Robot y’Abanyamerika yageze kuri Mars nyuma y’urugendo rw’amezi arindwi

Yanditswe na Dufitumukiza Salathiel
Kuya 19 Gashyantare 2021 saa 10:39
Yasuwe :
0 0

Akanyamuneza ni kose ku bakozi b’Ikigo cy’Abanyamerika gikorera ubushakashatsi mu isanzure (NASA), nyuma y’uko mu ijoro ryo ku wa 18 Gashyantare 2021 robot yabo yoherejwe kuri Mars muri Nyakanga 2020 yahageze.

Saa yine n’iminota 55 z’ijoro ryo kuri uyu wa Kane nibwo robot ya NASA yahawe izina rya “Perseverance” yasoje urugendo rwa kilometero miliyoni 471,5 rwerekeza kuri uwo mubumbe utukura, yari yatangiye ku wa 30 Nyakanga umwaka ushize.

Ikihagera yahise itangira gufata amafoto kuri uwo mubumbe yifashishije camera yashyizweho imbere n’inyuma maze iyoherereza abashakashatsi ba NASA bari bicaye i California muri laboratwari yabo.

Mu minota irindwi nyuma y’uko ihageze, NASA yahise ishyira kuri Twitter amafoto Persevarance yohereje, hasobanurwa ko ari ayafatiwe ku kiyaga cya Jezero bivugwa ko kimaze imyaka iri hagati ya miliyari 3.5 na 4 kuri uwo mubumbe.

Perseverance ibaye robot ya gatanu y’icyo kigo igeze kuri Mars ariko ifite umwihariko itandukaniyeho n’izindi zahageze, harimo nko gucukura urutare rw’aho yifashijije imitobozo (percer) ikabika utuvungukira tunini [tungana n’ingwa] izagarukana abashakashatsi bakajya batwifashisha.

Mu itangazo NASA yageneye itangazamakuru, yanditse iti “Perseverance niyo robot ya mbere igiye kuzana utuvungukira tunini two kuri Mars tuzifashishwa muri gahunda z’ahazaza.”

“Bitandukanye n’izindi zayibanjirije nka Curiosity [yoherejweyo mu 2012) zazanaga utuvungukira duto cyane;Perseverance yo izajya icukura utujya kungana n’ingwa, itubika neza kugeza igihe izagarukira ku Isi.”

NASA kandi yashyize indege nto hejuru kuri iyo robot, hagamijwe ko yazagurutswa mu kirere cy’uwo mu bumbe nabyo bikabafasha mu nyigo zitandukanye. Ni ubwa mbere indege izaba igurukiye mu kirere cy’undi mubumbe utari Isi, hakaba hitezwe ko bizatanga amakuru y’ingenzi.

Intego nyamukuru ya Perseverance ni ugufasha NASA kumenya niba kuri Mars harigeze kuba ibinyabuzima mu myaka ya kera, ku buryo byafasha mu nyigo zikomeje gukorwa n’abahanga basuzuma ko ikiremwamuntu cyazahageza ibikorwa byacyo byanarimba kikahatura.

Biteganyijwe ko Perseverance izamara hafi imyaka ibiri mu bucukumbuzi kuri uwo mu bumbe.

Perseverance yageze kuri Mars hafi saa tanu z'ijoro ryo kuwa Kane
Perseverance ubwo yakorerwaga isuzuma muri laboratwari ya NASA i California
Amafoto y'ikiyaga cya Jezero yoherejwe na robot yaje mu ibara ry'umweru n'umukara
Abashakashatsi ba NASA babyina intsinzi nyuma y'uko Perverance yari igeze kuri Mars

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .