00:00:00 IGIHE NETWORK KN KINYARWANDA EN ENGLISH FR FRANCAIS

U Bwongereza bugiye gutangiza ikigega kizafasha Afurika guhangana n’imihindagurikire y’ibihe

Yanditswe na Dufitumukiza Salathiel
Kuya 11 Ukuboza 2021 saa 04:25
Yasuwe :

Guverinoma y’u Bwongereza ku bufatanye na Banki Nyafurika Itsura Amajyambere, igiye gutangiza Ikigega cyiswe “Room to Run” kizatera inkunga imishinga igamije guhangana n’ingaruka z’imihindagurikire y’ibihe muri Afurika.

Kizaba kirimo ishoramari rya miliyari ebyiri z’amadolari ya Amerika.

Minisitiri ushinzwe Afurika muri Minisiteri y’Ububanyi n’Amahanga y’u Bwongereza, Vicky Ford, yavuze ko ibibazo biterwa n’imihindagurikire y’ibihe atari ibyo mu bihe bizaza ahubwo ubu biri kwigaragaza kandi mu buryo buteye ubwoba.

Yagize ati “Ku batuye muri Afurika harimo n’u Rwanda, imipinduka z’ibihe si ingorane ku hazaza. Guhinduka kw’ikirere biragira ingaruka ziteye ubwoba ku batuye uyu Mugabane ubu ngubu.”

Yatanze ingero zirimo imyuzure yagize ingaruka ku barenga ibihumbi 600 muri Sudani mu 2021 gusa; inzige zateye Amajyaruguru ya Kenya zikona imyaka; n’imiyaga yahitanye abasaga igihumbi abandi miliyoni 2,6 bagasigara ntaho gukinga umusaya muri Mozambique, Zimbabwe na Malawi.

Hari kandi izuba ryinshi ryateye mu Majyepfo ya Afurika mu Mijyi ya Cape Town no mu Karere ka Sahel bikageza aho Ikiyaga cya Malawi gikama.

Ford yashimangiye ko u Bwongereza bwiyemeje gushyigikira ibihugu bya Afurika kwigobotora izo ngaruka buteza imbere ishoramari mu mishinga itandukanye ifasha kubungabunga ibidukikije, hanahangwa imirimo.

Yongeyeho ko uretse icyo Kigega, u Bwongereza buzanakomeza gushyigikira umushinga wa “Africa Adaptation Acceleration Program” witezweho kuzafasha Umugabane kwigobotora ingaruka za COVID-19, iz’imihindagurikire y’ibihe n’ihungabana ry’ubukungu rikabije mu myaka 25.

Intego yawo ni uko haboneka miliyari 25$ azashyigikira ibikorwa bigamije guhangana n’imihindagurikire y’ibihe mu bihugu bya Afurika.

Yakomeje ati “U Bwongereza buzakomeza gukora ubukangurambaga bw’ishoramari ry’abikorera mu mishinga ibungabunga ibidukikije, hashyigikirwa abagore n’abakobwa bafite ibyago byo kugerwaho cyane n’ingaruka z’imihindagurikire y’ibihe.”

Afurika ibarirwa hagati 2-3% by’imyuka yoherezwa mu kirere igihumanya. Ku rundi ruhande, ibihugu byayo biri mu bigerwaho cyane n’ingaruka z’imihandagurikire y’ibihe iterwa n’ubushyuhe budasanzwe kubera iyangirika ry’akayunguruzo k’izuba, cyane ko ibyinshi bidafite amikoro ahagije.

Ibihugu bikize byiyemeje guha ibikiri mu nzira y’Amajyambere miliyari 100$ abifasha mu guhangana n’imihindagurikire y’ibihe. Hamaze gutangwa 79,6%, hakagaragazwa ko mu 2023 bizaba byarageze ku 100%.

Imyuzure ni kimwe mu biza bikunze kwibasira u Rwanda mu bihe by'imvura nyinshi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .