Meddie Kagere na Haruna Niyonzima bacunguye weekend y’Abanyarwanda bakina hanze

Yanditswe na Eric Tony Ukurikiyimfura
Kuya 5 Ukwakira 2020 saa 09:43
Yasuwe :
0 0

Mu gihe benshi mu Banyarwanda bakina hanze bakomeje kugorwa no kubona umwanya wo gukina, Meddie Kagere yafashije Simba SC kwitwara neza, ayitsindira ibitego bibiri mu gihe na Kapiteni w’Amavubi, Haruna Niyonzima, yatsindiye Yanga SC igitego mu mpera z’icyumweru.

Kuri ubu Abanyarwanda bakina hanze nibo bahanzwe amaso ko bashobora kugira icyo bafasha Ikipe y’Igihugu ubwo izaba ihamagawe kugira ngo izakine na Cap-Vert mu kwezi gutaha dore ko imikino y’imbere mu gihugu itarasubukurwa.

Ku Cyumweru, Kagere Meddie yafashije Simba SC gutsinda JKT Tanzania ibitego 4-0 mu mukino yinjijemo ibitego bibiri.

Ku munota wa gatatu gusa, Kagere yafunguye amazamu ku gitego yatsindishije umutwe ku mupira yari ahawe na Lally Bwalya mu gihe igitego cya kabiri yagitsinze ku munota wa 40 ku mupira yahawe na Clatous Chama.

Mu mikino itanu imaze gukinwa muri Shampiyona ya Tanzania, Meddie Kagere amaze gutsinda ibitego bine mu gihe Simba SC yuzuzaga amanota 13.

Ku rundi ruhande, kapiteni w’Amavubi, Haruna Niyonzima, yinjiye mu kibuga asimbuye ku wa Gatandatu, afasha mukeba wa Simba SC, Yanga SC, gutsinda Coastal Union ibitego 3-0, aho yinjije igitego cya kabiri.

Niyonzima Ally ntiyigeze agaragara mu bakinnyi ba Azam FC yatsinze Kagera Sugar ibitego 4-2 ku Cyumweru mu gihe Mugiraneza Jean Baptiste ‘Migi’ agitegereje ibyangombwa byo gukinira KMC ifitanye umukino na Polisi Tanzania kuri uyu wa Mbere.

Ubwo El Geish yakinaga na Al Ittihad, zikanganya ibitego 2-2 muri Shampiyona ya Misiri, Muhire Kevin yakinnye iminota 24, asimburwa na Ahmed Kaboria.

Bizimana Djihad wa Waasland-Beveren mu Bubiligi, Rwatubyaye Abdul wa Colorado Springs Switchbacks muri Leta Zunze Ubumwe za Amerika na Kevin Monnet-Paquet wa Saint-Etienne mu Bufaransa, bose ntibagaragaye mu mikino amakipe yabo yakinnye mu mpera z’icyumweru.

Meddie Kagere yafashije Simba SC kwitwara neza mu mpera z'icyumweru
Kagere yatsinze JKT Tanzania ibitego bibiri muri 4-0 ikipe ye ya Simba SC yabonye muri uyu mukino

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .