UEFA Nations League yagarukanye n’imikino ikomeye i Burayi izerekanwa kuri StarTimes

Yanditswe na IGIHE
Kuya 6 Ukwakira 2020 saa 07:06
Yasuwe :
0 0

Irushanwa rya UEFA Nations League rihuza amakipe y’ibihugu ku Mugabane w’u Burayi rirakomeza muri iki cyumweru, ahateganyijwe imikino ikomeye irimo uzahuza u Bufaransa na Portugal.

Ku Cyumweru nibwo hateganyijwe uyu mukino wo mu Itsinda rya Gatatu, aho u Bufaransa buzakira Portugal kuri Stade de France muri Saint-Denis.

Ibi bihugu byombi kimwe n’u Bubiligi, ni byo byonyine byatsinze imikino ibiri ibanza muri Nations League A, ariko ikipe imwe niyo izabona itike yo gukomeza mu mikino ya nyuma y’iri rushanwa.

Nyuma y’iminsi itatu ikinnye na Portugal, Ikipe y’Igihugu y’u Bufaransa ‘Les Bleus’ izerekeza i Zagreb gukina na Croatie byaherukaga guhurira ku mukino wa nyuma w’Igikombe cy’Isi cya 2018, u Bufaransa bugatsinda ibitego 4-2.

Paul Pogba utarakinnye imikino ibiri ibanza kubera COVID-19, yongeye guhamagarwa n’umutoza Didier Deschamps.

Amakuru meza ku mutoza wa Croatie, Zlatko Dalić, ni uko ubuyobozi bwemeye ko hagendewe ku mabwiriza ya UEFA, hashobora kwemerwa abafana batarenze 30% by’abasanzwe bakirwa muri Stade Maksimir yo mu Mujyi wa Zagreb.

Kuba abafana b’ikipe yasuye batemerewe kujya ku mikino yo hanze, Kapiteni wa Croatie, Luka Modrić, na bagenzi be bazaba bizeye gushyigikirwa n’abafana babo gusa.

Ntabwo ari mu itsinda rya gatatu hari umukino utegerejwe na benshi gusa kuko no mu rya kabiri hari umukino uzahuza u Bubiligi bwa mbere ku Isi n’u Bwongereza.

Nk’uko bimeze ku Bufaransa na Croatie, uyu mukino uzabera kuri Stade Wembley ugiye guhuza amakipe yahuriye mu Gikombe cy’Isi, aho Les Diables Rouges y’u Bubiligi yatsinze ikipe y’umutoza Gareth Southgate ibitego 2-0 bahataniye umwanya wa gatatu.

Southgate yahamagaye abakinnyi batatu bashya barimo umukinnyi ukiri muto wa Arsenal, Bukayo Saka, wanze gukinira Nigeria.

Uyu mukinnyi w’imyaka 19 ni umwe mu bari kwitwara neza, aho ashobora gukina ku ruhande rw’ibumoso inyuma cyangwa akifashishwa mu busatirizi.

Umutoza w’u Bubiligi, Roberto Martinez, yitabaje ikipe ikomeye izakina n’u Bwongereza na Iceland, ariko haracyari gushidikanya kuri Eden Hazard utarakira neza imvune yatumye adakinira Real Madrid mu mpera z’icyumweru.

Gusa rutahizamu wa Inter Milan, Romelu Lukaku, ari mu bihe byiza ndetse yitezweho gufasha igihugu cye i Wembley.

Umukino utegerejwe cyane mu itsinda rya mbere uzahuza u Buholandi n’u Butaliyani tariki ya 14 Ukwakira. Uzaba ari uwa kabiri ku mutoza Frank de Boer wahawe Ikipe y’Igihugu y’u Buholandi nyuma y’igenda rya Ronald Koeman wagiye gutoza FC Barcelone. Mu minsi itatu izabanza, azaba yahuye na Bosnie &Herzegovine.

Iyi mikino ikomeye n’indi yose itegerejwe n’abakunzi b’umupira w’amaguru muri Afurika, izerekanwa iri kuba mu mashusho meza ya HD kuri StarTimes.

UEFA Nations League yagarukanye n’imikino ikomeye i Burayi izerekanwa kuri StarTimes

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .