Apple igiye gushyira ku isoko telefone zikoresha internet ya 5G

Yanditswe na Iradukunda Serge
Kuya 7 Ukwakira 2020 saa 10:43
Yasuwe :
0 0

Uruganda rukora ibikoresho by’ikoranabuhanga rwa Apple Inc, rwatangaje ko ruri mu myiteguro yo gushyira ku isoko telefone zigezweho zakira internet ya 5G.

Nk’uko uru ruganda rubitangaza, umuhango wo gushyira ku isoko izi telefone uzaba ku wa 13 Ukwakira, ube hifashishijwe uburyo bw’ikoranabuhanga.

Bloomberg yatangaje ko izi telefone zizaba ziri mu byiciro bibiri harimo into zifite ikirahure kireshya na 13,7 cm ndetse n’inini zifite icya 17 cm.

Izi telefone zizasohoka mu moko agera kuri ane kandi yose agire umwihariko wo kugira impande zifite inguni ziri kuri dogere 90 bitandukanye n’izari zisanzwe zisohoka kuko zo zarangwaga no kugira impande ziburungushuye. Izi telefone kandi zose zizaba zifite camera zivuguruye, ibintu bizaziha ubushobozi bwo gufata amafoto meza kurushaho.

Mu rwego rwo kurengera ibidukikije, amakuru avuga ko izi telefone nshya za Apple zizajya ziza nta mitwe ya chargeur (charging wall adapter) zifite nk’uko byari bisanzwe.

Gusa nubwo izi telefone zizamurikwa ku wa 13 Ukwakira, abahanga mu by’ubucuruzi bavuga ko zishobora kuzatinda kugera ku bantu ahanini bitewe n’imbogamizi zaje mu rwego rw’ubwikorezi kubera Covid-19.

Bizaba ari ubwa kabiri muri uyu mwaka Apple ishyize ku isoko ubwoko bushya bw’ibicuruzwa byayo, nyuma y’uko muri Nzeri yaherukaga gushyira ku isoko iPad Air, n’isaha ivuguruye.

Izi telefone nshya za Apple zakira internet ya 5G zije zikurikira iz’ibindi bigo bikomeye nka Samsung na Google zamaze kujya ku isoko.

iPhone nicyo gicuruzwa cya Apple kiyinjiriza amafaranga menshi, dore ko zinjiza agera kuri kimwe cya kabiri cy’ayo uru ruganda rwinjiza yose buri mwaka.

Muri uku kwezi Apple irashyira hanze telefone nshya zikoresha internet ya 5G

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .