Rayon Sports mu biganiro byo gutiza rutahizamu mushya w’Umurundi

Yanditswe na Eric Tony Ukurikiyimfura
Kuya 14 Ukwakira 2020 saa 04:28
Yasuwe :
0 0

Ubuyobozi bwa Rayon Sports buri mu biganiro na Bugesera FC kugira ngo buzayitize rutahizamu w’Umurundi, Nihoreho Arsène.

Nihoreho Arsène wakiniraga Olympic Star yo mu Burundi, yasinyiye Rayon Sports muri Kamena uyu mwaka, ku masezerano y’imyaka ibiri.

Nyuma y’uko Rayon Sports ikomeje kugura abakinnyi batandukanye, hari gutekerezwa uburyo uyu mukinnyi wabaye uwa gatatu mu batsinze ibitego byinshi mu Burundi n’ibitego 17, yatizwa ikipe ya Bugesera FC.

Umunyamabanga wa Bugesera FC, Karenzi Sam, yemeje aya makuru mu kiganiro cya siporo cya Radio 10, agira ati “Arsène ntibirarangira, ariko ibiganiro bihagaze neza.”

Nihoreho w’imyaka 20, ni umwe mu bakinnyi 24 baherukaga kwemezwa na Rayon Sports ku rutonde rw’agateganyo rw’abazifashishwa mu mwaka w’imikino wa 2020/21.

Nyuma y’uko Rayon Sports yamaze gutira Umunye-Congo Robert Mbelu muri TP Mazembe ndetse ikaba yizeye kubona Umunya-Mali Moussa Camara, hatangiye gutekerezwa uburyo uyu Murundi yatizwa.

Mu gihe Rayon Sports yabona aba bakinnyi bose hakiri Nihoreho Arsène, yaba ifite abanyamahanga barindwi mu gihe abemewe kwifashishwa ku mukino mu Rwanda ari batatu nubwo hari amakuru avuga ko bashobora kongerwa bakaba batanu.

Abandi ni Umunya-Côte d’Ivoire Jean Vital Ourega watiwe muri TP Mazembe, Umunye-Congo Manace Mutatu, Umunya-Côte d’Ivoire Drissa Dagnogo n’Umunya-Mali Oumar Sidibé.

Rayon Sports irashaka gutiza Nihoreho Arsène muri Bugesera FC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .