Rayon Sports ikeneye miliyoni 110 Frw, igiye gusezerera abakinnyi 12, igure abandi bane bavuye hanze

Yanditswe na Eric Tony Ukurikiyimfura
Kuya 4 Ukwakira 2020 saa 10:59
Yasuwe :
0 0

Perezida w’inzibacyuho wa Rayon Sports, Murenzi Abdallah, yavuze ko iyi kipe ikeneye miliyoni 110 Frw mbere yo gutangira umwaka mushya w’imikino, aho igice cy’aya mafaranga kizagurwamo abakinnyi bane bakomeye bavuye hanze y’u Rwanda.

Rayon Sports irateganya gukoresha abakinnyi 26 mu mwaka utaha w’imikino, aho muri 43 basizwe na Komite ya Munyakazi Sadate, hazasigaramo 21 gusa nk’uko IGIHE yabyanditse.

Mu kiganiro yagiranye na Televiziyo Rwanda ku wa Gatandatu, Murenzi Abdallah yavuze ko mu bakinnyi batanu bashya bagomba kugura, hamaze kuboneka umwe [Niyigena Clément wavuye muri Marines] mu gihe abandi bane basigaye bazava hanze.

Ati “Mu bakinnyi 43 harimo 10 bato, abo tuzabagumana kuko ni amizero ya Rayon Sports. Muri 33 basigaye, umutoza yatweretse ko azakeneramo 21, ubwo ni ukuvuga ko harimo 12 tugomba kureka bakajya gushaka ahandi bakina, nabo ntabwo bakwifuza kwicara.”

“Muri 21 basigaye, yaratubwiye ngo twongeremo abandi batanu ku buryo tugira ikipe ishobora guhangana. Umwe mwaramubonye, myugariro mwiza twakuye muri Marines FC, hari n’abandi bakinnyi batatu yatweretse. Akeneye umukinnyi umwe wo hagati cyangwa se babiri na ba rutahizamu babiri.”

“Ndahamya ko Rayon Sports izaba ikomeye kuko tuzongeramo abari ku rwego rurenze urw’abagiye. Abo bane duteganya, turateganya ko bazava hanze. Hari abakinnyi beza turi kuganira, mu cyumweru gitaha, aba-Rayon batangire kuba hafi y’ikibuga cy’indege.”

Mbere y’uko Munyakazi Sadate akurwa ku buyobozi, yari yasabwe n’umutoza Guy Bukasa kugura Abanye-Congo batatu: Kambale Musafiri, Déo Kanda na Vital Ourega.

Murenzi Abdallah yavuze ko Rayon Sports ikeneye miliyoni 110 Frw kugira ngo ibashe kugura abakinnyi, kwishyura ibirarane by’abakinnyi no gutangira umwiherero utegura umwaka utaha w’imikino.

Ati “Rayon Sports ikeneye byibuze miliyoni 110 Frw kugira ngo mu byumweru bibiri biri imbere cyangwa kimwe, tube twatangira imyitozo.”

“Dukeneyemo byibuze miliyoni 60 Frw zo kuzana ba bakinnyi twavugaga, dukeneyemo miliyoni 30 Frw zo kurangiza ibirarane by’abakinnyi baguzwe ntibishyurwe, imishahara n’uduhimbazamusyi batahawe.”

“Tukagira na miliyoni 20 Frw zo kugira ngo dutangire; kwipimisha, gushaka aho abakinnyi bazaba mu mwiherero, mbese biriya byo kubahiriza amabwiriza yo kurwanya COVID-19. Kuba tugeze muri miliyoni 30 Frw dufite icyizere cyo kubona, turi kuri 25%, turegera abafatanyabikorwa bacu n’abakunzi bacu ngo batwunganire.”

Ku wa Kabiri, amatsinda y’abafana ba Rayon Sports agera kuri 40, yitanze agera kuri miliyoni 13.15 Frw, ariko aya mafaranga amaze kugera kuri miliyoni 18 Frw ndetse bavuze ko azatangwa bitarenze ku wa 5 Ukwakira.

Mu yindi nama yabaye ku wa Gatanu, abahoze mu buyobozi bw’iyi kipe n’abandi bayiba hafi, bitanze asaga miliyoni 15 Frw mu gihe Murenzi Abdallah yavuze ko mu bantu 30 bari batumiwe, habonetsemo 23 bityo biteze ko bazabona miliyoni 20 Frw muri iki cyiciro.

Rayon Sports iherutse gutangaza ko yumvikanye na SKOL ku masezerano mashya, aho bivugwa ko izajya ihabwa miliyoni 120 Frw ku mwaka, ariko wongeyeho ibyo igenerwa byose birimo ikibuga, imyambaro yo gukinana n’ibindi bikoresho, bikagira agaciro ka miliyoni 217 Frw.

Murenzi Abdallah avuga ko Rayon Sports ikeneye miliyoni 110 Frw zirimo miliyoni 60 Frw zizagurwa abakinnyi bane bashya
Niyigena Clément wari kapiteni wa Marines FC ni we mukinnyi Rayon Sports imaze kugura muri batanu basabwe n'umutoza Guy Bukasa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .