Imbamutima z’abatsindiye ibihembo muri gahunda y’imyitozo yunganira Car Free Day

Yanditswe na Eric Tony Ukurikiyimfura
Kuya 9 Ukwakira 2020 saa 08:55
Yasuwe :
0 0

Nyuma y’icyumweru kimwe gusa hatangijwe gahunda y’imyitozo yunganira Siporo Rusange ya Car Free Day, ikerekanwa kuri televiziyo zitandukanye zo mu Rwanda, Nsengimana Théogène na Mary Maina nibo batsindiye ibihembo ku ikubitiro.

Ku wa Gatatu tariki ya 7 Ukwakira nibwo hahembwe abantu babiri barushije abandi gukurikirwa cyane ku mbuga nkoranyambaga (views, likes, shares na comments) binyuze ku mashusho y’imyitozo ngororamubiri basangije abandi bifashishije hashtag ya #BeActiveRw.

Umwe muri aba bombi habawe igihembo, Mary Maina, yavuze ko yashimishijwe no kucyegukana binyuze ku mashusho y’imyitozo ngororamubiri yakoze kandi atari abyiteze.

Ati “Byarantunguye kandi byaranshimishije kuba naratsindiye igihembo. Nsanzwe nkora imyitozo, nifashe amashusho ndayasangiza kandi siporo iradufasha cyane mu buzima, yaramfashije cyane mu bihe bya Guma mu Rugo kuko ntitwavaga mu rugo.”

Yakomeje avuga ko n’abandi badakwiye gutinya gusangiza amashusho yabo bakora imyitozo ngororamubiri kuko atari ibintu bibi baba bari gukora cyangwa ngo bumve ko iyi myitozo ikorwa n’ababyibushye gusa.

Ati “Abenshi bavuga ko siporo ikorwa n’abantu bahaze cyangwa abarya ibintu bibyibusha, ariko buri wese afite inshingano zo kwita ku mubiri we kuko nta wundi wabimukorera.”

“Ni ibintu bishimishije badushyiriyeho kandi biradufasha. Hari inshuti zanjye zumvaga ko zitasangiza amashusho ziri gukora imyitozo ngororamubiri ariko nababwira ko ntacyo bitwaye kuko nta kibi baba bari gukora. Buri wese akwiye gutinyuka kuko ni ukwishimisha kandi babishyizeho ku bw’inyungu zacu.”

Nsengimana Théogène usanzwe ari umutoza w’imyitozo ngororamubiri ndetse akaba na we yaratsindiye igihembo, yavuze ko cyabaye inyungu yiyongereye mu zindi kuko no mu gukora siporo aba ari kubungabunga ubuzima bwe.

Ati “Ubundi ni njye wagahembye kuko banshishikarije gukora siporo kandi inyungu nyinshi ni izanjye: hari ukugira ubuzima bwiza binyuze muri siporo no guhabwa igihembo.”

“Gukora siporo ntabwo bigombera ko baba bagushyiriyeho igihembo kuko aba ari ubuzima bwawe uba ugomba kwitaho. Nashishikariza abantu kuyikorera mu rugo muri ibi bihe bya COVID-19, bakabireba kuri televiziyo kuko biradufasha cyane.”

Yakomeje agira ati “Nta muntu udakenera siporo kuko ituma amaraso atembera neza mu mubiri, nubwo byaba iminota 30 irahagije.”

Ku wa 27 Nzeri nibwo Minisiteri ya Siporo, Minisiteri y’Ubuzima/RBC, Umujyi wa Kigali na Rwanda NCD Alliance bahurije imbaraga hamwe mu kugarura Car Free Day binyuze kuri televiziyo no kuyitambutsa iri kuba ku mbuga nkoranyambaga.

Iyi myitozo ngororamubiri inyuzwa kuri TV10, Flash TV, Isango Star TV na TV1 guhera ku cyumweru cya kabiri n’icya kane cya buri kwezi, aho ibisikana na Siporo Rusange ya Car Free Day yakomorewe mu Mujyi wa Kigali ku wa 20 Nzeri, yo ikaba ikorwa mu cyumweru cya mbere n’icya gatatu cya buri kwezi.

Iyi gahunda yatangiranye kandi n’ibikorwa bya “Be Active Rwanda Challenge” #BeActiveRw, byo gushishikariza abaturage kwitabira ibikorwa by’imyitozo ngororamubiri mu ngo zabo, aho bifata amashusho magufi mu gihe bari gukurikira, bakorera siporo mu rugo bifashishije televiziyo cyangwa imbuga nkoranyambaga mu gihe biri kuba ako kanya.

Ayo mashusho bayasangiza abandi ku mbuga nkoranyambaga zitandukanye bakoresha hashtag ya #BeActiveRw.

Ibi biganiro by’imyitozo ngororamubiri binyuzwa kuri televiziyo, byashyizweho nyuma y’uko mu kwezi gushize Minisiteri ya Siporo n’Umujyi wa Kigali bongeye gufungura Car Free Day bikagaragara ko Abanyarwanda bari bakumbuye gukora siporo.

Minisiteri ya Siporo iherutse gutangaza ko imikino ikorwa byo kwinezeza itemewe muri ibi bihe bya COVID-19 ndetse Car Free Day ikaba itarakomorerwa mu bindi bice by’igihugu uretse mu Mujyi wa Kigali.

Ubushakashatsi bwagaragaje ko umuntu ufite ubuzima bwiza, umubiri we ushobora guhangana na Coronavirus ndetse siporo ni kimwe mu by’ingenzi bifasha kugira ubwo buzima bwiza.

Mary Maina ashyikirizwa igihembo na Mbarushimana Alphonse wo muri Rwanda NCD Alliance
Mary Maina avuga ko yashimishijwe n'igihembo yahawe, asaba n'abandi gutinyuka bagasangiza amashusho yabo bakora imyitozo ngororamubiri
Nsengimana Théogène na we yashimishijwe n'igihembo yashyikirijwe ku wa Gatatu muri gahunda ya #BeActiveRw

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .