Abakinnyi 16 b’Amavubi bapimwe COVID-19 mbere yo gutangira umwiherero (Amafoto)

Yanditswe na Eric Tony Ukurikiyimfura
Kuya 9 Ukwakira 2020 saa 07:59
Yasuwe :
0 0

Mu gitondo cyo kuri uyu wa Gatanu, ku Cyicaro cy’Ishyirahamwe ry’Umupira w’Amaguru mu Rwanda (FERWAFA) i Remera, abakinnnyi b’Amavubi bapimwe icyorezo cya COVID-19 mbere yo kujya mu mwiherero wo kwitegura imikino ibiri izahuza u Rwanda na Cap-Vert mu kwezi gutaha.

Amavubi y’u Rwanda azabanza kwakirwa n’Ikipe y’Igihugu ya Cap-Vert tariki ya 13 Ugushyingo mu mukino w’umunsi wa gatatu wo mu itsinda F ryo gushaka itike ya CAN 2022 izabera muri Cameroun.

Umukino wo kwishyura, uw’umunsi wa kane mu itsinda, uzabera i Kigali ku wa 17 Ugushyingo 2020.

Ku wa Gatatu nibwo umutoza w’Amavubi, Mashami Vincent, yahamagaye abakinnyi 37 biyongeraho abandi 11 bo ku rutonde rwo gutegereza.

Abakinnyi 16 bapimwe kuri uyu wa Gatanu ni abahamagawe muri 37 badakinira APR FC, AS Kigali cyangwa ngo bakine hanze, kongeraho abandi bo mu rutonde rwo gutegereza badakina muri ibyo byiciro uko ari bitatu.

Nyuma yo gupimwa COVID-19, bapimwe kandi ibilo mu rwego rwo kumenya uko imibiri yabo ihagaze mbere yo gutangira imyitozo.

Abapimwe ni: Kimenyi Yves, Kwizera Olivier, Rugwiro Hervé, Iradukunda Eric, Aimable Nsabimana, Mico Justin, Twizerimana Martin Fabrice, Nshuti Savio Dominique, Iradukunda Jean Bertrand, Usengimana Faustin, Sibomana Patrick "Pappy’’, Rutanga Eric, Ngendahimana Eric, Iyabivuze Osée, Twizerimana Onesme, Sugira Ernest ndetse n’abatoza b’ikipe y’Igihugu barangajwe imbere na Mashami Vincent.

Amavubi yerekeje mu mwiherero kuri uyu wa Gatanu i Nyamata mu Bugesera, aho azajya akorera imyitozo kur Stade ya Bugesera kugeza tariki ya 19 Ukwakira, bafate akaruhuko gato.

Bazongera gusubira mu mwiherero ku wa 25 Ukwakira, aho byitezweho ko ari nabwo hazitabira abakinnyi ba APR FC na AS Kigali zamaze gutangira imyitozo zitegura imikino Nyafurika zizakina mu kwezi gutaha.

Biteganyijwe ko kuva icyo gihe ari nabwo hazatangira kwitabira bamwe mu bakinnyi 11 bakina hanze bahamagawe.

U Rwanda ni urwa nyuma mu itsinda F n’amanota 0, ni nyuma y’uko rutsinzwe na Mozambique ibitego 2-0 ndetse na Cameroun igitego 1-0 mu mikino ibiri imaze gukinwa, yombi yabaye mu Ugushyingo 2019.

Umunyezamu Kwizera Olivier apimwa COVID-19
Kapiteni wa Rayon Sports, Rugwiro Hervé ni umwe mu bakinnyi batatu b'iyi kipe bahamagawe mu Amavubi
Iyabivuze Osée yongeye kugirirwa icyizere na Mashami Vincent
Iradukunda Bertrand ari mu bakinnyi 11 bahamagawe ku rutonde rw'abazafasha abandi imyitozo
Rutanga Eric apimwa COVID-19
Sibomana Patrick na we ari mu bakinnyi batangiranye n'abandi umwiherero
Usengimana Faustin apimwa COVID-19
Nshuti Dominique Savio ukinira Police FC, na we ari mu bakinnyi bapimwe
Mico Justin apimwa COVID-19
Umunyezamu wa mbere w'Amavubi, Kimenyi Yves, apimwa COVID-19
Umutoza mukuru w'Amavubi, Mashami Vincent, asuhuzanya na Kirasa Alain umwungirije
Umutoza Mashami Vincent apimwa COVID-19
Ngendahimana Eric ahagaze ku munzani, bareba ibilo bye uko bihagaze
Sibomana Patrick na bagenzi be bapimwe kandi ibilo nyuma yo gupimwa COVID-19
Abakinnyi 16 nibo batangiranye umwiherero n'Amavubi kuri uyu wa Gatanu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .