00:00:00 IGIHE NETWORK KN KINYARWANDA EN ENGLISH FR FRANCAIS

Twitter igeze kure uburyo buzajya bufasha abantu gukosora aho bibeshye

Yanditswe na Zigiranyirazo Bajecteur
Kuya 12 April 2022 saa 09:10
Yasuwe :

Hashize iminsi mike hamenyekanye amakuru y’uko abakoresha urubuga rwa Twitter bagiye gushyirwa igorora bagahabwa uburyo buzajya bubafasha gukosora ubutumwa banditse mu gihe babonye ko harimo ikosa.

Ibi bikaba byitezwe nyuma y’uko ubusanzwe abakoresha uru rubuga iyo bakoraga ikosa ry’imyandikire uburyo rukumbi bari bafite ari ugusiba ubutumwa babaga bamaze kwandika.

Ubu buryo bwo gukosora ubutumwa butegerezanyijwe igishyika na benshi dore ko hari hanashize imyaka myinshi abakoresha uru rubuga babisaba nk’uko byemezwa na Jay Sullivan, umuyobozi ushinzwe abakiliya kuri Twitter.

Icyakora hari n’abandi batewe impungenge n’iyi gahunda kuko ngo ishobora kuzateza urujijo cyangwa ikanaha urwaho abahora barekereje baba bifuza gukora ibyaha byifashisha ikoranabuhanga.

Sullivan yatangaje ko imikorere izajya yifashishwa mu gukosora ubutumwa, izatangira kugeragezwa mu mezi make ari imbere ariko bikazatangirira ku bakoresha “Twitter Blue”, iyi ikaba ari serivisi y’uru rubuga igenewe abakoresha ifatabuguzi bishyura buri kwezi kuri Twitter.

Imirimo yo gutegura no kubaka ubu buryo bushya, yatangiye gukorwa mu mwaka ushize nk’uko ubuyobozi bwa Twitter bwabitangaje nubwo n’ubundi mu mpeshyi y’uwo mwaka, uwashinze uru rubuga, Jack Dorsey yari yatangaje ko hadakenewe ubu buryo bwo gukosora inyandiko umuntu yashyizeho.

Christina Wodtke wigisha ibya mudasobwa muri Kaminuza ya Stanford, unazwiho kuba yarakoze ku mishinga y’imbuga zikomeye nka LinkedIn, MySpace, Yahoo n’izindi, avuga ko n’ubwo iyi iba igaragara nk’impinduka nto ariko iba isaba ubwitonzi n’ubushishozi aho avuga ko nk’iyo ushyizeho ubutumwa nyuma ukagaruka ukagira ibyo uhinduramo , bishobora gutuma abari babutanzeho ibitekerezo bamera nk’abateshejwe gaciro.

Sullivan yavuze ko iyi “Button” yo kwifashishwa mu gihe umuntu yifuje gukosora cyangwa kugira ibyo ahinduka mubyo yari yanditse kuri Twitter, hakwiye kubaho ubunyangamugayo, umucyo n’ukuri kandi umuntu akaba afite igihe ntarengwa aba yemerewe kuba yakosora ubutumwa bwe nyuma yo kubwandika ndetse bikaba byanabasha kugenzurwa igihe iki gikorwa cyo gukosora inyandiko kibayeho.

Akomeza avuga ko kwemera gutangiza ubu buryo ari ukwiyemeza no kwemera kwirengera ibyavamo kuko bushobora gutuma uru rubuga rurushaho gukomera cyangwa rukaba rwatakarizwa icyizere rwari rusanzwe rufitiwe.

Imikorere y’iyi “Button” yo kuba umuntu yahindura icyo yanditse hari abiteze ko izaba igoye cyane kuyigenzura aho nka Yevgeniy Glovchenko wiga muri Kaminuza ya Copenhagen avuga ko adashyigikiye ishyirwaho ry’ubu buryo kabone n’ubwo bwaba bwifashishwe mu guhindura utuntu duto nka “live” igahindurwamo “love” kuko bishobora guhindura igitekerezo runaka cyanditswe kandi ikoranabuhanga ryifashisha ubwenge buhimbano rizwi nka AI (Artificial Intelligence) ritifitemo ububasha nk’ubw’umuntu mu gusesengura neza icyo nyirizina uwanditse ashaka kumvikanisha.

Abahanga batandukanye mu by’ikoranabuhanga bahuriza ku kuba ubu buryo bushya butaha rugali abakoresha Twitter ngo bajye bahindura cyane inyandiko zabo kuko bishobora kuzatera abantu urujijo cyangwa se bigatera akavuyo ku buryo gusobanukirwa ubutumwa bw’umwimerere bizajya bigorana cyane.

Twitter igeze kure uburyo buzajya bufasha abantu gukosora aho bibeshye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .