Emerick Aubameyang yongereye amasezerano muri Arsenal

Yanditswe na IGIHE
Kuya 15 Nzeri 2020 saa 07:16
Yasuwe :
0 0

Umunya-Gabon, Pierre-Emerick Aubameyang, yongereye amasezerano y’imyaka itatu akinira Arsenal FC yo mu Bwongereza.

Uyu rutahizamu w’imyaka 31 ari mu bahagaze neza muri Arsenal kuko mu mikino 86 yayikiniye muri Shampiyona y’u Bwongereza, Premier League yatsinze ibitego 55.

Pierre-Emerick Aubameyang usanzwe ari Kapiteni wa Arsenal FC, yari afite amasezerano agomba kurangira mu mpera z’umwaka w’imikino.

Uyu mukinnyi yatsinze igitego kimwe ku mukino ufungura Shampiyona warangiye Arsenal itsinze Fulham 3-0 ku wa Gatandatu. Icyo gihe Umutoza wa Arsenal, Mikel Arteta yaciye amarenga ko Aubameyang ari hafi gusinya amasezerano.

Nyuma yo gushyira umukono ku masezerano mashya, Aubameyang yavuze ko icyemezo cyo gusinyira ikipe ye afata nk’idasanzwe atigeze abishidikanyaho.

Ati “Kubera abafana bacu, bagenzi banjye, umuryango wanjye na buri wese muri iyi kipe bituma niyumva hano.’’

“Nizerera muri Arsenal. Dushobora kugera kuri byinshi dufatanyije. Dufite ibidasanzwe hano kandi nizera ko ibyiza biri imbere kuri Arsenal.’’

Mu byifuzo bye, Aubameyang yavuze ko yifuza gusiga izina rikomeye muri Arsenal nkuko byakozwe n’ibyamamare nka Thierry Henry, Ian Wright, Tony Adams na Dennis Bergkamp.

Ati “Nabonye abakinnyi bahebuje, abakinnyi bafite umuhate. Abakinnyi basoje shampiyona badatsinzwe. Mfite inzozi zo kuba nkabo, kuba mu beza no kuguma ku mitima y’abafana ubuziraherezo.’’

Aubameyang yatsinze ibitego 22 muri Shampiyona y’umwaka ushize muri Premier League, anafasha iyi kipe yo mu Mujyi wa London gutwara FA Cup, itsinze Chelsea Fc ibitego 2-1, byayihesheje itike yo gukina Europa League.

Kuva muri Mutarama 2018, Aubameyang avuye muri Borussia Dortmund yerekeza muri Arsenal, amaze gutsinda ibitego 55 mu mikino 86 ya Premier League.

Ni agahigo yihariye kuko uhereye igihe yagereye mu Bwongereza, Aubameyang ni we umaze gutsinda ibitego byinshi, 72 mu mikino 111.

Rutahizamu Pierre Emerick Aubameyang yongereye amasezerano muri Arsenal

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .