Byagenze gute ngo amazi y’amashyuza i Rusizi yimukire ahandi?

Yanditswe na Sitio Ndoli
Kuya 25 Kanama 2020 saa 12:35
Yasuwe :
0 0

Amazi y’amashyuza yari asanzwe ari mu Kagari ka Mashyuza, mu Murenge wa Nyakabuye, mu Karere ka Rusizi, kuva ku mugoroba wo ku wa 24 Kanama 2020, yahavuye aratemba ajya hafi y’Uruganda rukora sima rwa Cimerwa.

Aya mazi yari asanzwe amanuka ashyushye yagera ahantu akaguma hamwe abantu bakabasha kuyoga no kuyikandisha kuko ngo yabavuraga amavunane. Mbere y’icyorezo cya COVID-19, wasangaga abantu ari benshi baje kuyivurizamo harimo n’abaturutse mu Burundi no muri Repubulika Iharanira Demokarasi ya Congo.

Bamwe mu bahaturiye babwiye IGIHE ko babibonye batyo bagasanga hari kugaragagara amabuye gusa amazi akaba yamanutse akagenda ari menshi, bakaba bumva bahombye kuko hari bamwe bahakuraga amaramuko bakora akazi ko gukanda abantu bahaje.

Uwitwa Nikobatuye Octave ati “Natwe twabibonye gutya ariko turacyeka ko ari urutambi rwaturikijwe rwatumye amanuka ari menshi yagiye hepfo y’aho yari asanzwe.”

Minani Japheth yunzemo ati “Nibyo koko yagiye ariko ni agahinda, uzi ukuntu twabonaga amafaranga yo gukanda abantu no kubafasha koga, niho nakuraga agasabune n’akunyu.”

Umuyobozi w’Akarere ka Rusizi, Kayumba Euphrem, yabwiye IGIHE ko boherejeyo itsinda ririmo abakurikirana hafi ibijyanye n’ibiza, ibidukikije n’abashinzwe ibya mine kugira ngo harebwe icyabiteye n’icyo bakora.

Ati “Twoherejeyo itsinda ntabwo riraduha raporo, uretse ariya mafoto ameze kuriya ntacyo twarenzaho. Itsinda ry’abakozi rirajya kureba ubundi baduhe amakuru. Twoherejeyo abakora mu bigo nka za REMA, abashinzwe ibya Mine, ntabwo nakubwira ngo tuzayagarura.”

Dr Emmanuel Havugimana, Impuguke mu bijyanye n’Ubumenyi bw’Isi, avuga ko ubushakashatsi bukiri gukorwa ariko we asanga byaba byaraturutse ku mitingito yabaye muri Repubulika Iharanira Demokarasi ya Congo n’u Burundi.

Ati “Ubushakashatsi buracyakorwa ariko ndabona icyo navuga ari imitingito yabaye ku tariki ya 14 na 16 z’ukwa karindwi n’undi mutingito wabaye ejo saa munani mu kiyaga cya Tanganyika, ibyo byose iyo bibaye bigatuma ibintu by’amabuye yo mu kuzimu binyeganyega cyane, ntabwo bitangaje ko ahantu nka hariya hari amashyuza, amazi yahita agenda.”

“Njyewe ni byo nashyize imbere abandi bavugaga ibikorwa by’amabuye acukurwa hariya ariko numvise igifite imbaraga gikomeye cyane ari iyo mitingito itatu yabaye mu buryo bukurikirana, ishobora kuba yahungabanyije amabuye yo mu kuzimu amazi akabona ahantu arigitira akagenda.”

Dr Havugimana akomeza agira ati “Niba umaze kuhagera amabuye yaho asa umukara nk’ariya yo mu majyaruguru, biragaragara ko ari ahantu habaye iruka ry’ibirunga cyera cyane mbere ya biriya birunga byo mu Majyaruguru.”

“Ubwo rero urumva ko habaye umutingito mu Kivu wabereye kuri kilometero 13 uvuye hejuru y’ubutaka, Epicentre (izingiro ry’iruka ry’ikirunga) ikaba iri i Karehe, hakurya ya Kivu muri Congo, nibyo mbona njye byabiteye, nta kintu kidasanzwe cyabaye.”

Dr Havugimana avuga ko ahavuye amashyuza hazamera ibyatsi bikarangira, abazabaho mu myaka ijana iri mbere bazajya babyumva nk’amateka ko habaga amazi. Gusa ngo ntiyakwemeza ko amazi azagaruka.

Abaturage bababajwe ni uko amazi bakuragamo amaramuko yagiye ahandi
Ahari hasanzwe amashyuza hasigaye amabuye
Amazi y'amashyuza ataragenda yabaga ari ahantu hamwe abantu bakayoga bakanayikandisha

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .