CAN 2019: Sénégal yasezereye Uganda, Maroc ikurwamo na Bénin muri 1/8

Yanditswe na Eric Tony Ukurikiyimfura
Kuya 6 Nyakanga 2019 saa 08:13
Yasuwe :
0 0

Imikino ya 1/8 cy’Igikombe cya Afurika yatangiye kuri uyu wa Gatanu yagaragayemo gutungurana gukomeye mu mukino wahuje Maroc na Bénin, aho Abarabu basezerewe kuri penaliti mu gihe Sénégal yageze muri ¼ itsinze Uganda igitego 1-0.

Maroc yari imwe mu makipe ahabwa amahirwe yo kwegukana iri rushanwa ry’uyu mwaka dore ko inatozwa na Hervé Renard, umutoza umwe rukumbi umaze kwegukana iki gikombe mu makipe abiri atandukanye (Zambie 2012 na Côte d’Ivoire 2015) mu gihe kiri gukinirwa ku nshuro ya 32.

Bénin yarenze amatsinda nta mukino n’umwe itsinze, yafunguye amazamu ku munota wa 53 ku gitego cya Moïse Adilehou wahawe umupira na Cebio Soukou mu gihe Maroc byayisabye gutegereza umunota wa 76, yishyurirwa na Youssef En-Nesyri wacomekewe umupira na Mbark Boussoufa.

Mu minota y’inyongera, Oussama Idrissa yakoreye ikosa kuri rutahizamu wa Maroc mu rubuga rw’amahina, hatangwa penaliti yahawe na Hakim Ziyech, ayiteye ifata izamu igaruka ahagana muri koruneri mu gihe umunyezamu wa Bénin yari yagiye mu rundi ruhande.

Amakipe yombi yasoje umukino anganya igitego 1-1, yongezwa indi minota 30 na yo itagize icyo itanga n’ubwo Bénin yabonyemo ikarita itukura ubwo Khaled Adenon yahabwaga umuhondo wa kabiri.

Hitahajwe penaliti, Bénin itsinda umukino kuri 4-1, ikomeza muri ¼ nta mukino n’umwe itsinze mu minota isanzwe y’umukino mu gihe Maroc na yo yasezerewe nta mukino n’umwe itsinzwe mu minota isanzwe y’umukino.

Mu wundi mukino wa ¼ wabaye saa 21:00, Sénégal yakomeje isezereye Uganda nyuma yo kuyitsinda igitego 1-0 cyatsinzwe na Sadio Mané ku munota wa 15 ubwo yari ahawe umupira mwiza na M’Baye Niang, aroba umunyezamu Denis Onyango.

Uyu rutahizamu wa Liverpool yahushije penaliti ya kabiri mu Gikombe cya Afurika cy’uyu mwaka, ubwo yari amaze gukorerwa ikosa na Onyango washoboraga kubona umuhondo wa kabiri ku munota wa 61, Sadio Mané ayiteye ikurwamo n’uyu munyezamu wa Uganda.

Farouk Miya na Emmanuel Okwi babonye amahirwe yashoboraga gutuma Uganda yishyura igitego yatsinzwe na Sénégal, ariko umunyezamu Alfred Gomis, ababera ibamba, akuramo imwe mu mipira bateye mu izamu.

Imikino ya 1/8 irakomeza kuri uyu wa Gatandatu, aho Nigeria ikina na Cameroun saa 18:00 mu gihe Misiri yakiriye irushanwa, yisobanura na Afurika y’Epfo guhera saa 21:00.

Abakinnyi ba Maroc ntibiyumvishaga uburyo basezerewe
Byari ibyishimo ku nkima za Benin (nk'uko bayita) nyuma yo gusezerera Maroc
Herve Renard yari ategerejweho gukomeza gukora amateka muri iri rushanwa, ariko asezerewe hakiri kare
Onyango yakoreye ikosa kuri Sadio Mane mu gice cya kabiri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .