Ikipe yo mu Budage yatsinzwe ibitego 37-0 kubera kubahiriza intera hagati y’umukinnyi n’uwo bahanganye

Yanditswe na Eric Tony Ukurikiyimfura
Kuya 19 Nzeri 2020 saa 08:09
Yasuwe :
0 0

Ikipe yo mu cyiciro cy’abatarabigize umwuga mu Budage yatsinzwe ibitego 37-0 mu mukino wabaye ku Cyumweru, aho yakinaga na SV Holdenstedt II, kubera kubahiriza gusiga intera hagati y’umukinnyi n’uwo bahanganye nk’imwe mu ngamba zo kwirinda ikwirakwira ry’icyorezo cya Coronavirus.

SG Ripdorf/Molzen II yo mu cyiciro cya 11 mu mupira w’amaguru mu Budage, yakinishije abakinnyi barindwi gusa kuko yari ifite impungenge ko iyo bigiye guhura ishobora kwanduza abakinnyi bayo COVID-19.

Umuyobozi mukuru wa Ripdorf; Patrick Ristow, yabwiye CNN ko abakinnyi ba Holdenstedt bahuye n’umukinnyi wagaragaweho Coronavirus mu mukino yaherukaga gukina, bityo bakaba barumvaga badatekanye ubwo bakinaga n’iyi kipe yamaze ibyumweru bibiri mu kato.

Yakomeje avuga ko bari bagerageje gusubika umukino, ariko Holdenstedt ivuga ko nta mpamvu yabyo kuko abakinnyi bayo bari basanze ari bazima nyuma yo gusuzumwa.

Umutoza wa Holdenstedt, Florian Schierwater yabwiye Altmark Zeitung ko “Nta cyari gutuma umukino ukurwaho” kuko nta mukinnyi wigeze yegerana n’umuntu wanduye.

Abakinnyi barindwi ba Ripdorf banze kujya mu kibuga, bivuze ko ikipe yashoboraga gucibwa amande ya €200 (agera ku bihumbi 226 Frw) kuko yanze gukina.

Aganira na CNN binyuze kuri email, Ristow yagize ati “Muri ibi bihe by’icyorezo, ikipe yacu nta mafaranga menshi ifite yo kwishyura, rero abakinnyi bavuze ko bakina, ariko bakazirikana gusiga intera hagati yabo n’abo bahanganye.”

“Mu minota yose 90, abakinnyi bacu bubahirije intera uko bikwiye ku buryo Holdenstedt yabonye igihe gihagije cyo gutsinda ibitego. Ntitwigeze tuvuga ku bijyanye n’amayeri y’umukino kuko twari tuzi ko turatsindwa byinshi. Abo twakinaga ntibigeze basobanukirwa ubwo babonaga tubitaza.”

“Turabizi ko umusaruro wavuye mu mukino ari umubi ariko umutekano ni ngombwa kurusha umukino kuri twe. Ku bakinnyi bose, umusaruro nta kibazo kandi ku mpera z’umwaka w’imikino bareba amanota, ntabwo ari ibitego.”

Muri uyu mukino, abakinnyi ba Holdenstedt bagerageje kugirira impuhwe bagenzi babo kuko batageraga ku izamu byibuze hafi mu minota ibiri.

Ubuyobozi bwa Ripdorf buvuga ko umusaruro wavuye muri uyu mukino wagarutsweho cyane ku mbuga nkoranyambaga bituma bahabwa ibitekerezo birimo kuba bazajya bashaka uko umukino usubikwa, aho gutsindwa bene aka kageni.

SG Ripdorf/Molzen II yatsinzwe ibitego 37-0 kubera kubahiriza intera hagati y'umukinnyi n'uwo bahanganye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .