Rusizi: Amazi y’amashyuza aherutse gukama ashobora kugaruka aho yahoze

Yanditswe na Sitio Ndoli
Kuya 28 Kanama 2020 saa 11:51
Yasuwe :
0 0

Ubuyobozi bw’Ikigo cy’Igihugu gishinzwe Mine, Gaz na Peteroli burahumuriza abaturage ko ahahoze amazi y’amashyuza yari asanzwe mu Murenge wa Nyakabuye, mu Karere ka Rusizi yakongera akagaruka kuko isoko yayo ntaho yagiye.

Ku wa Mbere w’iki cyumweru, amazi y’amashyuza yarakamye yimukira hafi y’uruganda rwa Cimerwa rukora sima, akajya atemba ajya mu Mugezi wa Rubyiro.

Aya mayobera yateye akababaro abaturage bahakuraga amaramuko binyuze mu gukanda abagiye kuhivuriza amavunane.

Impuguke mu bijyanye n’Ubumenyi bw’Isi, Dr Emmanuel Havugimana, yabwiye IGIHE ko ubushakashatsi bukiri gukorwa ariko we asanga gutemba kw’amashyuza byaba byaraturutse ku mitingito yabaye muri Repubulika Iharanira Demokarasi ya Congo n’u Burundi.

Itsinda ry’abakozi bo mu Kigo cy’Igihugu gishinzwe Mine, Gaz na Peteroli kuri uyu wa 27 Kanama 2020, ryagiye kureba ibivugwa n’abantu batandukanye ndetse naryo rikora ubushakashatsi ku byabaye.

Ngaruye Jean Claude ushinzwe Ubushakashatsi bw’Amabuye y’agaciro muri icyo kigo, yavuze ko iby’imitingito ntaho bihuriye nabyo kuko iyo biba n’isoko iba yarabuze.

Ati “Nasanze iby’imitingito nta ruhare rurimo kuko iyaba birimo isoko ntituba twayisanzemo, tuba twarasanze yararigise kandi irahari. Kubera imiterere yayo yashwanyaguje urutare iruhindura ibumba rugabanya imbaraga rwari rusanzwe rufite, byagura inzira y’amazi maze amanuka ajya mu mugezi.”

Aya amazi ari kumanuka aca aho Cimerwa iri gucukura amabuye. Ni imbogamizi cyane ku mikorere yayo ku buryo babagiriye inama yo gushaka uburyo ayo mazi yasubira aho yahoze.

Ngaruye Jean Claude yagize ati “Kuko amazi agihari twabagiriye inama ko bashaka inzobere bakabanza bagatiyura isayo ririmo kuko ryanatezaga impanuka, bahagirira isuku bagacukura bakagera ku rutare rukomeye ubundi bakazamura inkuta, ariya mazi bayahamisha hariya bakajya bayaruhukiraro nkuko byari bisanzwe ndetse ntanagire ingaruka ku bantu.”

Aya mazi yari asanzwe amanuka ashyushye yagera ahantu akaguma hamwe abantu bakabasha kuyoga no kuyikandisha kuko ngo yabavuraga amavunane. Mbere y’icyorezo cya COVID-19, wasangaga abantu ari benshi baje kuyivurizamo harimo n’abaturutse mu Burundi no muri Repubulika Iharanira Demokarasi ya Congo.

Abaturage babajwe nuko aho bakuraga amaramuko amazi ashyushye yigendeye
Kuva isoko igihari amazi ngo yagaruka aho yahoze ariko hagatunganywa
Ahari amashyuza hasigaye icyobo kirimo amabuye n'isayo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .