Leta yiteguye ite kubyaza umusaruro ibishanga by’i Kigali nyuma yo kwimura abari babifitemo ibikorwa?

Yanditswe na Dufitumukiza Salathiel
Kuya 30 Mutarama 2021 saa 02:58
Yasuwe :
0 0

Kuva mu 2017, Umujyi wa Kigali watangiye gahunda yihariye yo kwimura mu bishanga abantu bahatuye n’ibikorwa by’abantu ku giti cyabo n’ibya Leta bifatwa nk’ibitemerewe kuhakorerwa cyangwa bibyangiza, hagamijwe kubibungabunga no kubikoresha nk’uko bigenwa n’amategeko mu kurengera urusobe rw’ibinyabuzima n’abaturage.

Icyo gihe hari hashize imyaka isaga itanu Guverinoma y’u Rwanda itangiye kwimura inganda n’ibikorwa by’ubucuruzi byari biherereye mu cyahoze ari icyanya cy’inganda cya Gikondo mu Karere ka Kicukiro, kugira ngo hatunganywe hashyirwe ibikorwa nyaburanga.

Mu buso bwa kilometero kare 730 Kigali iriho, uburenga kilometero 76 zihwanye na 13.8% ni ibishanga.

Gahunda yo kwimura abaturage n’ibikorwa biri mu bishanga ijya gutangira habarurwaga ibikorwa 7.222 biri mu bishanga, aho muri byo 78,9% byari ahatuwe n’abantu, ahandi hari ibikorwa by’ubucuruzi, amagaraji, parikingi, inganda n’ibindi.

Kugeza ubu imibare igaragaza ko Umujyi wa Kigali umaze kwimura ibikorwa 6.515 muri 7.222, bingana na 90.2 %.

Ni gahunda iri gukorwa hagamijwe gukiza amagara y’abahatuye kuko kuhatura bishyira ubuzima bwabo mu kaga, kubahiriza amategeko n’amabwiriza ajyanye no kubungabunga ibidukikije no kubungabunga ibishanga ndetse no guteza imbere isuku, ubwiza bw’Umujyi n’imibereho myiza y’abaturage.

Umujyi wa Kigali kandi uvuga ko iyo gahunda igamije kubungabunga urusobe rw’ibinyabuzima n’ubuzima bwiza muri rusange no kongera imbaraga mu ikurikiranabikorwa n’igenzura.

Ibishanga bigiye kubyazwa umusaruro

U Rwanda nk’igihugu gifite ubuso butari bunini, biragoranye ko rwafata ubuso runaka bukamara igihe budakorerwaho igikorwa kandi butanatuweho. By’umwihariko Kigali nk’Umurwa Mukuru, habaye hari uduce runaka tudatuwe kandi nta n’ibikorwa bihari, hashobora guhinduka indiri y’amabandi, hagateza isuku nke ndetse bikanabangamira intego z’iterambere.

Mu kiganiro cyihariye Minisitiri w’Ibidukikije, Dr. Mujawamariya Jeanne d’Arc, yagiranye na IGIHE, yavuze ko hari inyigo yakozwe y’ibizakorerwa muri ibyo bishanga, bikabungabungwa bikabyazwa umusaruro ku buryo byagira uruhare mu iterambere ry’igihugu.

Ati ”Ntabwo byose bizakorerwamo ibintu bimwe, hari ibishanga bishobora guhingwamo, hari ibigenewe ubusitani ku buryo bizakorerwamo ubukerarugendo, hari n’ibizabungabungwa gusa ntihagire igikorwa na kimwe kibikorerwamo.”

Yavuze ko ibishanga byo mu Mujyi wa Kigali ari byinshi, bityo ko igishanga kizagenerwa gukoreshwa mu buryo runaka bijyanye n’aho giherereye. Hari n’aho igishanga kimwe kizajya kigabanywamo ibice, hamwe hagakoreshwa ukwaho n’ahandi ukwaho.

Yakomeje ati ”Nk’igishanga kiva hafi ya Rusororo kikagera hariya kuri 15, hari igice kizabungabungwa hari n’igice kizaterwamo ibihingwa bitanyunyuza amazi cyane […] Wava kuri 15 ukagera hariya kuri Kigali Parents ukambuka ukagera ahahoze La Palisse, aho hazakorerwa ubukerarugendo.”

“Hanyuma i Gikondo ahahoze icyanya cy’inganda hazaterwa indabo, [hakorerwe] ubukerarugendo n’ibindi ariko ntabwo hazahingwa ibihingwa abantu bakwifashisha mu ngo zabo.”

Dr. Mujawamariya yasobanuye ko igishanga cya Gikondo kiri mu Mujyi cyahozemo inganda zikoresha ibinyabutabire byinshi, bishobora kugaragara mu mboga cyangwa imbuto biramutse bihatewe, ko “ahubwo ibyiza ni ukuhareka hagakorwa, hakaba ahantu h’ubukerarugendo.”

Biteganyijwe ko ibishanga bigenewe urwego rw’ubukerarugendo bizaterwamo indabo n’ubusitani, ”hagashyirwa n’imihanda y’imigenderano abantu bazajya batemberamo basoma ibitabo, mbese bikamera nka pariki”.

Yavuze ko hari n’igice kimwe cy’icyo gishanga kizashyirwamo ibyatsi biyungurura amazi ariko bisanzwe biba mu bishanga nk’urukangaga n’umuberanya “kugira ngo tuhakome.”

Ibyitwa ibishanga bikomye, ni ibibungabungwa gusa mu buryo butandukanye, ntibishyirwemo ibikorwa runaka cyangwa ngo biturwemo.

Minisitiri Mujawamariya yabwiye IGIHE ko mu mishinga itandukanye iteganyijwe kuzakorerwa mu gishanga cy’i Gikondo harimo n’uwo kuhashyira ikiyaga, byose bigamije guteza imbere ubukerarugendo buzahakorerwa.

Yatangaje kandi ko ibihingwa u Rwanda ruteganya kuzahinga muri bimwe mu bishanga by’Umujyi wa Kigali ari imboga n’imbuto, kuko amazi ahari ari make bityo ibihingwa nk’umuceri bisanzwe nabyo bihingwa mu bishanga bitahahingwa.

Ati “Ntaho dufite tuzahinga umuceri mu Mujyi wa Kigali. Turakangurira abantu guhinga imboga kurusha ibindi bintu byose [...] N’indabo ariko twazihinga kuko ni igihingwa ngengabukungu dushobora guhinga muri bimwe muri ibi bishanga tukabona amadovize.”

Kugeza ubu igishushanyo mbonera cyerekana uko uduce tw’ibishanga byose by’Umujyi wa Kigali tuzabyazwa umusaruro n’ibikorwa bigenewe buri gace ntikirashyirwa ahagaragara, ariko Minisitiri Mujawamarija yatangaje ko gihari cyamaze gukorwa.

Abari batuye mu bishanga by'i Kigali n’ibikorwa bifatwa nk’ibitemerewe kuhakorerwa cyangwa bibyangiza barimuwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .