00:00:00 IGIHE NETWORK KN KINYARWANDA EN ENGLISH FR FRANCAIS

Abakinnyi ba PSG bibasiwe n’amabandi yafashe umuryango wa Di Maria nk’imbohe

Yanditswe na Bukuru JC
Kuya 15 Werurwe 2021 saa 02:24
Yasuwe :
0 0

Angel Di Maria yaraye asimbujwe mu mukino Paris Saint-Germain yatsinzwemo na Nantes ibitego 2-1 nyuma y’uko umuryango we watewe n’amabandi mu Mujyi wa Paris.

Ubwo umukino wabaga, Umuyobozi wa Siporo muri PSG, Leonardo, yagaragaye avugira kuri telefoni mu gice cya kabiri ndetse nyuma yo kuvugana n’umutoza Mauricio Pochettino, Di Maria yahise asimbuzwa Leandro Paredes ku munota wa 62.

Ubwo Di Maria yari amaze gusohoka mu kibuga, yongorewe na Pochettino mbere yo gukomeza agana mu rwambariro.

Ikinyamakuru RMC cyo mu Bufaransa, cyatangaje ko Di Maria yasimbujwe kubera ‘impamvu bwite zikomeye’ nyuma y’uko umuryango we watewe n’amabandi i Paris.

Byatangajwe ko abagize umuryango wa Di Maria bari iwe mu rugo ubwo habaga ubujura ndetse hari amakuru avuga ko bari bafashwe nk’imbohe. Muri iki gikorwa hanabayemo ubugizi bwa nabi.

Nyuma, Marca yatangaje ko umuryango wa Di Maria utigeze ubabazwa ariko wari wafashwe nk’imbohe.

Hari ibikoresho byari mu kabati byibwe ndetse itsinda rya polisi rishinzwe gukurikirana ibijyanye n’ubujura ryoherejwe mu gace ka Neuilly-sur Seine uyu mukinnyi atuyemo.

RMC yatangaje ko abandi bakinnyi ba PSG babwiwe ibyabaye kuri Di Maria nyuma y’umukino bakumirwa ndetse no mu rugo rw’ababyeyi ba Marquinhos hari abandi bajura bahateye.

Uyu myugariro ukomoka muri Brésil, na we yari mu kibuga ku Cyumweru ariko ntiyigeze asimbuzwa.

Si ku nshuro ya mbere Di Maria atewe n’amabandi kuko byigeze kuba ubwo yakiniraga Manchester United mu 2015.

Kuba abajura basigaye bibasira ingo z’abakinnyi muri Paris n’i Burayi muri rusange bimaze gufata indi ntera muri iyi myaka.

Mu 2019, byabaye kuri Dani Alves naho mu 2018 biba kuri Eric Maxim Choupo-Moting na Thiago Silva, bose ubwo bakiniraga PSG.

Leonardo (hejuru) yagaragaye avugana na Pochettino (hasi, hagati) mbere yo gusimbuzwa kwa Di Maria
Umutoza Mauricio asobanurira Di Maria impamvu yamusimbuje
Ibinyamakuru bitandukanye byatangaje ko umuryango wa Di Maria wari wafashwe nk'imbohe
Ababyeyi ba Marquinhos na bo bafashwe n'amabandi yateye urugo rwabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .