Hari abakoze nk’abadafite intego- Mashami ku bakinnyi b’Amavubi babyibushye

Yanditswe na Eric Tony Ukurikiyimfura
Kuya 12 Ukwakira 2020 saa 07:59
Yasuwe :
0 0

Umutoza w’Ikipe y’Igihugu ‘Amavubi’, Mashami Vincent, yavuze ko urwego yasanzeho abakinnyi bari mu mwiherero atari rubi, ariko avuga ko hari abiyongereye ibilo cyane ku buryo muri ibi bihe bya Coronavirus bakoraga nk’abadafite intego.

Amavubi yatangiye umwiherero mu cyumweru gishize, yitegura imikino ibiri azahuramo n’Ikipe y’Igihugu ya Cap-Vert mu matsinda yo gushaka itike ya CAN 2022 izabera muri Cameroun.

Umutoza Mukuru, Mashami Vincent, avuga ko nyuma y’iminsi ibiri yakoresheje abakinnyi bigoye kuvuga ko hari urwego bagezeho kuko bari bamaze hafi amezi arindwi badakora, aho yemeje ko hari abo basanze barabyibushye ku buryo bigaragara ko iyo bikoreshaga imyitozo, bakoraga nta ntego.

Ati “Ngira ngo rero icyo dukomeza gukora ni ugukoresha aba basore, ariko ikigaragara ni uko batameze nabi cyane, bari bamaze igihe bakora ku giti cyabo, badakora nk’ikipe.”

“Bakoraga ibintu bidafite igihe bitangirira n’igihe biri burangirire, urabona ko hari abiyongereye ibilo, harimo abataragaruka neza, tumaze iminsi ibiri dukora ibijyanye no kongera imbaraga.”

“Icyizere kirahari, ni yo mpamvu tubabwira ko bagerageje kwirwanaho nubwo twari mu bihe bitoroshye, urabona ko hari abakomeje gukora bafite gahunda, ariko hari n’abakoze ubona ko nta ntego bari bafite. Ntabwo ari uguhera kuri zero, turahera ku byo bafite, tugire ibyo tubongerera kugira ngo basubire mu bihe bahozemo.”

Mashami wamaze kwakira abakinnyi batandatu bavuye muri AS Kigali, yavuze ko nubwo 10 bakina hanze n’aba APR FC 11 bataraza, hari icyizere cyo kuzitwara neza imbere ya Cap-Vert.

Ati “Nta mbogamizi zihari kuko wahera no ku bakina hanze, bafite amategeko mpuzamahanga abagenga, nta rirarenga, ntabwo twavuga ko byacitse aka kanya kuko nta bakinnyi ba APR dufite kimwe n’abo hanze, ariko bose bafite igihe bazazira mu mwiherero.”

“Abahari nabo barakora neza, aba APR barimo barakora neza, kandi n’abakina hanze nabo turabakurikirana bameze neza, turahanahana amakuru.”

Biteganyijwe ko abakinnyi bo muri APR FC bazitabira umwiherero w’Ikipe y’Igihugu guhera tariki ya 25 Ukwakira mu gihe abakina hanze bazahagera nyuma bitewe n’uburyo bazarekurwamo n’amakipe yabo.

Amavubi azabanza kwakirwa n’Ikipe y’Igihugu Cap-Vert tariki ya 13 Ugushyingo mu gihe umukino wo kwishyura uzabera i Kigali tariki ya 17 Ugushyingo 2020.

U Rwanda ni urwa nyuma mu itsinda F n’amanota 0, ni nyuma y’uko rutsinzwe na Mozambique ibitego 2-0 ndetse na Cameroun igitego 1-0 mu mikino ibiri imaze gukinwa, yombi yabaye mu Ugushyingo 2019.

Umutoza w'Amavubi, Mashami Vincent, avuga ko hari abakinnyi biyongereye ibilo
Abakinnyi ba AS Kigali basanze bagenzi babo mu mwiherero w'Ikipe y'Igihugu
Hakizimana Muhadjiri mu myitozo y'Ikipe y'Igihugu Amavubi
Amavubi ari kwitegura Cap-Vert ntarimo abakina hanze n'abo muri APR FC
Ndayishimiye Eric 'Bakame' ni umwe mu banyezamu batatu bari mu myitozo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .