Abafana bazasubira ku bibuga mu Bwongereza muri Gicurasi

Yanditswe na Eric Tony Ukurikiyimfura
Kuya 23 Gashyantare 2021 saa 09:31
Yasuwe :
0 0

Abafana bagera ku bihumbi 10 bashobora kwemererwa gusubira ku bibuga byo mu Bwongereza bitarenze hagati muri Gicurasi nk’imwe mu ngamba zafashwe na guverinoma y’icyo gihugu zo kugikura muri gahunda ya Guma mu Rugo.

Ku wa Mbere, Minisitiri w’Intebe w’u Bwongereza, Boris Johnson, yatangaje gahunda igabanyije mu byiciro bine ikubiyemo uburyo bwo koroshya ingamba za Guma mu Rugo yatewe n’icyorezo cya COVID-19.

Imikino ikinirwa ahantu hafunguye irimo umupira w’amaguru, Golf na Tennis izemererwa gusubukura guhera tariki ya 29 Werurwe 2021.

Gahunda yo koroshya uburyo bwa guma mu rugo izashingira ku gupima inshuro enye nyuma yo gutanga urukingo, uko umubare w’ubwandu uzaba uhagaze ndetse hakarebwa n’uko ubwoko bushya bwa COVID-19 buhagaze.

Boris Johnson yavuze ko ibikorwa birimo inzu z’imyidagaduro, gyms na pisine bishobora kuzafungura guhera ku wa 12 Mata 2021 mu gihe byaherukaga gufungwa ku wa 4 Mutarama ubwo hashyirwagaho Guma mu Rugo.

Guverinoma y’u Bwongereza yavuze ko abafana bake bashobora kwemererwa kureba amarushanwa amwe kugira ngo hasuzumwe uko ingamba zubahirizwa, ayo arimo umukino wa nyuma wa Carabao Cup uzaba ku wa 25 Mata mu gihe gahunda zapanzwe zishobora gusiga abagera ku bihumbi 10 cyangwa 25% by’abicara muri stade bemerewe kureba imikino nyuma ya tariki ya 17 Gicurasi 2021.

Ibi bisobanuye ko umukino wa nyuma wa FA Cup uzabera i Wembley ku wa 15 Gicurasi uzabera mu muhezo nk’uko byagenze muri Kanama 2020, ariko mu isozwa rya Premier League izarangira ku wa 23 Gicurasi bashobora kwitabira.

Andi marushanwa arimo Euro 2020 izaba hagati ya tariki ya 11 Kamena n’iya 11 Nyakanga, Wimbledon izaba hagati ya tariki ya 28 Kamena n’iya 11 Nyakanga na British Grand Prix ya Formula 1 izaba ku wa 18 Nyakanga, ashobora kwitabirwa n’abafana.

Minisitiri w'Intebe w'u Bwongereza, Boris Johnson, yatangaje ingamba zizakurikizwa mu rwego rwo gusohoka muri gahunda ya Guma mu Rugo
Abafana bagera ku bihumbi 10 bashobora kwemeerwa kujya ku mikino nyuma ya tariki ya 17 Gicurasi
Kuri ubu, imikino ibera mu muhezo mu rwego rwo kwirinda ikwirakwira rya COVID-19
Euro 2020 izabera mu bihugu bitandukanye birimo n'u Bwongereza, ishobora kwitabirwa n'abafana mu mpeshyi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .