kenzo. N’ubwo ari akantu gato, nzahora mbyibuka. Ruhukira mu mahoro.”

Undi yagize ati “Mfite umwambaro ya Kenzo nahawe na Mama, na n’ubu ndacyawambara.”

Kenzo yavutse mu 1939 ahitwa Himeji. Yagiye mu Mujyi wa Paris mu 1965 akoresheje ubwato, yirengagije ko atari azi kuvuga Igifaransa na gato, atangira guhanga imyambaro akayigurisha ku nzu z’imideli zikomeye, nyuma aza gufata umwanzuro wo gushinga iduka yari yarise ‘Jungle Jap’.

Yakoraga imyambaro igendanye n’ubundi n’umuco wo mu Buyapani, yigeze kuvuga ko impamvu yabikoze ko ariko atashakaga gukora nk’ibyo yasanze Abafaransa bakora.

Kenzo yamamaye cyane ubwo Elle Magazine yashyiraga kimwe mu bikorwa bye ku gifuniko cyacyo.

Kenzo yatangiye kwamamara cyane mu ruganda rw’imideli mu Bufaransa ndetse n’iwabo mu Bufaransa guhera mu myaka yo mu 1970 kuzamura ndetse atangira no kwegukana ibihembo bitandukanye.

Kenzō Takada yanditse izina rikomeye mu bijyanye n'imideli ku Isi
Urupfu rwa Kenzō rwababaje benshi mu baturage b'igihugu cye
Imideli yose yahangaga yabaga ifitanye isano n'umuco w'Abayapani
Imwe mu myambaro yahanzwe na Kenzō
Umunyamideli amurika imyambaro yahanzwe na Kenzō

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .