PSG yatangiye Shampiyona nabi, Serena Williams yasezerewe, LA Lakers itsinda Rockets…agezweho mu mikino hanze

Yanditswe na Eric Tony Ukurikiyimfura
Kuya 11 Nzeri 2020 saa 01:33
Yasuwe :
0 0

Paris Saint-Germain yatwaye igikombe cya Shampiyona giheruka mu Bufaransa, yatangiye nabi iya 2020/21, itsindwa na Racing Lens yavuye mu Cyiciro cya Kabiri igitego 1-0.

PSG yakinnye uyu mukino wabaye ku wa Kane, idafite abakinni barindwi bakomeye barimo Angel Di Maria, Neymar na Kylian Mbappé banduye Coronavirus.

Lens yungukiye ku makosa y’umunyezamu Marcin Bulka, itsinda igitego kimwe rukumbi cyatsinzwe na Ignatius Ganago muri uyu mukino wabereye imbere y’abafana 5000 kuri Stade Bollaert-Delelis.

Paris Saint-Germain izasubira mu kibuga ku Cyumweru, ihura na Marseille mu gihe hategerejwe kureba niba hari abakinnyi bayo bazaba bakize.

Paris Saint-Germain yaburaga benshi mu bakinnyi babanzamo, yatsinzwe umukino wayo wa mbere muri Ligue 1

===================================================

Tour de France 2020: Marc Hirschi yegukanye agace ka 12

Umusuwisi Marc Hirschi ukinira Sunweb, yegukanye agace ka 12 ka Tour de France 2020 nyuma yo gukoresha amasaha atanu, iminota umunani n’amasegonda 49.

Hirschi w’imyaka 22, yegukanye aka gace kareshyaga n’ibilometero 218, kahagurukiye i Chauvigny kagasorezwa i Sarran ku wa Kane.

Umunya-Slovenie Primož Roglić yakomeje kwambara umwambaro w’umuhondo, aho amaze gukoresha amasaha 51, iminota 26 n’amasegonda 43.

Kuri uyu wa Gatanu, hakinwe agace ka 13 kahagarukiye i Chatey-Guyon kerekeza i Puy Mary ku ntera y’ibilometero 191.5.

Abakinnyi batanu ba mbere mu gace ka 12

  1. Marc Hirschi (Swi/Sunweb) 5:08’49"
  2. Pierre Rolland (Fra/B&B Hotels-Vital Concept) +47"
  3. Soren Kragh Andersen (Den/Sunweb) +52"
  4. Quentin Pacher (Fra/B&B Hotels-Vital Concept) ibihe bimwe
  5. Jesus Herrada (Spa/Cofidis)

Urutonde rusange nyuma y’agace ka 12

  1. Primož Roglić (Slo/Jumbo-Visma) 51:26’43"
  2. Egan Bernal (Col/Ineos Grenadiers) +21"
  3. Guillaume Martin (Fra/Cofidis) +28"
  4. Romain Bardet (Fra/AG2R-La Mondiale) +30"
  5. Nairo Quintana (Col/Arkea-Samsic) +32"
Marc Hirschi yegukanye agace ka 12 ka Tour de France 2020

===================================================

NBA: LA Lakers yongeye gutsinda Houston Rockets

Los Angeles Lakers yateye intambwe igana ku mukino wa nyuma wa play-offs mu Burengerazuba nyuma yo gutsinda Houston Rockets amanota 110-100 mu mukino wabaye kuri uyu wa Gatanu mu rukerera.

Lakers yayoboye n’imikino 3-1 muri irindwi ishoboka muri ½.

Iyi kipe yabifashijwemo n’abarimo Anthony Davis watsinze amanota 29 na LeBron James watsinzemo 16, ishobora kugera ku mukino wa nyuma ku nshuro ya mbere mu myaka 10 mu gihe yatsinda umukino wa gatanu ku wa Gatandatu.

Russell Westbrook watsinze amanota 25 na James Harden watsinze 21, nibo batsinze amanota menshi ku ruhande rwa Houston Rockets.

Los Angeles Lakers nta gikombe cya Shampiyona irongera kwegukana kuva mu 2010 ndetse ishobora kugera ku mukino wa nyuma mu Burengerazuba, aho izahura n’izakomeza hagati ya Los Angeles Clippers na Denver Nuggets.

LeBron James na Anthony Davis bafashije LA Lakers gutsinda Houston Rockets mu mukino wa kane

===================================================

US Open 2020: Serena Williams yasezerewe na Victoria Azarenka

Serena Williams ukomeje gushaka uko yegukana igikombe cya ‘Gland Slam’ cya 24, yasezerewe muri US Open 2020 nyuma yo gutsindwa n’Umunya-Bélarus Victoria Azalenka 1-6 6-3 na 6-3.

Uyu mugore wigeze kuba nimero ya mbere ku Isi, yatangiye kugorwa mu ntangiriro z’iseti ya gatatu, aho yagize imvune mu kirenge.

Serena Williams uzuza imyaka 39 mu kwezi gutaha, nta rushanwa rikomeye arwatara kuva muri 2017 yegukana Australian Open ndetse icyo gihe akaba yari atwite inda y’ibyumweru umunani.

Azalenka wegukanye Australian Open inshuro ebyiri, azahura ku mukino wa nyuma wa US Open na Naomi Osaka watwaye iri rushanwa mu 2018.

Umuyapanikazi Naomi Osaka, nimero ya kane ku Isi, yageze ku mukino wa nyuma uzaba ku wa Gatandatu, atsinze Umunyamerikakazi Jennifer Brady 7-6 (7-1)3-6 6-3.

Serena Williams yasezerewe muri 1/2 cya US Open 2020

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .