Murenzi Abdallah yavuze ku biganiro bagiranye na SKOL n’ibijyanye n’abandi baterankunga

Yanditswe na Eric Tony Ukurikiyimfura
Kuya 28 Nzeri 2020 saa 12:25
Yasuwe :
0 0

Perezida w’inzibacyuho wa Rayon Sports, Murenzi Abdallah, yavuze ko bakomeje kuganira na SKOL nk’umuterankunga mukuru w’iyi kipe, ndetse yemeje ko biri mu nzira nziza.

Ku wa Kane w’icyumweru gishize nibwo Urwego rw’Igihugu rw’Imiyoborere (RGB) rwemeje ko Murenzi Abdallah n’abandi babiri bafatanyije, bafata Rayon Sports mu nzibacyuho y’iminsi 30, bakayishyira ku murongo mu by’amategeko n’imicungire y’umutungo.

Mu gihe cy’amezi 14 Rayon Sports yari imaze iyobowe na Komite ya Munyakazi Sadate yakuweho, havuzwe ubwumvikane bucye hagati y’iyi kipe n’umuterankunga wayo mukuru, Uruganda rwenga ibinyobwa rwa SKOL, ndetse bari mu nzira zo gutandukana.

Nyuma y’iminsi ine atangiye kuyobora, Murenzi Abdallah yabwiye Radio 10 ko ibiganiro bagiranye na SKOL ari byiza, ndetse bizeye ko bizarangira mu gihe cya vuba.

Ati “Abaterankunga nahera kuri SKOL, twaraganiriye ibiganiro bigenda neza. Umwuka mubi wari uhari tubereka ko tuje gukosora ibitaragenze neza. Ibiganiro by’amasezerano ntabwo bihita birangira, igikenewe ni inkunga y’inyongera ku yari ihari. Ibirebana n’ibijya mu ivugururwa ry’amasezerano nibyo bikiganirwaho.”

“Twemeranyije ko uyu munsi ku gicamunsi twongera kuganira kuri iyo mirongo migari tutari twumvikanyeho.”

Abajijwe ku bivugwa ko kuri ubu SKOL izajya iha Rayon Sports miliyoni 12 Frw ku kwezi, aho yaba ikubye kabiri ayo yari isanzwe itanga, Murenzi Abdallah yavuze ko bikiri ibanga.

Ati “Hari ibintu aka kanya tutaganira ku mibare. Bimaze kujya ku mugaragaro nibwo bishobora gutangazwa, bigasangizwa abantu. Kugeza ubu bifitiye inyungu Rayon Sports na SKOL ubwayo.”

Murenzi Abdallah yavuze ko kandi bateganya kugirana ibiganiro n’abandi bafatanyabikorwa ba Rayon Sports nyuma yo kongera guhuza abafana.

Ati “Ibiganiro na Radiant turabisubukura, kimwe na Airtel ndetse muri iki cyumweru tukazababwira umusaruro wavuyemo.”

Rayon Sports yari isanzwe ihabwa na SKOL miliyoni 66 Frw ku mwaka. Kuri ubu bivugwa ko aya mafaranga ashobora kongerwa akagera kuri miliyoni 120 Frw.

Iyi kipe ivuga ko kugira ngo ibone abakinnyi yifuza kugura muri iyi mpeshyi, ikeneye miliyoni 80 Frw.

Murenzi Abdallah avuga ko ibiganiro byo kongera gukorana na SKOL biri mu nzira nziza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .