Messi yakinnye umukino wa mbere nyuma yo kwivumbura, Osaka yatwaye US Open, LA Lakers isezerera Rockets…agezweho mu mikino

Yanditswe na Eric Tony Ukurikiyimfura
Kuya 13 Nzeri 2020 saa 11:04
Yasuwe :
0 0

Lionel Messi yongeye gukinira FC Barcelone nyuma y’uko mu mpera z’ukwezi gushize yari yatangaje ko ashaka kuyivamo, ariko bikarangira yemeye kuzayikinira mu mwaka utaha w’imikino wa 2020/21.

Uyu rutahizamu w’imyaka 33, yagaragaye mu mukino wa gicuti FC Barcelone yatsinzemo Gimnastic de Tarragona yo mu Cyiciro cya Gatatu, ibitego 3-1.

Lionel Messi byemejwe ko azakomeza kuba kapiteni wa FC Barcelone, yatangiye uyu mukino, ariko asimburwa igice cya mbere kirangiye nk’uko byagenze no ku bandi.

Ousmane Dembélé ni we wafunguye amazamu ku ruhande rwa FC Barcelone, ibindi bitego bitsindwa na Antoine Griezmann na Philippe Coutinho kuri za penaliti.

FC Barcelone izatangira Shampiyona ya Espagne ku wa 27 Nzeri, yakira Villarreal.

Lionel Messi yagaragaye mu mukino wa gicuti FC Barcelone yakinnye ku wa Gatandatu

=======================================================

Naomi Osaka yegukanye US Open 2020

Umuyapanikazi Naomi Osaka ni we wegukanye irushanwa rya Tennis rya US Open 2020 nyuma yo gutsinda Vitoria Azarenka 1-6 6-3 6-3 ku mukino wa nyuma wabaye ku wa Gatandatu.

Ni ku nshuro ya kabiri uyu mugore w’imyaka 22, nomero ya kane ku Isi, yegukanye irushanwa rya US Open mu gihe ari ‘Gland Slam’ ya gatatu yegukanye nyuma yo gutwara Australian Open mu 2019, umwaka umwe nyuma yo kwegukana US Open ye ya mbere.

Wari umukino wa nyuma kuri Azalenka w’imyaka 31 kuva muri 2013.

Ubwo yageraga ku kibuga, Naomi Osaka, yari yambaye agapfukamunwa kariho amazina Tamir Rice, umwana w’imyaka 12 warashwe na polisi agapfa, ubwo yakinishaga imbunda y’igikinisho muri Leta ya Ohio muri 2014.

Umukino wa nyuma mu bagabo uteganyijwe kuri iki Cyumweru, urahuza Umunya-Autriche Dominic Thiem n’Umudage Alexander Zverev guhera saa yine z’ijoro.

Naomi Osaka yegukanye US Open ku nshuro ya kabiri, iba Grand Slam ya gatatu yegukanye
Naomi Osaka w'imyaka 22, yaryamye mu kibuga nyuma yo gutsinda uyu mukino wa nyuma yabanje gutsindwamo iseti ya mbere

=======================================================
NBA: LeBron James yafashije Los Angeles kugera ku mukino wa nyuma mu Burengerazuba

LeBron James yatsinze amanota 29, afasha Los Angeles Lakers gutsinda Houston Rockets 119-96 mu mukino wa gatanu wa ½ cya play-offs zo mu gace k’Iburengerazuba.

Los Angeles Lakers yongeye kugera ku mukino wa nyuma mu Burengerazuba ku nshuro ya mbere kuva muri 2010, aho yasezereye Houston Rockets ku mikino 4-1.

Ubwo Lakers yaherukaga kugera muri iki cyiciro, nibwo yafashijwe na nyakwigendera Kobe Bryant kwegukana igikombe cya NBA muri 2010.

Los Angeles Lakers izahura n’ikipe ikomeza hagati ya Los Angeles Clippers na Denver Nuggets, aho Clippers iyoboye n’imikino 3-2.

LeBron James yafashije LA Lakers kugera ku mukino wa nyuma wa play-offs zo mu Burengerazuba nyuma y'imyaka 10

=======================================================

Soren Kragh Andersen yegukanye agace ka 14 ka Tour de France 2020

Umunya-Denmark, Soren Kragh Andersen ukinira Sunweb, yegukanye agace ka 14 ka Tour de France 2020 nyuma yo gukoresha amasaha ane, iminota 28 n’amasegonda 10.

Muri aka gace kahagurukiye i Clermont-Ferrant kerekeza i Lyon ku ntera y’ibilometero 194, Soren Kragh Anderson yavuye muri bagenzi be mu bilometero bitatu bya nyuma, abasiga amasegonda 15.

Primož Roglić yakomeje kwambara umwenda w’umuhondo n’ikinyuranyo cy’amasegonda 44.

Umufaransa Romain Bardet ntiyatangiye agace ka 14 nyuma y’uko agize ikibazo mu mutwe, bagasanga yaraviriyemo imbere nubwo bidakabije.

Kuri iki Cyumweru nibwo hakinwa agace ka 15, aho abakinnyi bakora intera y’ibilometero 174.5.

Abakinnyi batanu ba mbere mu gace ka 14

  1. Soren Kragh Andersen (Den/Team Sunweb) 4:28’ 10”
  2. Luka Mezgec (Slo/Mitchelton-Scott) +15”
  3. Simone Consonni (Ita/Cofidis) ibihe bimwe
  4. Peter Sagan (Svk/Bora-Hansgrohe)
  5. Casper Pedersen (Den/Team Sunweb)

Urutonde rusange nyuma y’agace ka 14

  1. Primož Roglić (Slo/Jumbo-Visma) 61:03’ 00”
  2. Tadej Pogacar (Slo/UAE Team Emirates) +44”
  3. Egan Bernal (Col/Ineos Grenadiers) +59”
  4. Rigoberto Uran (Col/EF Pro Cycling) +1’ 10”
  5. Nairo Quintana (Col/Arkea-Samsic) +1’ 12”
Soren Kragh Andersen yegukanye agace ka 14 ka Tour de France 2020

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .